Aba Filipi 2 - IBAYIBOLO 2024

Nizya kwiyisya ukwa Kilisitu nu bukulu bwache

¹ Umwakusita ukwilamwa, ubumi bwinyu mwa Kilisitu bukubapa amaka, sona ulughano lwache lukubakazya nukwefya ubogha. Mukuba bamoyo ghoka mu Muzimu Umuzelu, sona mukupelelana ichisa nukupazikizannya.

² Ichi cho chifukwa nkubalaba ukuti munhobosye ane pakwitikizya inyinong'ono nukughanana nukuba mumoyo ghoka na munyinong'ono.

³ Mutakabombaye nachimochimo nu moyo uwakwiyighana pamo uwakwituvya. Loli mubanje bakwiyisya, sona mubapimaye abamwinyu pakuba bapamwanya ukubachila amwe.

⁴ Umuntu wesi atakinong'onelaye ni vyache vyene, loli inong'onelaye nivya bantu abanji bulo.

⁵ Mubanje nu moyo ghugho u Kilisitu u Yesu akaba nagho.

⁶ Yuyo pakuba mukabele aka Chala atakipima mwene ukuti chikaba chapamwanya nkani ukufyuliwa ubwachala bwache.

⁷ Loli akavula ubuchindamu bwache, nukusenda akabele aka buzya, akanduka muntu.

⁸ Akiyisya mwene nukwivwila mupaka kubufwe bwache bubo akafwila pachipinjika.

⁹ Pachifukwa chinichi u Chala akamukwezya pamwanya nkani, akamwita itabwa lilyo lichilite na matabwa ghosi,

¹⁰ umwakuti ivipeliwa vyosi, ivya kumwanya na pachisu ichapasi, sona na kusi kuchisu ichapasi vifughame pakulichindika itabwa ilya Yesu.

¹¹ Umuntu wesi akwiza pakumufughamilila nukwitika nu mulomo wache ukuti u Yesu Kilisitu we Mwene umwakuti u Chala u Tata apokele ubuchindamu.

Ukulama ngati zyo nkozyo muchisu ichapasi

¹² Polelo baghaniwa bane, munyivwilaye nilelo bulo ukuyana namumo mwanyivwilagha bwila. Mutakanyivwile pene papo indi poka namwe. Po mwendelele pakufisya ubupoki bwinyu nubogha, sona nukutetema.

¹³ Pakuti we Chala yuyo akubomba imbombo mumwinyu ukuti mulondaye, sona nukuti mubombaye ukuyana nu bwighane bwache.

¹⁴ Bombagha bulo zyosi umwakusita ukwilumbusya pamo ukususya,

¹⁵ umwakuti mubanje bantu abazelu, sona abasita nongwa, nukuba bana aba Chala abasita chilema nachimochimo, babo bakwikala muchisu icha bantu abankulilo mbibi. Mubaghiye mulamaye muchisu ichapasi ukuyana namumo intondwa zikulamila kumwanya,

¹⁶ bo mukubapa amazyu agha bumi. Nanti mukubomba bunubu, nkwiza pakuba ni chifukwa icha kwituvikizya nacho pisiku ilya Kilisitu, pakuti chikwiza pakulanjizya ukuti ukwiyula kwane ni mbombo yane vitakaba vyabulo.

¹⁷ Loli napapo ibanda lyane likwiza pakukupuliwa pachakwiyipa chicho ulwitiko lwinyu lukupa kwa Chala. Polelo nkuhoboka nkani, sona nkusekela poka namwe.

¹⁸ Umwakuyana bulo, namwe mubaghiye pakuhoboka, sona musekelaye poka nane.

U Timoti nu Epafulodito

¹⁹ Nanti u Mwene u Yesu itikizya, nkusubila ukuti nkwiza pakubatumila u Timoti lunulu, umwakuti ningakaziwa pakwivwa mumo mukwikalila.

²⁰ Inte nawe nayumo umuntu uyunji yuyo akubinong'onela ubwiza.

²¹ Abantu abanji bosi bakwiyinong'onela nizyabo zyene, ukusita ukwinong'onela nizya Yesu Kilisitu.

²² Loli amwe muyimenye inkalo iya Timoti ukuti yikulanjizya ukuti nyiza. Muzimenye sona ukuti abomba poka nane ngati we mwana nu wise pambombo iyakufumusya Amazyu Amiza.

²³ Po nkusubila pakumutuma kukwinyu lunulu, bo namanya bulo mumo ivintu vikwiza pakunyendela.

²⁴ Sona nkusubila mwa Mwene ukuti nkwiza kukwinyu lunulu.

²⁵ Loli ninong'onagha ukuti chakulondiwa pakumutuma umukamu witu u Epafulodito kukwinyu, umubombi uwamwitu, sona umusilikali uwamwitu, intumi yinyu, yuyo mukamutuma pakunyavwa ane muvyakusobelwa vyane.

²⁶ Pakuti akusamba nkani pakubennya mwebosi, sona akuyimba nkani mumoyo pachifukwa ichakuti mukivwa ukuti akabinagha.

²⁷ Momumo akabina nkani, umwakuti akapalamilagha kubufwe. Loli u Chala akamupelela ichisa, sona atakamupelela ichisa mwene, loli akampelela ichisa nane bulo, umwakuti intakabe ni chitima nkani.

²⁸ Ichi cho chifukwa nalondagha nkani pakumutuma kukwinyu, ukuti muhoboke bo mwamwennya, sona ichitima chane po chikwiza pakumala.

²⁹ Po mumupokele nu buhobosu mwa Mwene. Abantu banaba, mubachindikaye,

³⁰ pakuti akaba papipi nukufwa pachifukwa ichakumubombela u Kilisitu. Akabika ubumi bwache pachulu ukuti anyavwe ivintu vivyo amwe mukapotwa pakunyavwa.