Abalongi 5 - IBAYIBOLO 2024

Ulwimbo ulwa Debola nu Balaki

¹ Pisiku lilalila u Debola nu Balaki umwana umulumendo uwa Abinowamu bakimbagha ulwimbo ulu:

² “U Mwene apaliwanje! Aba Izilayeli bakaba nu lweke pakulwa ubwite, naloli abantu bakiyipa.

³ Mwee bamwene, ivwa kuno! Teghelezya kuno, mwe balaghili! Nkwiza pakwimba ulwimbo, pakumupala u Mwene, u Chala uwa ba Izilayeli.

⁴ Wee Mwene, bo wepapo pighamba ilya Seyili, sona bo wiza muchisu icha Edomu, ichisu ichapasi chikaneng'ena, sona ivula yikatima. Eee, amabingu ghakasunguluka kumwanya nukupungulila amizi.

⁵ Amaghamba ghakaneng'ena pamaso pa Mwene uwa Sinayi, pamaso pa Mwene u Chala uwa ba Izilayeli.

⁶ “Mumasiku agha Shamugali umwana uwa Anati, mumasiku agha Yaweli, abendezya ingolo batakadumusannyanga muchisu chinichi. Abendazila bakapambata bulo izila.

⁷ Mutwaya utwa Izilayeli abantu bakachimbilamo, utwaya tunutu tukaba visami mupaka papo awe Debola ukiza, ukafika ngati we mayi mu Izilayeli.

⁸ Bo abantu basala abachala abanji, mukaya akakulu nkani mukabamo ubwite. Pakasi pabantu 40,000 mu Izilayeli, patakabapo nayumoyumo umuntu, yuyo akanyamula ingulu pamo impalala.

⁹ Umoyo wane ghuli pa basongo aba basilikali ababwite aba Izilayeli, nkubinong'onela nkani abantu babo bakiyipa bene. U Mwene apaliwanje!

¹⁰ Amwe mwe mukwelite pampunda iswepu, amwe mwe mwikaye pachakwikalapo pampunda sona amwe mwe mukwenda mumusebo, mubapangilaye abanji.

¹¹ Teghelezya ichongo icha bimbi paviziba ivya mizi. Bakubapangila abanji nizya ubupoti ubwa Mwene, nizya ubupoti ubwa ba Izilayeli. “Po abantu aba Mwene bakabungana kulakula, abakufuma mutwaya twabo utukulu nkani.

¹² ‘Lamusya! Debola, lamusya! Longolela! Imba ulwimbo, longolela! Endelela we Balaki, umwana uwa Abinowamu, longozya abantu bako babo ukabalema kubwite!’

¹³ “Po abantu babo bakapona kubwite, bakiza ku balongozi babo. Abantu aba Mwene bakiza pamaso papache pakumulwila ubwite.

¹⁴ Bamo bakafuma mu Efulayimu babo bakaba aba mu Amaleki U Benjamini akaba poka na basilikali babo bakakukonka, sona abakapitawa aba mu Makili bakiza. Abantu bakiza ukufuma mu Zebuloni, babo bakanyamula indisa iya songo uwa basilikali.

¹⁵ Abalongozi aba mu Isakala bakaba poka nu Debola. Eee, aba Isakala bakaba poka nu Balaki, bo bakumukonka mupaka kwikombe. Loli aba Lubeni bakagabinkana, pachifukwa ichakuti batakamanya ichakubomba ichenecho.

¹⁶ Nkimba choni chicho bakasyalikila pakudima ing'ozi zyabo? Pakuteghelezya bo abadimi bakusokola ing'ozi zyabo? Eee aba Lubeni bakagabinkana, pachifukwa ichakuti batakamanyagha ichakubomba ichenecho.

¹⁷ Aba Giliyadi bakasyalikila kwisila ilya lusoko ulwa Yolodani. Bope aba Dani, fwandi choni chicho bakasyalikila papipi na mabwato ghabo amakulu nkani? Aba Asheli bakasyalikila mulubazu lwanyanja, nukwikala bulo mulamula.

¹⁸ Loli aba Zebuloni bakabika ubumi bwabo pachulu pakulwa ubwite. Bope aba Nafutali bakabomba bunubu pakulwa ubwite pamwanya pamaghamba.

¹⁹ “Abamwene bakiza nukulwa ubwite. Abamwene aba ba Kenani bakalwa ubwite pa Tanaki mulubazu ulwa lusoko ulwa Megido. Loli batakasendapo nayumoyumo usiliva, sona batakafyulapo nachimochimo ichintu.

²⁰ Zyope intondwa zikalwa ubwite kumwanya, bo zikudumusannya mumwanya pakulwa ubwite nu Sisela.

²¹ Ulusoko ulwa Kishoni lukababukizya, ulusoko ulwakwizula ulwa Kishoni lula. Endagha wee moyo wane, banga namaka!

²² “Po inyayo izya falasi zikivwika nu mulinto umukulu nkani. Ifalasi zila zikaba palubilo nkani, zikachimbilagha nkani.

²³ “Uwantumi uwa Mwene akati, ‘Umughune u Melozi. Ubaghune nkani abantu babo bakwikala mulamula. Abene batakiza pakumwavwa u Mwene, pakumwavwa u Mwene pakulwa ubwite na basilikali abamaka.’

²⁴ “U Yaweli umuchi uwa Hebeli umu Keni, abanje mukolo umusayiwa nkani ukubachila abakolo bosi, babo bakwikala muvisakasa.

²⁵ U Sisela akalaba amizi aghakung'wela, loli umukolo yula akamupa ulukama. Akamupa amafuta agha lukama mulubako ulwamuchizi.

²⁶ Akasenda akakwi kunyobe yoka, sona ni nyondo iya fundi kunyobe indilo. Akamukoma nayo u Sisela, nukumutizannya umutu wache. Akamutiza nukumulasa kumutu.

²⁷ U Sisela akatenguka nukuwa pasi akatenguka nukuwa pasi munyayo izya Yaweli. Akatenguka nukuwila munyayo zyache akawa pasi nukufwila palapala.

²⁸ “Unyina uwa Sisela akananamizya pibwindo akati, ‘Nkimba choni chicho ingolo yache iya bwite yikukaba pakwiza? Nkimba choni chicho ifalasi zyache zikukaba pakubwela?’

²⁹ Umukolo yumo uwa mahala nkani akamwamula, sona wepe akiyamula mwene akati,

³⁰ ‘Lumo bakugabana vivyo bafyula kubwite, umukolo weka pamo babili ukumupa umusilikali weka. Lumo bakumugabila u Sisela amenda amatonte, na menda aghakulabiwa akiza agha musingo yane ne mwene umukolo.’

³¹ “Wee Mwene, abalwani bako bosi bazimile bunubu. Loli abamanyani bako balamaye ngati mumo izuba likulamila, bo likufuma.” Po muchisu chila mukabamo umutende amaka 40.