Aba Hebeli 7 - IBAYIBOLO 2024

Umuputi u Melekizedeki

¹ U Melekizedeki yunuyu akaba we mwene uwamu Salemu, sona nu muputi uwa Chala Uwakumwanya Nkani. Bo u Abulahamu akubwelako kubwite pakupota abamwene folo, u Melekizedeki akakomana nawe nukumusaya.

² Po u Abulahamu akamupa ichigaba choka pavigaba 10 ivya vintu vivyo akafyula kubwite. Ichakwanda, itabwa lyache likung'anamula ukuti, “Umwene uwa bugholosu,” ichabubili, likung'anamula ukuti, “Umwene uwamu Salemu,” kokuti, “U Mwene uwa mutende.”

³ Nizya wise uwa Melekizedeki, pamo unyina pamo abanyenya bache, pamo sona nizya kupapiwa kwache nu bufwe bwache tutabuziwe. Loli ayanite bulo nu Mwana uwa Chala, sona we muputi uwa bwila na bwila.

⁴ Ennya bulo namumo ubukulu bwache bukabela. U Abulahamu, umunyenya witu umumanyikwe, akamupa ichigaba choka pa vigaba 10 ivya vintu vivyo akafyula kubwite.

⁵ Bope abaluko ulwa Levi babo bakaba baputi bakabuziwa ni Ndaghilo izya Mozesi ukuti basanguzye ichigaba choka pa vigaba 10 pakasi paba Izilayeli, kokuti bakupokela ku bakamu babo napapo baluko ulwa Abulahamu.

⁶ U Melekizedeki atakaba waluko ulwa Levi, loli akapokela kwa Abulahamu ichigaba choka pa vigaba teni. Po akamusaya u Abulahamu, umuntu yuyo akapokela ilayizyo ilya Chala.

⁷ Chakumanyikwa nkani ukuti umuntu uwa pamwanya akumusaya umuntu uwapasi.

⁸ Pakunena nizya baputi, ichigaba choka icha vintu 10 chikupeghiwa ku bantu babo bakufwa. Loli pakunena nizya Melekizedeki chikupeghiwa ku muntu yuyo mumi, ukuyana na Masimbo.

⁹ Po umuntu yumo anganena ukuti bo u Abulahamu akubika ichigaba choka pa vigaba teni, u Levi wepe yuyo akapokela ichigaba choka pa vigaba 10 akabika ukwendela mwa Abulahamu.

¹⁰ Pakuti bo u Melekizedeki akomana nu Abulahamu, u Levi akaba achili ali mumpapo iya banyenya bache.

¹¹ Indaghilo zizyo aba Izilayeli bakapokela zikaghona pabuputi ubwa Levi. Polelo nanti ubuputi ubwa Levi bukabanga bwakufikapo, ngali kutakalondiwa sona ukuboneka umuputi uyunji, yuyo ali mulubatiko ulwa buputi ubwa Melekizedeki, ate buputi ubwa Aloni, awe.

¹² Pakuti bo ubuputi bukwanduka, po zyope indaghilo zibaghiye zyandukaye.

¹³ Po u Mwene witu, yuyo ivintu vinivi vikumunena akaba waluko ulunji bulo, sona atakabapo nayumo umuntu uwaluko lwache yuyo akabombapo lumo ngati we muputi.

¹⁴ Pakuti chili pabuzelu bulo ukuti u Mwene witu akaba waluko ulwa Yuda. Po pakunena nizya luko ulu, u Mozesi atakanenapo izya baputi.

Umuputi uyunji uwakuyana nu Melekizedeki

¹⁵ Amazyu agha ghakwivwika akiza nkani nanti akuboneka umuputi uyunji yuyo ayanite bulo nu Melekizedeki.

¹⁶ Umwene atakimikiwa pakuba muputi ni ndaghilo izya bantu, loli ukwendela mumaka agha bumi bubo butakumalapo nalumolumo.

¹⁷ Pakuti Amasimbo ghakuti, “Ukwiza pakuba muputi uwa bwila na bwila mulubatiko ulwa buputi ubwa Melekizedeki.”

¹⁸ Indaghilo izyakale zila zyalekiwa pachifukwa ichakuti zikaba dedebazu, sona zitakaba ni mbombo.

¹⁹ Pakuti Indaghilo izya Mozesi zitakavipela ivintu pakuba vyakufikapo. Loli ulusubilo ulwizapo lwapeghiwa, lulo lukutupalamizya kwa Chala.

²⁰ Ichi chikasimikiziwa ni chilapo. Pakuti abantu abanji bakimikiwa bulo pambombo iya buputi ukusita chilapo.

²¹ Loli u Yesu akimikiwa pakuba muputi ukwendela muchilapo, bo u Chala anena nawe ati, “U Mwene alapa, sona atakwiza pakwandulapo nalumolumo inyinong'ono zyache. ‘Awe we muputi uwa bwila na bwila.’ ”

²² Pachifukwa icha chilapo chinichi, u Yesu aba lusimikizyo ulwa lufingo ulwizapo.

²³ Ukonjelezyapo, abaputi abakale bakaba binji nkani, pachifukwa ichakuti bo weka afwa uyunji akendelela pakubomba imbombo yabo.

²⁴ Loli u Yesu akubangako bwila na bwila, sona ubuputi bwache bute bwakulekelana nu muntu uyunji, awe.

²⁵ Ichi cho chifukwa amenye pakubapoka abantu bosi babo bakwiza kwa Chala ukwendela mumwache. Pakuti umwene mumi bwila na bwila pakubalambilizikizya kwa Chala.

²⁶ Chikaba chakulondiwa ukuti aswe tubanje nu muputi usongo yunuyu. Umuputi uyu muzelu, yuyo ate ni chilema nachimochimo, sona ate ni mbibi nayimoyimo. Umwene akakweziwa ukuchila ivintu vyosi ivya kumwanya.

²⁷ Umwene atayanite na Baputi Abasongo abanji, pakuti chitakulondiwa ukuti abike tasi ivyakwiyipa ivya isiku ni siku ivya mbibi izyache ni zyache, po pisinda pache abike ivyakwiyipa ivya mbibi izya bantu. Akabombela zila koka bulo pakwiyipa mwene ukuti chibanje chakwiyipa.

²⁸ Pakuti Indaghilo izya Mozesi zikubimika abantu babo badedebazu pakuba Baputi Abasongo. Loli ichilapo chicho chikiza pisinda pa Ndaghilo chikamwimika u Mwana, yuyo aba wakufikapo bwila na bwila.