Abalongi 7 - IBAYIBOLO 2024

U Gidiyoni akubapota aba Midiyani

¹ Po u Yelubi Baala, (kokuti u Gidiyoni), poka na basilikali bache bosi bakalamusya pandabindabi nkani nukuzenga ivisakasa vyabo papipi ni mbwibwi iya Halodi. Bope aba Midiyani bakazenga ivisakasa vyabo kumitu mwikombe papipi ni ghamba ilya Mole.

² U Mwene akamubuzya u Gidiyoni akati, “Abantu babo uli nabo binji nkani ukuti imbabike aba Midiyani munyobe zyabo, lumo aba Izilayeli bangituvya ukuti bapota ubwite na maka ghabo.

³ Po ufumusye ku bantu uti, ‘Umuntu wesi yuyo ali nubogha, abwelaye nukwepapo pighamba ilya Giliyadi pano.’ ” Po abantu 22,000 bakabwela, loli abantu 10,000 bakasyalikila palapala.

⁴ U Mwene akamubuzya u Gidiyoni akati, “Pope bulo abantu banaba binji nkani. Bukagha nabo kumizi, po ane nkwiza pakubasekesa mubuzilo bwako. Nanti nkuti, ‘Uyu abukaye poka nawe,’ umuntu yulayula abukaye poka nawe. Loli nanti nkuti, ‘Uyu atakabukaye poka nawe,’ umuntu yulayula atakabukaye poka nawe.”

⁵ Po u Gidiyoni akabuka na bantu bala kumizi kula. Kulakula u Mwene akamubuzya akati, “Ubasabule abantu babo bakukapila amizi ngati mbwa, loli abantu bosi babo bakang'wela amizi bo bafughamiye, bope babe pabene.”

⁶ Abantu 300 bakakapila bulo. Loli abanji bosi bakang'wela amizi bo bafughamiye.

⁷ U Mwene akamubuzya u Gidiyoni akati, “Nkwiza pakukupoka nukubabika aba Midiyani munyobe zyako pakubombezya abantu 300 banaba, babo bakakapila bulo. Loli ubabwezye abantu abanji bosi, umuntu wesi kunyumba yache.”

⁸ Po u Gidiyoni akababwezya aba Izilayeli abanji bosi bala, loli abantu 300 bakasyalikila poka nawe, nukusenda ivyakulya na mapati agha bantu babo bakabwela. Pakabalilo kalakala aba Midiyani bakazenga ivisakasa vyabo muntende mwikombe.

⁹ Ubusiku bulabula u Mwene akamubuzya u Gidiyoni akati, “Lamusya, kalwe ubwite naba Midiyani muvisakasa vyabo, pakuti nababika munyobe zyako.

¹⁰ Nanti ukunyila pakulwa nabo ubwite, bukagha poka nu wambombo wako u Pula

¹¹ nukuteghelezya zizyo abantu banaba bakunena. Panapo ukwiza pakujimba pakulwa nabo ubwite.” Po u Gidiyoni poka nu wambombo wache u Pula, bakabuka kubumalilo ubwa visakasa.

¹² Aba Midiyani, naba Amaleki, poka na bantu abanji bosi abakubufumilo bwizuba bakazenga ivisakasa vyabo mwikombe. Abantu banaba bakasata bulo ngati we kanta, sona ingamila zyabo zikaba sita kubelengiwa ngati musesenga uwa mulubazu ulwanyanja.

¹³ Bo u Gidiyoni afika bulo, akamwivwa umuntu yumo akumupangila umumanyani wache ichilota chache. Umuntu yula akati, “Ichibama icha busu ubwa mapemba chikabungulukila muvisakasa ivya ba Midiyani nukukoma ichisakasa na maka nkani, umwakuti ichisakasa chila chikawa pasi lambalala.”

¹⁴ Umumanyani wache yula akamwamula akati, “Ichintu chinichi chitangaba chintu bulo awe, loli wepanga uwa Gidiyoni umwana uwa Yowashi, umu Izilayeli yula. U Chala ababika aba Midiyani, poka na basilikali bosi munyobe zyache.”

¹⁵ Bo u Gidiyoni ivwa ichilota chila sona ni ching'anamulo chache, akamwiputa u Chala. Akanyokela kuvisakasa ivya ba Izilayeli nukubabuzya ukuti, “Nyamuka! U Mwene ababika aba Midiyani munyobe zyinyu.”

¹⁶ U Gidiyoni akabagaba abantu 300 bala mutubukatila tutatu, nukumupa umuntu wesi ipati ni sonta, yiyo yikaba ni chikoka mukasi.

¹⁷ Akababuzya akati, “Munyennyanje, sona mubombaye ngati mumo nkubombela. Nanti nafika kubumalilo ubwa visakasa, namwe bulo mubombaye vivyo nkubomba.

¹⁸ Nanti ane, na bantu babo bali poka nane tukulizya amapati ghitu, po namwe bulo mulizyanje amapati ghinyu, sona mukolomokaye mutinji, ‘Tukumulwila u Mwene sona nu Gidiyoni!’ ”

¹⁹ Po u Gidiyoni poka na bantu 100 babo akaba nabo bakafika kubumalilo ubwa visakasa pakasikasi pabusiku, bo abalindilili bapokelana bulo. Po bakalizya amapati ghabo nukuzifwantannya isonta zizyo bakanyamula munyobe zyabo.

²⁰ Utubukatila tosi tutatu tula tukalizya amapati nukuzifwantannya isonta zila. Bakalema ivikoka kunyobe zyabo izyamongo, sona kunyobe zyabo indilo bakalema amapati ghagho bakalizyanga, nukukolomoka ukuti, “Tukumulwila ubwite u Mwene sona nu Gidiyoni!”

²¹ Bo umuntu wesi ali pabuzilo bwache umwakuzyungulila ivisakasa vila, aba Midiyani bosi bakachimbila muvisakasa, bo bakulila.

²² Bo abantu 300 bala balizya amapati ghabo, u Mwene akabavulungannya abalwani babo umwakuti bakanda pakulwa benebene pakubombezya upanga. Abasilikali bala bakachimbilila ku Beti Shita kupipi nakaya aka Zelela mupaka kumpaka iya Abeli Mehola papipi nu Tabati.

²³ Aba Izilayeli abaluko ulwa Nafutali, na baluko ulwa Asheli, sona na baluko ulwa Manase bakitiziwa, po bosi bakabachimbizya aba Midiyani bala.

²⁴ U Gidiyoni akazituma intumi muchisu chosi icha mumaghamba icha Efulayimu pakubalamula abantu ukuti, “Zagha tulwe ubwite naba Midiyani nukughafyula amaloboko agha lusoko ulwa Yolodani mupaka ku Beti Bala.” Po aba Efulayimu bosi bakabungana poka nukufyula amaloboko agha lusoko ulwa Yolodani mupaka ku Beti Bala.

²⁵ Bakamulema sona u Olebu nu Zebu, abamwene babili aba ba Midiyani. U Olebu bakamughoghela pibwe ilya Olebu, sona u Zebu wepe bakamughoghela pabuzilo ubwakufinyilamo amampesya ubwa Zebu. Bakendelela pakubachimbizya aba Midiyani, po bakiza nu mutu uwa Olebu, nuwa Zebu kwa Gidiyoni, yuyo akaba kwisila ilya lusoko ulwa Yolodani.