Abalongi 8 - IBAYIBOLO 2024

Ukubapota aba Midiyani ukwabumalilo

¹ Isiku limo aba Efulayimu bakamulalusya u Gidiyoni bakati, “Nkimba choni chicho utakatwitizya, bo ukubuka pakulwa ubwite naba Midiyani?” Po bakamuchemela nkani.

² Loli u Gidiyoni akabamula akati, “Napapo mwakaba pakwiza, amwe mwabomba ivikulupo ukunchila. Ivintu vivyo amwe mwabomba mwe ba Efulayimu vikulupo ukuchila vivyo abaluko lwane ulwa Abiyezeli babomba.

³ U Chala akamubika u Olebu nu Zebu, abamwene babili aba Midiyani munyobe zyinyu. Nkimba ivintu vivyo nabomba viyanite na vivyo amwe mwabomba?” Bo u Gidiyoni anena zinizi amoyo ghabo ghakika pasi.

⁴ U Gidiyoni poka na bantu 300, babo akaba nabo bakafika palusoko ulwa Yolodani nukuloboka ulusoko lula. Napapo bakalita nkani, loli pope bulo bakendelela pakubachimbizya aba Midiyani bala.

⁵ Bo bafika mukaya akakulu aka Sukoti, u Gidiyoni akabalaba abantu aba mukaya mula akati, “Mubapeko abantu bane aba ivibama vimo. Abantu banaba balita nkani, indi pakumuchimbizya u Zeba nu Zalimuna, abamwene aba Midiyani.”

⁶ Loli amakambala agha mu Sukoti ghakamula ghakati, “Nkimba choni chicho tubape ivibama vimo abasilikali bako? Fwandi umulemite kale u Zeba nu Zalimuna?”

⁷ U Gidiyoni akamula akati, “Chiza bulo nanti u Mwene amubika u Zeba nu Zalimuna munyobe zyane, nkwiza pakubasyempa na mivwa agha bantolovu.”

⁸ Bo epako kulakula u Gidiyoni akabuka ku Penuweli pakulaba ivibama vimo. Loli bakamwamula ngati mumo bakamwamulila abantu aba mu Sukoti.

⁹ Po u Gidiyoni akababuzya abantu aba mu Penuweli akati, “Nanti nabwelako, sona napota ubwite, nkwiza pakuchimongolannya ichitembe chinyu ichi!”

¹⁰ U Zeba nu Zalimuna bakaba mu Kalikoli, poka na basilikali babo 15,000, abasilikali bosi abakubufumilo bwizuba, babo bakapona kubwite, pakuti abasilikali 120,000 bakafwa kubwite bula.

¹¹ Po u Gidiyoni akenda izila iyinji yiyo abendazila bakendaghamo kubufumilo bwizuba ubwa Noba nu Yogibeha, nukulwa ubwite naba Midiyani umwakuchenusya bulo.

¹² U Zeba nu Zalimuna babo bakaba bamwene babili aba Midiyani bakachimbila, loli u Gidiyoni akabachimbizya mupaka akabalema, po abasilikali babo bosi bakavulungana.

¹³ Bo u Gidiyoni umwana uwa Yowashi akubwelako kubwite, akenda izila iya chikwezya icha Helesi.

¹⁴ Kulakula akamulema umulumendo wamu Sukoti nukumulalusya amalalusyo. Po umulumendo yula akamusimbila u Gidiyoni amatabwa agha makambala 77, sona na basongo aba mu Sukoti.

¹⁵ U Gidiyoni akaghabuzya amakambala agha mu Sukoti akati, “Ennya namulema u Zeba nu Zalimuna babo mukansamulilaghapo ukuti, ‘Fwandi umulemite kale u Zeba nu Zalimuna? Nkimba choni chicho tubape ivibama vimo abasilikali bako abalite?’ ”

¹⁶ Po u Gidiyoni akabalema abasongo aba mu kaya aka Sukoti, nukubasyempa na mivwa agha bantolovu.

¹⁷ Akamongolannya sona ichitembe mu Penuweli nukubaghogha abantu bosi mukaya akakulu kalakala.

¹⁸ Po u Gidiyoni akamulalusya u Zeba nu Zalimuna akati, “Abantu babo mukabaghogha mu Taboli, nkimba bakabonekagha bulibuli?” Bakamula bakati, “Bosi bakayana bulo nawe, sona umuntu wesi akabonekagha ngati bana aba bamwene.”

¹⁹ U Gidiyoni akamula akati, “Balabala bakaba bawamwitu, abana aba mayi wane. Nkulapa pamaso pa Mwene umumi ukuti nanti mutakabaghoghagha, nane bulo ngali intabaghoghite.”

²⁰ Po akamubuzya u Yeteli umwana wache ukatote umulumendo akati, “Baghoghe!” Loli u Yeteli yula atakawesa upanga wache, pachifukwa ichakuti akaba achili mulumendo, po akanyilagha.

²¹ U Zeba nu Zalimuna bakamubuzya u Gidiyoni bakati, “Zagha utughoghe wemwenecho. Pakuti awe we muntu songo, sona uli na maka.” Palapala u Gidiyoni akamughogha u Zeba nu Zalimuna nukusenda ivyakwibonesekezya akiza vivyo vikaba musingo izya ngamila zyabo.

²² Po aba Izilayeli bakamubuzya u Gidiyoni bakati, “Awe poka nu mwana wako, sona na baluko lwako, mutulaghilaye, pachifukwa ichakuti mwatupoka munyobe izya ba Midiyani.”

²³ U Gidiyoni akabamula akati, “Ane ntakwiza pakubalaghila, wepe umwana wane atakwiza pakubalaghila, awe. Loli u Mwene weyuyo akwiza pakubalaghila.”

²⁴ Loli u Gidiyoni akababuzya akati, “Imbalabeko ichintu choka bulo. Umuntu wesi ampe indelebele yoka bulo pazizyo mukabafyula abalwani binyu.” (Lukaba lwiho lwaba Ishimayeli pakuvwala indelebele izya golide.)

²⁵ Abantu bala bakamula bakati, “Twitika, tukwiza pakukupayo.” Po bakatenga umwenda, sona umuntu wesi akasumbilapo indelebele yoka bulo pazizyo bakabafyula abalwani babo.

²⁶ Ubung'wamu ubwa ndelebele izya golide zizyo akalaba bukakwana amakilogalamu 20, ukusita ukubelengelako ivyakwibonesekezya akiza ivya musingo izya ngamila, na mambo, sona na menda amachesamile, ghagho abamwene aba Midiyani bakavwalagha.

²⁷ U Gidiyoni akamubombezya ugolide yula pakupanga ichifwani nukuchibika mukaya akakulu nkani aka Ofula, kako kakaba kaya kache. Po aba Izilayeli bosi bakanda pakuchiputa kulakula mubuzilo ubwa Chala, po chikanduka chipingo kwa Gidiyoni na bamunyumba yache.

²⁸ Aba Izilayeli bakabapota aba Midiyani, po aba Midiyani batakaboghofya sona aba Izilayeli. Pakabalilo aka Gidiyoni ichisu chikaba mumutende amaka 40.

Ubufwe ubwa Gidiyoni

²⁹ U Gidiyoni umwana uwa Yowashi akabwela kunyumba pakwikala.

³⁰ U Gidiyoni akaba na bana 70, pachifukwa ichakuti akaba na bachi abinji.

³¹ Umuchi wache umuzya akikalagha mu Shekemu, yuyo akapapa nawe umwana umulumendo nukumwita ukuti we Abimeleki.

³² U Gidiyoni umwana uwa Yowashi akafwa bo aghosipa nkani, po bakamusyila mwipumpa ilya wise u Yowashi mu Ofula, mukaya akakulu nkani aka Abiyezeli.

³³ Bo u Gidiyoni afwa bulo, aba Izilayeli batakaba basubiliwa kwa Chala. Po bakamusimika u Baala Beliti pakuba we chala wabo.

³⁴ Aba Izilayeli bakamuluvya u Mwene u Chala wabo, yuyo akabapoka munyobe izya balwani babo kunkuto zyosi.

³⁵ Aba Izilayeli bala batakabapelela ichisa abamunyumba iya Yelubi Baala, (kokuti u Gidiyoni) pachifukwa icha bwiza bosi bubo u Gidiyoni akababombela.