Aba Hebeli 8 - IBAYIBOLO 2024

U Yesu we Muputi witu Usongo

¹ Ifundo iyenecho yiyo tukunena yo iyi: Tuli nawe umuputi usongo yuyo ikaye kunyobe indilo iya chitengo icha buchindamu icha Chala kumwanya.

² Umuputi usongo yunuyu akubomba imbombo Mubuzilo Ubuzelu nkani, ichisakasa ichenecho chicho chizengiwe nu Mwene, te ni nyobe izya bantu, awe.

³ Umuputi wesi Usongo akusaliwa ukuti abike ivyabupi nivyakwiyipa kwa Chala. Polelo chikulondiwa ukuti Umuputi witu Usongo wepe abanje nacho chimo ichakwiyipa.

⁴ Nanti akabanga muchisu ichapasi, ngali ate muputi napo panandi bulo pakuti balipo kale abaputi, babo bakubika ivyabupi ukuyana ni Ndaghilo izya Chiyuda.

⁵ Imbombo yiyo bakubomba Mubuzilo Ubuzelu chifwanikizyo bulo nu muzyezye uwa vivyo vili kumwanya. Ichi cho chifukwa u Chala akamusoka u Mozesi, bo ali papipi pakuzenga ichisakasa akati, “Wenelezye ukuti wavipanga vyosi ukuyana namumo nkukulanjizizya pighamba pano.”

⁶ Loli u Yesu apeghiwa imbombo iya buputi yiyo yapamwanya nkani ukuchila iyabo, ukuyana namumo ulufingo lulo akabatika pakasi pa Chala na bantu bache lwiza nkani, pachifukwa ichakuti lughonite pilayizyo ilya vintu ivyizapo.

⁷ Nanti ulufingo ulwakwanda lukabanga ulusita chilema nachimochimo, po ngali ulufingo ulwabubili lutakalondiwa sona.

⁸ Loli u Chala akabagha abantu bache ni chilema nukuti, “Akabalilo kakwiza kako nkwiza pakufingana nabo ulufingo ulupya aba Izilayeli, sona na baluko ulwa Yuda.

⁹ Lutakwiza pakuba sona ngati lufingo ulwakale lulo ingafingana na banyenya binyu bo nkubalema pa nyobe nukubefyamo muchisu icha Ijiputi. Pachifukwa ichakuti abene batakasunga ulufingo lwane, po nane nkabasulannya bulo.” U Mwene anena.

¹⁰ U Mwene akati, “Ulu lo lufingo lulo nkwiza pakufingana naba Izilayeli mumasiku ghalaghala. Nkwiza pakubika ululaghilo lwane mukasi mumwabo nukulusimba mumoyo ghabo. Nkwiza pakuba ne Chala wabo, sona abene bakwiza pakuba bantu bane.

¹¹ Nayumoyumo umuntu yuyo akwiza pakumumanyisya umupalamani wache, pamo ukumubuzya umukamu wache ukuti, ‘Umumanye u Mwene.’ Pakuti bosi bakwiza pakummanya ane, abana abanandi na bantu abasongo bulo.

¹² Nkwiza pakubahobokela imbibi zyabo, sona ntakwiza pakubukumbukapo nalumolumo ukunanga kwabo.”

¹³ Pakunena nizya lufingo ulupya, u Chala akung'anamula ukuti ulufingo ulwakwanda lwamala imbombo; pakuti chicho chamala imbombo chili papipi nukuzimila.