Aba Galatiya 3 - IBAYIBOLO 2024

Ulwitiko pamo ukukonka Indaghilo

¹ Mwee ba Galatiya, mwe bapunganu! Nkimba wewenu akabalogha? Amwe mukabuziwa akiza nkani nizya bufwe ubwa Yesu Kilisitu pachipinjika ngati po mukachennya na maso ghinyu.

² Leka imbalalusye ichintu chene ichi: Nkimba mukapokela u Muzimu Umuzelu pakuzikonka Indaghilo, pamo pakusubila Amazyu Amiza ghagho mukivwa?

³ Fwandi mwe bapunganu nkani? Mukanda nu Muzimu Umuzelu, po ilelo mukumalila pakubombezya amaka agha buntu.

⁴ Nkimba vyosi vivyo mukakomana navyo vikaba vyabulo? Naloli vitakaba vyabulo.

⁵ Nkimba u Chala akabapa u Muzimu Umuzelu nukubomba ivyika mumwinyu pachifukwa ichakuti mukazikonka Indaghilo, pamo pachifukwa ichakuti mukasubila Amazyu Amiza ghagho mukivwa?

⁶ Pakuti nizya Abulahamu Amasimbo ghakuti, “U Abulahamu akamusubila u Chala, po u Chala akamunena pakuba mugholosu pantazi papache.”

⁷ Po ilelo mwivwisye ukuti abantu babo bakusubila, naloli bo bana ba Abulahamu.

⁸ Amasimbo ghakenezya zila ukuti u Chala akwiza pakubanena abantu babo bate ba Yuda pakuba bagholosu pantazi papache ukwendela mu lwitiko nukufumusizya zila Amazyu Amiza kwa Abulahamu ukuti, “Inko zyosi pachisu ichapasi nkwiza pakuzisaya ukwendela mumwako.”

⁹ Po abantu babo basubila, basayiliwa poka nu Abulahamu, yuyo muntu uwa lwitiko.

¹⁰ Abantu bosi babo bakusubila Indaghilo baghuniwe pakuti Amasimbo ghakuti, “Aghuniwanje umuntu wesi yuyo atakukonka vyosi vivyo visimbiwe mwibuku ilya Ndaghilo izya Mozesi.”

¹¹ Chili pabuzelu bulo ukuti nayumo umuntu yuyo u Chala akumunena pakuba mugholosu pantazi papache pakukonka Indaghilo, pakuti Amasimbo ghakuti, “Abantu abagholosu bakwiza pakuba nubumi ukwendela mu lwitiko.”

¹² Loli Indaghilo zitimite palwitiko, pakuti Amasimbo ghakuti, “Umuntu wesi yuyo akubomba zizyo Indaghilo izya Mozesi zikulonda akwiza pakuba nubumi.”

¹³ U Kilisitu akatutabula ku nguno iya Ndaghilo umwene pakuba nguno mubuzilo bwitu, pakuti Amasimbo ghakuti, “Mughuniwa umuntu wesi yuyo apayikiwe pikwi.”

¹⁴ Akatwabula aswe ukuti ulusayo lulo lukapeghiwa kwa Abulahamu lungiza pabantu babo bate ba Yuda ukwendela mwa Kilisitu u Yesu, umwakuti ukwendela mu lwitiko tungapokela u Muzimu Umuzelu yuyo akalayiziwa nu Chala.

Nizya Ndaghilo ni layizyo ilya Chala

¹⁵ Mwee bakamu bane, leka imbombezye ichifwanikizyo icha isiku ni siku: Nanti abantu babili bivwana ichintu choka nukufinga ulufingo, nayumo umuntu yuyo anganangannya chicho bivwana, pamo ukonjelezyako chimo.

¹⁶ U Chala akamulayizya u Abulahamu nu waluko lwache. Amasimbo ghatakunena ukuti, “Abaluko lwako,” chicho chitakung'anamula ukuti abantu abinji, awe. Loli ghakuti, “Sona nu waluko lwako,” chicho chikung'anamula ukuti umuntu weka yuyo we Kilisitu.

¹⁷ Chicho nkung'anamula chakuti u Chala akafingana nu Abulahamu nukumulayizya ukuti akwiza pakusungilila ilayizyo lyache. Indaghilo izya Mozesi, zizyo zikiza pisinda pamaka 430 zitanganangannya ulufingo ulwa Chala.

¹⁸ Pakuti nanti ichilingo ichakufuma kwa Chala chimite pa Ndaghilo, kokuti chitakwima sona pilayizyo. Loli u Chala muchisa chache akamupacho u Abulahamu ukwendela mwilayizyo lyache.

¹⁹ Polelo imbombo iya Ndaghilo yo yoni? Indaghilo zikonjeleziwako ukutulanjizya namumo ukunanga kubeleye mupaka uwaluko ulwa Abulahamu yula ize, yuyo u Chala akalayizya. Indaghilo zila zikapeghiwa na bantumi ukwendela mu mufusya u Mozesi.

²⁰ Loli nanti tukuti mufusya, kokuti pali imbazu zibili. Loli u Chala ali weka bulo.

Imbombo iya Ndaghilo

²¹ Nkimba Indaghilo izya Mozesi zikususannya na malayizyo agha Chala? Awe, napo panandi. Pakuti nanti abantu bakapokela Indaghilo izyakubapa ubumi ngali baneniwa pakuba bagholosu pamaso pa Chala pakuzikonka Indaghilo zilazila.

²² Loli Amasimbo ghakuti ichisu chosi ichapasi chili pasi pamaka agha mbibi, umwakuti chicho u Chala akalayizya ukwendela mu lwitiko mwa Yesu Kilisitu, chingapeghiwa ku bantu babo bakusubila.

²³ Loli bo ulwitiko ulu luchili pakwiza, tukaba ngati po twe bakayidi aba Ndaghilo, sona zikatwighalila mupaka papo ulwitiko ulu lwavumbuliwa.

²⁴ Polelo Indaghilo zikaba ngati po muzamba witu mupaka papo u Kilisitu akizila, umwakuti tunganeniwa pakuba bantu bagholosu pamaso pa Chala ukwendela mu lwitiko.

²⁵ Pakuti ilelo akabalilo aka lwitiko kakwana, tute sona pasi pabuzamba.

²⁶ Mwebosi mwe bana aba Chala pakwendela mulwitiko mwa Kilisitu u Yesu.

²⁷ Ukwendela mu lozyo mukamamatilana poka nu Kilisitu, sona mwivwika mwebene nubumi ubwa Kilisitu.

²⁸ Polelo patalipo ukulekana nakumokumo pakasi pa mu Yuda nu muntu yuyo ate mu Yuda, pakasi pa muzya nu muntu umusatuke, pakasi pa mwanavuli nu mukolo, pakuti mwebosi mwe muntu weka pakumamatilana poka nu Kilisitu u Yesu.

²⁹ Nanti mwe bantu aba Kilisitu, kokuti mwe baluko ulwa Abulahamu, sona mubaghiye pakupokela ichilingo chicho u Chala akalayizya.