Aba Hebeli 11 - IBAYIBOLO 2024

Nizya lwitiko

¹ Ulwitiko ko kusita ukwilamwa pachintu chicho tukuchisubila, sona ko kuba nu lusimikizyo pavintu vivyo tutakuvyennya na maso.

² U Chala akahoboka nkani na banyenya bitu pachifukwa icha lwitiko lwabo.

³ Lo lwitiko lulo lukutupela aswe ukwivwisya ukuti ichisu chosi chikapeliwa nizyu ilya Chala, sona nukuti ivintu vivyo vikuboneka na maso vikapeliwa kuvintu vivyo vitakuboneka na maso.

⁴ Lukaba lwitiko lulo lukamupela u Abeli akubika ichakwiyipa ichiza nkani kwa Chala ukuchila icha Kayini. Ukwendela mu lwitiko lwache u Chala akamunena pakuba mugholosu pantazi papache, pakuti u Chala akitikizya ivyabupi vyache. Sona pachifukwa icha lwitiko lwache, u Abeli achili akunena napapo afuye.

⁵ Lukaba lwitiko lulo lukamupela u Enoki pakusendiwa pakubuka kumwanya ukusita ukufwa. Atakaboneka sona, pachifukwa ichakuti u Chala akamusenda. Pakuti, bo atasendiwe pakubuka kumwanya, u Chala akahoboka nkani nawe.

⁶ Sona ukusita pakuba nu lwitiko, chipala nkani pakumuhobosya u Chala, pakuti umuntu wesi yuyo akwiza kukwache asubilaye ukuti u Chala aliko, sona nukuti akubapa umuvwalo abantu babo bakumulondelezya.

⁷ Lukaba lwitiko lulo lukamupela u Nowa ukuti asokiwe nu Chala nizya vintu vivyo vikaba vichili vitabonekite. U Nowa akivwila nukubiza ubwato bubo umwene poka ni mbumba yache bakaponelamo. Pachifukwa icha ulwitiko lwache, u Nowa akalanjizya ukuti abantu aba muchisu ichapasi banangite, po akapokela ichilingo icha bugholosu, chicho u Chala akubapa abantu babo bakumusubila.

⁸ Lukaba lwitiko lulo lukamupela u Abulahamu ukwivwila, bo u Chala akumwitizya ukuti asamile kuchisu ichinji chicho akamulayizya pakuba mpyana yache, napapo u Abulahamu atakamanya kuko akabukagha.

⁹ Lukaba lwitiko lulo lukamupela ukwikala ngati muyeni muchisu chicho u Chala akamulayizya. Akikalagha muchisakasa. Wepe u Yisaki nu Yakobo bakikalagha muvisakasa ukuyana namumo u Abulahamu akabombelagha, napapo ichilingo chicho u Chala akabalayizya chikaba chabo.

¹⁰ U Abulahamu akabomba bunubu, pachifukwa ichakuti akalindililagha akaya akakulu nkani kako kali nu lwalo ulukafu. Ufundi umwenecho yuyo akwata nukuzenga we Chala.

¹¹ Lukaba lwitiko lulo lukamupela u Abulahamu poka nu Sala pakupapa umwana, napapo amaka ghabo aghakupapila abana ghakaba ghachilite kale, pachifukwa ichakuti u Abulahamu akamusubila u Chala ukuti akwiza pakusungilila ilayizyo lyache.

¹² Po mwa Abulahamu, umuntu weka uyu yuyo akaba ngati afuye, mukapapiwa abaluko abinji nkani ngati zyo ntondwa izya kumwanya, sona na basita ukubelengiwa ngati gho musesenga uwa mulubazu ulwa nyanja.

¹³ Abantu bosi banaba bakendelela pakuba nu lwitiko mupaka nukufwa kwabo. Abene batakapokela zizyo u Chala akabalayizya, loli bakazyenezya pabutali bulo nukuhoboka. Bakitika pabuzelu ukuti bakaba bayeni na bendazila pachisu ichapasi.

¹⁴ Abantu babo bakunena bunubu bakulanjizya pabuzelu ukuti bakwilondela bene akaya akabo na kabo akakwikalamo.

¹⁵ Nanti bakinong'onagha nizya kaya kako bakakaleka, ngali bakaba nu lusako ulwa kunyokelako.

¹⁶ Loli bakachisamba ichisu ichiza nkani, chicho chisu icha kumwanya. Polelo u Chala atakukoziwa isoni ukwitiziwa ukuti we Chala wabo, pakuti abayanizizya akaya kabo akakulu nkani.

¹⁷ Lukaba lwitiko lulo lukamupela u Abulahamu pakumubika u Yisaki ukuti chibanje chakwiyipa, bo u Chala akumuyela. U Abulahamu akaba muntu yuyo u Chala akamulayizya, loli akiyannya pakumubika umwana uwache nu wache ukuti chibanje chakwiyipa.

¹⁸ U Chala akati, “Ukwendela mwa Yisaki ukwiza pakuba na baluko babo nkakulayizya.”

¹⁹ U Abulahamu akamusubila u Chala ukuti nanti u Yisaki afwa, akwiza pakumuzyusya sona kubufwe. Po tunganena ukuti chikaba ngati po u Abulahamu amupokela sona u Yisaki kubufwe.

²⁰ Lukaba lwitiko lulo lukamupela u Yisaki pakumusaya u Yakobo nu Esabu ni visayo ivya muntazi.

²¹ Lukaba lwitiko lulo lukamupela u Yakobo, bo akufwa ukuti abasaye abana bosi aba Yosefu, uyu pamwene, uyu pamwene. Akeghamila pamwanya pandisa iyakwendela nukwiputa kwa Chala.

²² Lukaba lwitiko lulo lukamupela u Yosefu, bo ali papipi pakufwa ukunena nizya kufuma ukwa ba Izilayeli mu Ijiputi, nukubabuzizya zila namumo bakwiza pakughasyilila amafupa ghache.

²³ Lukaba lwitiko lulo lukabapela abapapi aba Mozesi pakumufisa amezi matatu, bo apapiwa bulo pachifukwa ichakuti akaba mwana mwiza nkani. Po batakanyilagha pakunangannya indaghilo izya mwene.

²⁴ Lukaba lwitiko lulo lukamupela u Mozesi, bo akula ukukana ukwitiziwa mwizukulu uwa Falabo.

²⁵ Umwene akasala ukuyimba poka na bantu aba Chala nukuchila ukwilagha ni mbibi pakabalilo akapimpa bulo.

²⁶ Akinong'onagha ukuti ukuyimba pachifukwa icha Kilisitu bukaba bukabi ubukulu nkani ukuchila ubukabi bosi ubwa mu Ijiputi, pakuti amaso ghache ghakennyanga umuvwalo uwa muntazi.

²⁷ Lukaba lwitiko lulo lukamupela u Mozesi ukwepamo mu Ijiputi ukusita ukunyila ubukali ubwa Mwene, pakuti akajimba nkani ngati muntu yuyo akamwennyanga u Chala umusita ukuboneka na maso.

²⁸ Lukaba lwitiko lulo lukamupela u Mozesi ukulamula aba Izilayeli pakusekela Ulusekelo ulwa Pasa nukunyafila ibanda pamilyango, ukuti uwantumi uwa bufwe atakabapalamasye abana abakatote aba ba Izilayeli.

²⁹ Lukaba lwitiko lulo lukabapela aba Izilayeli pakuloboka Inyanja Inchesamu ngati po pachisu ichumizu. Loli abantu aba mu Ijiputi bo bakuyezya bakuloboka, bakadwiba.

³⁰ Lukaba lwitiko lulo lukapela ichibumba icha Yeliko ukuwa, bo aba Izilayeli benda umwakuchizyungulila amasiku seveni.

³¹ Lukaba lwitiko lulo lukamupela u Lahabu umalaya yula pakubapokela akiza abatendezi. Po atakaghoghiwa poka na bantu abasita ukumwivwila u Chala bala.

³² Nkimba nonjelezyepo sona ichoni? Inte na kabalilo akakunenela nizya Gidiyoni, nizya Balaki, nizya Samusoni, nizya Yefuta, nizya Devedi, nizya Samuweli, sona nizya balaghuzi.

³³ Lukaba lwitiko lulo lukabapela pakulwa ubwite na bamwene bosi aba muvyisu nukubapota. Bakabalaghila abantu nu bwanaloli, po bakapokela zizyo u Chala akalayizya, sona bakighalila imilomo iya nkalamu

³⁴ bakazimya umoto uwakoghofya, bakapona kwa panga uwakughogha. Napapo bakaba badedebazu, loli bakapokela amaka, umwakuti bakabachimbizya abasilikali aba balwani babo.

³⁵ Lukaba lwitiko lulo lukabapela abakolo bamo pakupokela sona abakamu babo abafwe, bo bazyusiwa kubufwe. Loli abantu abanji bakayiviwa mupaka nukufwa. Bakakana pakusatuliwa umwakuti bazyuke kubufwe nubumi ubwizapo.

³⁶ Abantu bamo bakasamuliwa nukusyempiwa, sona abanji bakabapinya ni mpingu nukubighalila mujele.

³⁷ Abantu bamo bakabaghogha pakubatiza na mabwe, abanji bakabadumulannya pabili, sona bakabaghogha nupanga. Bakendendekagha bulo bo bavwalite amakwela agha ng'ozi pamo amakwela agha mbuzi. Bakaba bapina, bakavwimiwa, sona bakayiviwa nkani.

³⁸ Abantu banaba bakaba bizapo ukuchila ichisu ichapasi. Loli bakendendekagha bulo munkolongo, na mumaghamba nukuvwama mumpako na muvibanka.

³⁹ Abantu bosi aba bakamuhobosya u Chala pachifukwa icha lwitiko lwabo. Loli pope bulo atakabapo nayumo umuntu yuyo akapokela zizyo u Chala akalayizya,

⁴⁰ pakuti u Chala akatuyanizya ichintu ichizapo nkani, umwakuti abantu bosi bala batakabe bakufikapo ukusita aswe.