Aba Hebeli 4 - IBAYIBOLO 2024

¹ Pakuti u Chala alayizya ukuti tukwiza pakwinjilamo mubutuzyo, po zagha tuchebe ukuti nayumo umuntu atakapotwe pakwinjilamo mubutuzyo bubo u Chala akatulayizya.

² Pakuti naswe bulo tukivwa Amazyu Amiza ngati bo babo. Loli amazyu ghagho bakivwa batakaba nagho ni mbombo nayimoyimo, pachifukwa ichakuti babo bakaghivwa batakaghapokela nu lwitiko.

³ Aswe twe tukusubila, tukwinjilamo mubutuzyo bula. Loli u Chala akababuzya abantu babo batakasubila akati, “Po nkakalala nkani nukulapa ukuti, ‘Batakwiza pakwinjilamo nalumolumo muchisu chane icha butuzyo chila.’ ” Ichisu icha butuzyo chinichi chikabako kale napo bo amala imbombo yache iyakupela ichisu ichapasi.

⁴ Tuzimenye ukuti ichisu icha butuzyo chinichi chikabako kale pakuti nizya Lisiku Ilyakutuzya pabuzilo bumo Amasimbo ghakuti, “U Chala akatuzya kumbombo zyache zyosi pisiku ilyaseveni.”

⁵ Pafundo yiniyi akanena sona akati, “Batakwiza pakwinjilamo nalumolumo muchisu chane icha butuzyo, chicho nkabalayizya.”

⁶ Chapabuzelu ukuti abantu abanji binjilaye mubutuzyo bula pakwennya ukuti abantu babo bakaba bakwanda pakwivwa Amazyu Amiza bakapotwa pakwinjilamo, pachifukwa ichakusita ukwivwila.

⁷ Po u Chala akimika sona isiku ilinji ilyakuti, “Ilelo.” Po kale akanena ukwendela mwa Devedi akati, “Ilelo nanti mukwivwa izyu mutakabanje na moyo amakafu.”

⁸ Pakuti nanti u Yoshwa akabapanga abantu ubutuzyo ubwenecho, pisinda pache u Chala ngali atanenite isiku ilinji.

⁹ Polelo kusyaliteko ubutuzyo ubupaghuliwa ubwa bantu aba Chala.

¹⁰ Pakuti umuntu wesi yuyo akwinjila mubutuzyo ubwa Chala ubu, wepe bulo akutuzya imbombo zyache ukuyana namumo u Chala akatuzikizya imbombo zyache izya bupeli.

¹¹ Po zagha tuyezye nkani pakwinjila mubutuzyo bula umwakuti atakabepo nayumo umuntu mumwitu uwakupotwa ukuyana namumo abene bakapotezezwa pachifukwa ichakusita ukwivwila.

¹² Pakuti amazyu agha Chala mumi sona ghakubombabomba. Ghakwete nkani ukuchila upanga yuyo akwete kosi na kosi. Upanga akulasa mupaka papo pakomanite impingu na mafuta agha mwifupa. Umwakuyana bulo, amazyu agha Chala ghakulasa mupaka papo pakomanite umoyo nu muzimu uwa muntu. Ghakulonga inyinong'ono izya bantu, sona na vivyo amoyo ghabo ghakunyonywa.

¹³ Pantazi pa Chala katalipo nakamo kako kafisiwe. Ivintu vyosi vili pabuzelu bulo, sona vili pa bwazi pantazi papache yuyo tubaghiye tumulingannye vyosi vivyo twabomba.

U Yesu we muputi usongo

¹⁴ Polelo pakuti tuli nu muputi usongo yuyo akabuka mupaka ukufika kumwanya, yuyo we Yesu u Mwana uwa Chala, po zagha tulemezye nkani ulwitiko lwitu lulo tukwitika.

¹⁵ Pakuti tute nu muputi usongo yuyo atangatupelela ichisa pachifukwa icha budedebazu bwitu. Loli tuli nawe weka bulo yuyo akayeliwa muvyosi ukuyana namumo naswe bulo tukuyeleliwa, loli atakanangapo nalumo.

¹⁶ Po zagha tupalamile kuchitengo icha bumwene icha Chala uwachisa nkani umwakusita ubogha, umwakuti tupokele ichisa, sona nukutwavwa pakabalilo kitu akakusobelwa.