Aba Hebeli 5 - IBAYIBOLO 2024

¹ Umuputi wesi Usongo akusaliwa pakasi pabantu ukuti abimilile mubuzilo bwabo pamaso pa Chala, pakubika ivyabupi ni vyakwiyipa pachifukwa icha mbibi.

² Umwene abanje mololo na bantu babo abasita kumanya sona bakusobela, pakuti wepe bulo mudedebazu muvintu ivyinji.

³ Ichi cho chifukwa abaghiye pakubika ichakwiyipa pachifukwa icha mbibi izyache ni zyache, sona ni chakwiyipa icha mbibi izya bantu.

⁴ Nayumo umuntu yuyo akwiyipa mwene umuchizi uwakuba muputi usongo, loli pene papo nanti itiziwa nu Chala ukuyana namumo u Aloni akitiziliwa.

⁵ Umwakuyana bulo, wepe u Kilisitu atakiyipa mwene umuchizi uwakuba muputi usongo. Loli u Chala akamubuzya akati, “Awe we mwana wane, ilelo naba ne ghuso.”

⁶ Pabuzilo bumo akunena sona akuti, “Awe, we muputi uwa bwila na bwila, mulubatiko ulwa buputi ubwa Melekizedeki.”

⁷ Mumasiku agha bumi bwache muchisu ichapasi, u Yesu akiputa nukulambilizya kwa Chala umwakukolomoka ukukulu nkani, sona na masozi pakumulilila yuyo angamupoka kubufwe. U Chala akamwivwa pachifukwa ichakwiyisya nukwiyipa kwache.

⁸ Napapo akaba Mwana uwa Chala, umwene akamanyila pakwivwila ukwendela mu mayimba ghagho akakomana nagho.

⁹ Bo aba wakufikapo, akaba mbwibwi iya bupoki ubwa bwila na bwila ubwa bantu bosi babo bakumwivwila.

¹⁰ Po u Chala akamwimika pakuba muputi usongo mulubatiko ulwa buputi ubwa Melekizedeki.

Bakusokiwa ukuti batakataghe ulwitiko lwabo

¹¹ Pafundo yiniyi tuli navyo ivyinji ivyakunena, loli chikafu pakubalingannya, pachifukwa ichakuti mukumanyila panandipanandi.

¹² Napapo pakabalilo aka ngali mwaba mwe bamanyisi, loli muchili mukumulonda umuntu uyunji ukuti abamanyisye sona ivimanyisyo ivyakwanda ivya mazyu agha Chala. Muchili mukunyonywa pakung'wela sona ulukama mubuzilo ubwa kulya ichakulya ichikafu.

¹³ Umuntu wesi yuyo akung'wela bulo ulukama achili we bonda, atangakonka ichimanyisyo chicho chikulingannya nizya bugholosu.

¹⁴ Loli ichakulya ichikafu cho cha bantu abasongo, babo ukwendela mukumanyila bamenye ukulesannya pakasi pachintu chicho chiza ni chintu chicho chibibi.