Abalongi 4 - IBAYIBOLO 2024

Nizya Debola nu Balaki

¹ Bo u Ehudi afwa, aba Izilayeli bakabomba sona ivintu ivibibi vivyo vitakamuhobosya u Mwene.

² Po u Mwene akababika munyobe izya Yabini u mwene uwa ba Kenani yuyo akalaghilagha mukaya akakulu nkani aka Hazoli. Usongo uwa basilikali bache akaba we Sisela, yuyo akikalagha mu Halosheti Hagoyimu.

³ U Yabini akaba ni ngolo izya bwite izya chela 900, sona akabayivya nkani aba Izilayeli amaka 20, po aba Izilayeli bakamulilila u Mwene ukuti abavwe.

⁴ U Debola umulaghuzi umukolo, akaba muchi uwa Lapidoti, sona akaba mulongozi uwa ba Izilayeli pakabalilo kalakala.

⁵ U Debola akikalagha mukazundila mwikwi ilya mabale, lilyo likaba pakasikasi pa kaya aka Lama naka Beteli, muchisu icha mumaghamba icha Efulayimu. Po aba Izilayeli bakabukagha kulakula ninongwa zyabo.

⁶ Isiku limo u Debola akamutumila amazyu u Balaki umwana uwa Abinowamu, uwamu Kedeshi muchisu icha Nafutali aghakuti, “U Mwene u Chala uwa ba Izilayeli akukulamula akuti, ‘Senda aba Nafutali 10,000, naba Zebuloni nukubuka nabo pighamba ilya Taboli.

⁷ Ane nkwiza pakumuzimbula u Sisela usongo uwa basilikali aba Yabini ukuti akomane namwe palusoko ulwa Kishoni poka ni ngolo zyache izya bwite na basilikali bache, po ane nkwiza pakumubika munyobe zyinyu.’ ”

⁸ U Balaki akamwamula u Debola akati, “Nanti ukubuka nane, nkwiza pakubuka, loli nanti utakubuka nane, ntakwiza pakubukako.”

⁹ U Debola akamwamula akati, “Chiza bulo, nkwiza pakubuka nawe, loli utakwiza pakupokelapo umuchizi, pachifukwa ichakuti u Mwene akwiza pakumubika u Sisela munyobe izya mukolo.” Po Debola akanyamuka nukubuka nu Balaki ku Kedeshi.

¹⁰ Kulakula u Balaki akababungannya poka aba Zebuloni, naba Nafutali. Po abantu 10,000 bakamukonka, sona wepe u Debola akabuka poka nawe.

¹¹ Pakabalilo kalakala u Hebeli umu Keni yumo akepapo pakasi paba Keni abanji, babo bakaba baluko ulwa Hobabu umukoyi uwa Mozesi, nukuzenga ichisakasa chache papipi nikwi ilya pandapanda mu Zananimu, papipi nakaya aka Kedeshi.

¹² Bo bamubuzya u Sisela ukuti u Balaki umwana uwa Abinowamu akwela kwighamba ilya Taboli,

¹³ u Sisela akazibungannya poka ingolo zyache zyosi izya bwite izya chela 900, poka na bantu bosi babo bakaba nawe bakepako ku Halosheti Hagoyimu nukubuka kulusoko ulwa Kishoni.

¹⁴ U Debola akamulamula u Balaki akati, “Bukagha! Ili lyo lisiku lilyo u Mwene akwiza pakumubika u Sisela munyobe zyako. U Mwene alongoleye kale muntazi mumwako?” Po u Balaki akika pighamba ilya Taboli, sona abantu 10,000 bakamukonka.

¹⁵ Bo u Balaki alemiwa poka na basilikali bache u Mwene akamuvulungannya u Sisela poka ni ngolo zyache zyosi izya bwite, sona na basilikali bache bosi. U Sisela akika mungolo yache yila nukuchimbila pasi.

¹⁶ Loli u Balaki akazichimbizya ingolo izya bwite zila poka na basilikali mupaka ku Halosheti Hagoyimu. Abasilikali bosi aba Sisela bakaghoghiwa nupanga, sona atakabapo nayumoyumo umuntu uwakupona.

¹⁷ Loli u Sisela akachimbila pasi mupaka ku chisakasa icha Yaweli umuchi uwa Hebeli umu Keni, pachifukwa ichakuti pakasi pa Yabini u mwene uwamu Hazoli na bamunyumba iya Hebeli umu Keni pakabapo umutende.

¹⁸ U Yaweli akafuma kuzi pakukomana nu Sisela nukumubuzya ukuti, “Wee mwene wane, injila muno, injila bulo. Utakanyilaye.” Po u Sisela akinjila muchisakasa mula nukumuvwinka nu mwenda.

¹⁹ U Sisela akamulaba umukolo yula akati, “Indi ni nyota, umpeko amizi.” Umukolo yula akighula inyambi iya likwela, mumo mukabamo ulukama nukumupa ukuti ang'wele, po akamuvwinka nu mwenda.

²⁰ U Sisela akamulambilizya umukolo yula akati, “Imilila pamulyango uwa chisakasa. Nanti umuntu yumo iza nukukulalusya ukuti, ‘Nkimba izapo umuntu yumo pano?’ Umwamule uti, ‘Nayumo.’ ”

²¹ Loli u Yaweli umuchi uwa Hebeli akasenda akakwi ni nyondo nukubuka umwakunyanyatuka kuko u Sisela akaba. Bo u Sisela aghonite utulo pachifukwa icha kulita, u Yaweli akakomela akakwi kala mumutu wache mupaka nukudobosannya pasi. Po u Sisela akafwa.

²² Bo u Balaki afika pakumulonda u Sisela, u Yaweli akafuma kuzi pakukomana nawe nukumubuzya ukuti, “Injila, nkulanjizye umuntu yuyo ukumulonda.” Po akinjila poka nawe muchisakasa chila nukumwennya u Sisela alambalaye afuye kale, bo akakwi kachili kali mumutu wache.

²³ Pisiku lilalila u Chala akabalwila ubwite aba Izilayeli nukumupota u Yabini u mwene uwa ba Kenani.

²⁴ Ukwandila pakabalilo kalakala aba Izilayeli bakendelela pakuba na maka nkani, mupaka bakamuzimizya u Yabini u mwene uwa ba Kenani.