Abalongi 6 - IBAYIBOLO 2024

Nizya Gidiyoni

¹ Aba Izilayeli bakabomba sona ivintu vivyo vitakamuhobosya u Mwene, po akababika munyobe izya ba Midiyani amaka seveni.

² Aba Midiyani bakaba bantu abamaka nkani ukubachila aba Izilayeli, umwakuti aba Izilayeli bakavwamagha mumpako nukuzenga amalinga mumaghamba.

³ Akabalilo kosi nanti aba Izilayeli babyala imbeyu, aba Midiyani naba Amaleki poka na bantu abakubufumilo bwizuba bakizagha nukulwa nabo ubwite.

⁴ Bakazengagha ivisakasa vyabo muchisu chila, nukunangannya imbeyu zyosi mupaka ku Gaza. Bakasenda ing'ozi ni ng'ombe ni mpunda zyosi, sona batakabalekela aba Izilayeli ichintu nachimochimo.

⁵ Aba Midiyani bakizagha ni vitekwa vyabo ni visakasa ngati we kanta, umwakuti abantu bala bakaba basita ukubelengiwa, poka ni ngamila zyabo. Bakiza nukuchinangannya ichisu chila.

⁶ Aba Midiyani bakabapelela aba Izilayeli ubupina, umwakuti bakamulilila u Mwene ukuti abavwe.

⁷ Bo aba Izilayeli bamulilila u Mwene pachifukwa icha ba Midiyani,

⁸ u Mwene akabatumila umulaghuzi, yuyo akati, “U Mwene u Chala uwa ba Izilayeli ati, ‘Nkabefya mubuzya mu Ijiputi.’

⁹ Nkabapoka munyobe izya ba Ijiputi, sona na munyobe izya bantu bosi babo bakabayivya. Nkabachimbizyamo muchisu chila pamaso papinyu, po nkabapa amwe ichisu chabo.

¹⁰ Nkababuzya nkati, ‘Ane ne Mwene u Chala winyu. Mutakabiputaye abachala aba ba Amoli muchisu chicho mukwikalamo.’ Loli amwe mutakanteghelezya.”

¹¹ Uwantumi uwa Mwene akika nukwikala mukazundila mwikwi ilya mupandapanda, mukaya aka Ofula lilyo likaba lya Yowashi umu Abiyezeli. Kulakula umwana uwa Gidiyoni akakomagha ingano mubuzilo ubwakufinyilamo amampesya, bo avwamite umwakuti aba Midiyani batakamwennye.

¹² Palapala uwantumi uwa Mwene akamubonekela u Gidiyoni nukuti, “U Mwene ali nawe, we muntu umujimvu sona nu wamaka.”

¹³ U Gidiyoni akamula akati, “Wee mwene wane, loli nanti u Mwene ali naswe, nkimba choni chicho ivintu vyosi vinivi vyatuwila? Nkimba vili ko kwiyi iviswigho vyosi vivyo abanyenya bitu bakatubuzya bo bakuti, ‘Nkimba te wewe Mwene we ukatwefyamo mu Ijiputi?’ Loli ilelo u Mwene atulekite nukutubika munyobe izya ba Midiyani.”

¹⁴ U Mwene akaghalabuka nukumulamula ukuti, “Bukagha na maka ghako ubapoke aba Izilayeli munyobe izya aba Midiyani. Nkimba te nene nkukutuma?”

¹⁵ U Gidiyoni akamulalusya u Mwene akati, “Nkimba ningabapoka bulibuli aba Izilayeli? Pakuti abamunyumba iya tata wane bo badedebazu nkani pakasi pa baluko ulwa Manase, sona ne munandi nkani munyumba iya tata wane.”

¹⁶ U Mwene akamwamula akati, “Nkwiza pakuba nawe, po ukwiza pakubapota aba Midiyani bosi.”

¹⁷ U Gidiyoni akamula akati, “Nanti wahoboka nane, umpe ichimanyilo ichakulanjizya ukuti naloli wewe ukunena nane.

¹⁸ Nalamba utakepepo pano mupaka inyokele sona pakubika ichakwiyipa chane pamaso papako.” Po u Mwene akamula akati, “Nkwiza pakukulindilila mupaka unyokeko.”

¹⁹ U Gidiyoni akinjila munyumba yache nukuyannya umwana uwa mbuzi, sona akabombezya amakilogalamu 10 agha busu nukupiya ivibama vivyo vite ni chilungo. Akabika inyama muchidudunga, akapungulila musonta umusuni uwa nyama yila. Po Gidiyoni akiza navyo vyosi vila nukuvibika pamaso pa Mwene mukazundila mwikwi ilya mupandapanda.

²⁰ Uwantumi uwa Chala akamubuzya akati, “Senda inyama ni chibama chicho chite ni chilungo nukuvibika pilyalabwe ili, upungulile umusuni pamwanya pavinivi.” Po u Gidiyoni akabomba vivyo akabuziwa.

²¹ Uwantumi uwa Mwene akasenda indisa nukupalamasya nayo inyama yila poka ni chibama chicho chite ni chilungo. Panapo na panapo umoto ghukaka pilyalabwe pala pakulungulizya inyama poka ni chibama chicho chite ni chilungo chila. Po uwantumi uwa Mwene akazyebeluka bulo.

²² Bo u Gidiyoni azyaghannya ukuti akaba wantumi uwa Mwene, akakolomoka akati, “Wee Mwene Uwamaka Ghosi! Namwennya uwantumi uwa Mwene namaso!”

²³ Loli u Mwene akamubuzya akati, “Umutende ghubanje nawe! Utakanyilaye, utakwiza pakufwa.”

²⁴ Po u Gidiyoni akamuzengela ichighemo u Mwene pabuzilo bulabula nukuchita ukuti, “U Mwene we Mutende.” Ichighemo ichi chichili chilimo mu Ofula, mukaya akakulu nkani aka Abiyezeli mupaka nilelo bulo.

²⁵ Ubusiku bulabula u Mwene akamubuzya u Gidiyoni akati, “Senda inkambaku iyabubili iya maka seveni pamudimo uwa ghuso. Uchimongolannye ichighemo, chicho ughuso akamuzengela u Baala, nukuchidumulannya ichifwani icha Ashela chicho chili papipi ni chighemo chila.

²⁶ Po umuzengele u Mwene u Chala wako ichighemo ichiza pano. Usende sona inkambaku iyabubili nukuyibika ukuti chibanje chakwiyipa ichakocha pakubombezya inkwi izya chifwani icha Ashela chila.”

²⁷ U Gidiyoni akabasenda abambombo wache 10 nukubomba zizyo u Mwene akamubuzya. Pachifukwa ichakuti akabanyilagha abamunyumba yache, sona na bantu aba mukaya akakulu kala, atakachibomba pamusanya, loli akachibomba pabusiku.

²⁸ Pandabindabi bo abantu aba mukaya kala balamusya, bakagha ukuti ichighemo icha Baala chamongoliwa, sona ichifwani icha Ashela chadumuliwa. Bakagha sona ukuti inkambaku iyabubili yila yabikiwa ukuti chibanje chakwiyipa ichakocha pachighemo ichipya bulo.

²⁹ Po bakanda pakulalusannya bakati, “Nkimba wewenu abomba bunubu?” Bo babuzikizya akiza bakagha ukuti akaba we Gidiyoni umwana uwa Yowashi, weyuyo akabomba bulabula.

³⁰ Po abantu aba mukaya kala bakamubuzya u Yowashi bakati, “Mufumye kuzi kuno umwana wako. Aghoghiwanje pachifukwa ichakuti amongolanizye ichighemo icha Baala nukuchidumulannya ichifwani icha Ashela chicho chikaba papipi ni chighemo.”

³¹ Loli u Yowashi akabamula abantu abakalale, babo bakamuzyungulila akati, “Nkimba kokuti amwe mukumulongela u Baala? Fwandi mukulonda pakumupoka? Umuntu wesi yuyo akumwimila, aghoghiwanje pandabindabi! Nanti naloli u Baala we chala, iyimile mwene bo umuntu akumongolannya ichighemo chache.”

³² Po ukwandila pisiku lilalila bakamwita u Gidiyoni ukuti we Yelubi Baala, pachifukwa ichakuti akamongolannya ichighemo chache.

³³ Aba Midiyani, naba Amaleki bosi, sona na bantu abakubufumilo bwizuba bakapanga akabukatila koka nukuloboka ulusoko ulwa Yolodani pakuzenga ivisakasa vyabo mwikombe ilya Yezileli.

³⁴ Umuzimu uwa Mwene ghukamwinjila u Gidiyoni, po akalizya ipati pakubitizya aba Abiyezeli ukuti bamukonke.

³⁵ Akazituma intumi muchisu chosi icha Manase pakubitizya ukuti balwe ubwite. Akabitizya sona aba Asheli naba Zebuloni, sona naba Nafutali, po bope bakabuka pakukomana nabo.

³⁶ U Gidiyoni akamubuzya u Chala akati, “Nanti ungabapoka aba Izilayeli pakubombezya inyobe yane ukuyana namumo wandayizizya,

³⁷ po ane nkwiza pakubika ameya agha ng'ozi pabuzilo ubwakukomelapo inyinulo. Nanti inganda yawa pameya ghene, sona nanti ichisu chosi chumizu bulo, po nkwiza pakumanya ukuti naloli ukwiza pakubapoka aba Izilayeli pakubombezya inyobe yane ukuyana namumo ukanenela.”

³⁸ Po chikabombiwa bunubu. Pandabindabi bo u Gidiyoni alamusya, akaghafinya ameya ghala nukuyizuzya isonta ni nganda yila.

³⁹ U Gidiyoni akanena sona kwa Chala akati, “Utakankalalilaye. Leka nkulabe sona ichintu choka bulo. Unyitikizye ukuti injezye ameya koka bulo. Pakabalilo kanaka pameya ghene pabanje ubumizu, loli pachisu pawanje inganda.”

⁴⁰ Ubusiku bulabula u Chala akachibomba bunubu, pameya pakaba ubumizu, loli pachisu pakawa inganda.