Aba Hebeli 3 - IBAYIBOLO 2024

U Yesu mukulu ukuchila u Mozesi

¹ Mwee bakamu bane, u Chala abasalite amwe ukuti mubanje bantu bache abazelu. Polelo mwinong'onaye nizya Yesu, yuyo akatumiwa nu Chala ukuti abanje muputi usongo uwa lwitiko lulo tukwitika.

² Umwene akaba musubiliwa kwa Chala yuyo akamusala, ukuyana namumo u Mozesi akabela musubiliwa mu Nyumba iya Chala.

³ Umuntu yuyo akuzenga inyumba akupokela nkani umuchizi ukuchila inyumba iyenecho. Umwakuyana bulo, wepe u Yesu apokelaye nkani umuchizi ukumuchila u Mozesi.

⁴ Pakuti inyumba zyosi zikuzengiwa nu muntu, loli u Chala we muzengi uwa vintu vyosi.

⁵ U Mozesi akaba mubombi umusubiliwa munyumba yosi iya Chala, pakusimikizya zyosi zizyo u Chala akalondagha pakunena muntazi.

⁶ Loli u Kilisitu akaba Mwana umusubiliwa mu Nyumba iya Chala. Aswe twe nyumba yache, nanti tukwendelela pakuba bajivu nkani nukusunga ulusubilo lwitu muvintu vivyo tukuvilindilila.

Nizya kutuzya ukwa bantu aba Chala

⁷ Ichi cho chifukwa u Muzimu Umuzelu akuti, “Ilelo nanti mukwivwa izyu ilya Chala,

⁸ mutakabanje bakafu amoyo ghinyu. Umu mumo abanyenya binyu bakamusambukilila u Chala pakabalilo kako bakamuyelagha munkolongo.

⁹ Mulamula abanyenya binyu bakanjela, napapo bakavyennya vivyo nkabomba amaka 40.

¹⁰ Ichi cho chifukwa nkayikalalila nkani inkulilo yilayila. Po nkati, ‘Amoyo ghabo ghakupulumpa, sona batakukonka amalamulo ghane.’

¹¹ Po nkakalala nkani nukulapa ukuti, ‘Batakwiza pakwinjilamo nalumolumo muchisu chane icha butuzyo chila.’ ”

¹² Mwee bakamu bane, muchebaye ukuti atakabepo nayumo umuntu mumwinyu uwa moyo umubibi, sona nu musita ukusubila, ghugho ghungamulesannya nu Chala umumi.

¹³ Loli mukazannyanje isiku ni siku, bo tuli na Masimbo aghakuti, “Ilelo.” Bomba bunubu umwakuti nayumo umuntu mumwinyu atakazimbuliwe ni mbibi nukuba mukafu mumoyo.

¹⁴ Pakuti twebosi tuli ni chigaba muvintu vivyo u Kilisitu akupa nanti twimite nkani mupaka pabumalilo palusubilo lulo tukaba nalo pakwanda.

¹⁵ Amasimbo ghakuti, “Ilelo nanti mukwivwa izyu, mutakabanje na moyo amakafu ukuyana namumo mukabombela pakumusambukila u Chala.”

¹⁶ Nkimba bo bawenu babo bakivwa izyu lyache nukumusambukila? Nkimba batakaba bantu babo u Mozesi akabefya muchisu icha mu Ijiputi?

¹⁷ Nkimba bo bawenu babo akabakalalila amaka 40? Nkimba batakaba bantu babo bakananga, babo imivimba yabo yikabolela munkolongo?

¹⁸ Nkimba bo bawenu babo akabalapila ukuti batakwiza pakwinjilamo nalumolumo muchisu chache icha butuzyo? Nkimba batakaba bantu babo bakamusambukila?

¹⁹ Polelo tukwennya ukuti abantu bala bakapotwa pakwinjilamo muchisu icha butuzyo, pachifukwa ichakusita ukusubila kwabo.