Aba Galatiya 4 - IBAYIBOLO 2024

¹ Chicho nkung'anamula chakuti nanti umwana yuyo akwiza pakupyana ichilingo bo achili mwana munandi, atalekanitepo nu muzya, napapo mwenecho uwa mpyana yosi.

² Bo achili mwana munandi, balipo abasungilili na bakapitawa bamo babo bakumusungilila mupaka pakabalilo kako uwise akapimila.

³ Po naswe bulo, bo twe bana banandi tukaba bazya aba nyiho izya muchisu ichapasi.

⁴ Loli bo akabalilo kakwana, u Chala akatuma u Mwana wache uwakupapiwa mu mukolo, sona yuyo akapapiwa pasi pa Ndaghilo izya Mozesi,

⁵ ukuti abasatule abantu babo bali pasi pa Ndaghilo, umwakuti bangaba bana aba Chala.

⁶ Ukulanjizya ukuti amwe mwe bana bache, u Chala abatumila u Muzimu uwa Mwana wache mumoyo ghitu, u Muzimu yuyo akwitizya ukuti, “Wee Tata, wee Tata wane!”

⁷ Polelo ute we muzya, napo panandi, loli we mwana. Loli nanti we mwana, po u Chala ukwiza pakupyana ichilingo.

U Pabuli akubapasikizya aba Galatiya

⁸ Pakwanda bo mutamumenye u Chala, amwe mukaba mwe bazya aba bachala, babo bate bo bachala abanaloli.

⁹ Loli pakuti ilelo mumumenye u Chala pamo ukumanyikwa nu Chala, po bulibuli ukuti munyokele kunyiho izya chisu ichapasi zizyo zite ni mbombo, sona zizyo zite namaka? Nkimba mukulonda mubanje sona mwe bazya aba vintu vinivi?

¹⁰ Mukupaghula amezi ghamo, na masiku ghamo nu tubalilo tumo, sona na maka ghamo!

¹¹ Nkunyila ukuti lumo ukwiyula kwane kosi pakasi papinyu nkiyula pabulo.

¹² Mwee bakamu bane, nkubalaba ukuti mubanje ngati nene, pakuti nane bulo nkaba ngati mwemwe. Amwe mutanangiyepo nachimochimo.

¹³ Muzimenye ukuti chikaba chifukwa icha bubine, chicho nkalumbilila Amazyu Amiza kukwinyu akakwanda.

¹⁴ Napapo ububine bwane bukaba ngati po njelo kukwinyu, loli pope bulo mutakanjivya pamo ukunsamula, awe. Loli mukampokela ngati po ne wantumi uwa Chala, sona ngati po ne Kilisitu u Yesu umwenecho.

¹⁵ Po fwandi ubuhobosu bwinyu buli ko kwiyi ilelo? Ningabasimikizya ukuti nanti chikabaghilagha pakukolompola amaso ghinyu, ngali mwaghakolompola nukumpa.

¹⁶ Fwandi ilelo naba mulwani winyu pachifukwa ichakuti nababuzya ubwanaloli?

¹⁷ Abantu bala bengo nkani kukwinyu ukuti babadebe, loli ubwengo bwabo bute bwiza. Chicho bakulonda ko kubasabula kukwitu umwakuti mungaba bengo kukwabo.

¹⁸ Chizapo pakuba bengo nanti ifundo yache nyiza, sona nukuba bunubu bwila, kute kokuti pene papo indi poka namwe.

¹⁹ Bana bane baghaniwa, ngati bubavu ubwa mukolo pakusayiwa, nane bulo indi nu bubavu mupaka papo ubumi ubwa Kilisitu bwaba bwakufikapo mumwinyu.

²⁰ Nalondagha nkani ukuti ngali nabanga namwe losi ulu. Po ngali nandula akikalile, pakuti nkubapasikizya nkani.

Nizya chifwanikizyo icha Hagala nu Sala

²¹ Mumbuzye, amwe mwe mukulonda pakuba bazya aba Ndaghilo. Nkimba mutakwivwisya zizyo Indaghilo zikunena?

²² Pakuti Amasimbo ghakuti u Abulahamu akaba na bana abalumendo babili: Weka unyina akaba muzya, sona uyunji yula unyina akaba musatuke.

²³ Umwana wache yuyo unyina akaba muzya yula, akapapiwa ukuyana namumo abana bosi bakupapiliwa. Loli umwana uyunji yula, yuyo unyina akaba musatuke, akapapiwa ukwendela mwilayizyo ilya Chala.

²⁴ Ivintu ivi viyanite bulo ni chili, pakuti abakolo bakwimila ifingo zibili. Ulufingo loka lukufuma kwighamba ilya Sinayi nukupapa abana, babo bazya. Umukolo yunuyu we Hagala.

²⁵ Ilelo u Hagala akwimila ighamba ilya Sinayi muchisu icha Alebiya, lilyo likufwanikiziwa nakaya akakulu nkani aka Yelusalemu, pakuti umwene na bana bache bali mubuzya.

²⁶ Loli u Yelusalemu uwakumwanya musatuke, sona we mayi witu.

²⁷ Pakuti Amasimbo ghakuti, Hobokagha, we mukolo umughumba, we utakupapa, kolomoka nkani nukululutila mubuhobosu nkani awe we utakivwapo ububavu ubwakusayiwa. Pakuti abana aba mukolo yuyo bamuvwituka akwiza pakuba na bana abinji, ukuchila yuyo ali nu mulume.

²⁸ Ilelo bakamu bane, mwe bana bilayizyo ilya Chala ukuyana namumo u Yisaki akabela.

²⁹ Pakabalilo kalakala umwana yuyo akapapiwa ukuyana namumo abana bosi bakupapiliwa akamuvwima umwana yuyo akapapiwa na maka agha Muzimu Umuzelu. Umu momumo zibeleye mupaka nilelo bulo.

³⁰ Loli Amasimbo ghakuti choni? Ghakuti, “Umuchimbizye umukolo umuzya nu mwana wache bulo, pakuti umwana uwa mukolo umuzya atangapyana ichilingo pa mwana uwa mukolo umusatuke.”

³¹ Polelo bakamu bane, aswe tute twe bana aba mukolo umuzya yula, awe. Loli twe bana aba mukolo umusatuke yula.