Aba Efeso 5 - IBAYIBOLO 2024

Nizya kwikala mu lukozyo

¹ Polelo mweghelelaye kwa Chala, pakuti mwe bana bache abaghaniwa.

² Mubanje nu lughano ukuyana namumo u Kilisitu akatughanila nukwiyipa ubumi bwache pakuba chabupi ichakununkila, sona ni chakwiyipa ichakumuhobosya u Chala.

³ Loli mumwinyu mutakabemo izya bwamalaya, pamo ubunyazu, pamo ubupafu, pakuti abantu abazelu aba Chala batangabomba ivintu vinivi.

⁴ Sona mutakanenaye ivyamasiku, nivya bupunganu, pamo ivyasunga, loli munenaye nizya kumupala u Chala.

⁵ Mumanye ichi: Umuntu wesi yuyo we malaya, pamo munyazu, pamo mupafu (kokuti muntu yuyo akwiputa ivifwani) atakwiza pakupyana ubumwene ubwa Kilisitu, sona nubwa Chala.

⁶ Mutakamwitikizye nayumo umuntu ukuti abazimbule na mazyu aghabupunganu, pakuti ivintu vinivi vyo vivyo vikwiza nu bukali pakasi pabantu babo batakumwivwila u Chala.

⁷ Polelo mutakamanyanaye nabo abantu banaba.

⁸ Namwe bulo mukabapo lumo muchisi, loli losi ulu muli mu lukozyo, pakuti mwe bantu aba Mwene. Polelo mwendaye ngati mwe bantu babo bakwikala mu lukozyo,

⁹ pakuti ivikomwa ivya lukozyo zyo zizyo zikwaghiwa muvintu vyosi vivyo vyiza, ni vigholosu, sona ni vyanaloli.

¹⁰ Muyezyanje pakubomba ivintu vivyo vikumuhobosya u Mwene.

¹¹ Mutakasendayepo ichigaba pavintu ivya muchisi vivyo vitakupa ivikomwa, loli mubavumbulaye pabuzelu.

¹² Pakuti chakukozya nkani isoni pakunena ivintu vivyo bakubomba kubusyefu.

¹³ Loli nanti vyosi vyavumbuliwa nulukozyo, vyosi vikwanda pakuboneka pabuzelu,

¹⁴ pakuti ulukozyo lo lulo lukulanjizya ichintu chosi pabuzelu. Cho chifukwa zikuneniwa ukuti, “Nyamuka awe we ughonite utulo, zyuka kubufwe, po u Kilisitu akwiza pakukulamila.”

¹⁵ Po muchebaye namumo mukwendela, mutakabanje ngati mwe bantu abasita mahala, loli mubanje mwe bantu abamahala.

¹⁶ Akabalilo kinyu kosi kabanje kakubombela imbombo, pakuti amasiku agha mabibi.

¹⁷ Polelo mutakabanje bapunganu, loli mubwivwisyanje ubwighane ubwa Mwene.

¹⁸ Sona mutakakolwanje nu vinyo pakuti ukukolwa kukupela ukunanganika. Loli mwizulaye nu Muzimu Umuzelu.

¹⁹ Mwangalilanaye na mazyu agha masalimo, ni nyimbo izyakumupala u Chala, sona ni nyimbo izya buzimu. Po mumwimbilaye u Mwene inyimbo nukumupala mumoyo ghinyu.

²⁰ Akabalilo kosi, mumupalaye u Tata u Chala pavintu vyosi mwitabwa ilya Mwene witu u Yesu Kilisitu.

Nizya bachi na balume

²¹ Sona amwe mwe mukumunyila u Kilisitu, mwivwanaye.

²² Mwee bachi mubivwilaye abalume binyu ukuyana na muno mukumwivwilila u Mwene.

²³ Pakuti umulume we mutu uwa muchi, umwakuyana bulo, wepe u Kilisitu we mutu uwa chipanga, ghugho gho mubili wache, sona yuyo we Mupoki uwa chipanga chilachila.

²⁴ Ngati mumo ichipanga chili pasi pa Kilisitu, umwakuyana bulo, bope abachi babanje pasi pa balume babo muvintu vyosi.

²⁵ Namwe mwe balume mubaghanaye abachi binyu ukuyana namumo u Kilisitu akachighanila ichipanga, nukwiyipa ubumi bwache pachifukwa icha chipanga chilachila.

²⁶ Akabomba zinizi ukuti achipaghulile ichipanga kwa Chala, bo achiswefya tasi pakuchisuka na mizi, sona na mazyu ghache.

²⁷ U Kilisitu akabomba zinizi ukuchiyanizya ichipanga kukwache umwakuti chibanje chipanga ichiza, chicho chite nakatonyelwa, na chicho chite na mankwinya, pamo akantu kamo akabibi, loli chizelu, sona chicho chite ni chilema nachimochimo.

²⁸ Umwakuyana bulo, bope abalume babaghanaye abachi babo ukuyana namumo baghaghaniye amabili ghabo. Umuntu wesi yuyo akumughana umuchi kokuti iyighanite mwene.

²⁹ Pakuti nayumo umuntu yuyo aghubengite umubili wache, loli akughulyesya nukughusungilila akiza ukuyana namumo u Kilisitu akubombela ni chipanga chache,

³⁰ pakuti aswe twe vigaba ivya mubili wache.

³¹ Pakuti Amasimbo ghakuti, “Pachifukwa ichi, umwanavuli akwiza pakumuleka uwise nu nyina nukumamatilana poka nu muchi wache, po babili aba bakwiza pakuba mubili ghoka. Bate bantu babili sona, loli mubili ghoka.”

³² Amazyu ghanagha ghakutuvumbulila izya kubusyefu zizyo zikunena nizya Kilisitu ni chipanga.

³³ Loli ghakunena sona nizya amwe: Umulume wesi amughanaye umuchi wache ukuyana namumo iyighaniye mwene, sona umuchi wesi amuchindikaye umulume.