Aba Hebeli 6 - IBAYIBOLO 2024

¹ Polelo zagha twendelele ni chimanyisyo icha bwasongo, nukuvileka ivimanyisyo ivyakwanda ivya Kilisitu. Tutakandizyanje pakwala ulwalo lulo lukunena nizya kuzileka imbombo zizyo zikupela ubufwe nukusubila mwa Chala,

² nizya vimanyisyo ivya lozyo, nukubika inyobe pa muntu; nizya kuzyuka ukwa bantu abafwe, sona nizya bulongi ubwa bwila na bwila.

³ Nanti u Chala angitikizya, tukwiza pakubomba bunubu.

⁴ Chipala nkani na bantu babo bakalukana ulwitiko lwabo ukuti bapinduke sona. Abantu banaba bakapokelapo ulukozyo ulwa Chala, nukuyezyapo ivyabupi ivya kumwanya, sona nukupokela ichigaba icha Muzimu Umuzelu.

⁵ Abene bakabuyezyapo ubwiza ubwa Mazyu agha Chala, na maka agha kabalilo kako kakwiza muntazi,

⁶ po chipala nkani ukuti bapinduke sona nanti bawa, pachifukwa chakumukomela sona u Mwana uwa Chala pachipinjika nukumukozya isoni pabuzelu.

⁷ U Chala akulisaya itope lyosi lilyo likupokela ivula yiyo yikutima pipipipi nukwelezya imbeyu zizyo zikwavwa abantu babo bakuzilima.

⁸ Loli nanti likumezya amivwa ni sote, lite ni mbombo, sona bo lili papipi nukughuniwa. Po ubumalilo bwache ko kochiwa pamoto.

⁹ Baghaniwa, napapo tunganena bunubu, loli tukusubila ukuti muli nalo ulusayo lulo luli poka nu bupoki bwinyu.

¹⁰ U Chala mugholosu, sona atakwiza pakuluvya imbombo zyinyu nu lughano lulo mwamulanjizya bo mukubavwa abantu bache, sona mwendelela pakubavwa.

¹¹ Chicho tukulonda chakuti umuntu wesi uwa amwe endelele pakulanjizya ulweke mupaka pabumalilo, umwakuti ivintu vivyo mukuvilindilila nu lusubilo vikwanilisiwe.

¹² Tutakulonda ukuti mubanje bakata, loli mweghelelaye abantu babo bakupyana vivyo u Chala akalayizya pachifukwa icha lwitiko nu bufisalyoyo.

Ilayizyo ilya Chala ilyanaloli

¹³ Bo u Chala akumulayizya u Abulahamu, akalapa mwitabwa ilyache ni lyache, pakuti atakabapo nayumo umuntu uwakumuchila.

¹⁴ Akati, “Naloliloli nkwiza pakukusaya nukubalizya abaluko lwako.”

¹⁵ U Abulahamu alindilila mubufisalyoyo, pisinda pache akanda pakapokela zizyo u Chala akamulayizya.

¹⁶ Bo abantu bakulapa, bakulapa mwitabwa ilya muntu uyunji yuyo mukulupo ukuchila abene, po ichilapo chila chikumazya ukudalinkana kosi.

¹⁷ Abantu babo bakabaghila pakupyana zizyo u Chala akabalayizya, u Chala akalondagha pakubalanjizya pabuzelu nkani ukuti atakwiza pakwandulapo nalumolumo inyinong'ono zyache. Po akonjelezyapo ichilapo kwilayizyo lyache.

¹⁸ Pali ivintu vibili, vivyo vitanganduka, sona muvivyo u Chala atangatamanta. Po aswe twe twabwagha ubupoki na yuyo, twakaziwa nkani umoyo pakulemezya ulusubilo, lulo atubikiye pantazi papitu.

¹⁹ Ulusubilo lulo tuli nalo cho chipimpi icha bumi bwitu. Lutakuneng'ena sona lusubiliwa nkani, lulo lukupuluzannya pa mwenda uwakuzighila mu Nyumba iya Chala iyakumwanya nukwisimika Mubuzilo Ubuzelu nkani.

²⁰ U Yesu akalongolela kale ukwinjilamo mulamula mubuzilo bwitu. Umwene aba muputi usongo uwa bwila na bwila mulubatiko ulwa buputi ubwa Melekizedeki.