Abalongi 3 - IBAYIBOLO 2024

Inko zizyo zikasyalikila muchisu icha Kenani

¹ Izi zyo inko zizyo u Mwene akazileka ukuti azibombezyanje pakubayela aba Izilayeli, babo batakabumanyapo nalumo ubwite mu Kenani.

² U Mwene akabomba bunubu ukuti abamanyisye inkalo abaluko ulwa Izilayeli, babo batakabumanyapo nalumo ubwite.

³ Akabaleka abamwene fayivi aba ba Filisiti naba Kenani bosi naba Sidoni sona naba Hivi babo bakikalagha pighamba ilya Lebanoni ukwandila kwighamba ilya Baala Helimoni mupaka ku Lebo Hamati.

⁴ Akabaleka abantu banaba ukuti ababombezyanje pakubayela aba Izilayeli umwakuti ennye nanti bangaghakonka amalamulo agha Mwene ghagho akabapa abanyenya babo ukwendela mwa Mozesi.

⁵ Aba Izilayeli bakikala pakasi paba Kenani, naba Hiti naba Amoli naba Pelezi naba Hivi sona naba Yebusi.

⁶ Aba Izilayeli bala bakasendana na bana babo abalindu nukubapa abana babo abalindu, abantu abaluko ulunji pakuba bachi babo. Bakababombela abachala babo.

Nizya Otiniyeli

⁷ Aba Izilayeli bakabomba ivintu ivibibi vivyo vitakamuhobosya u Mwene. Bakamuluvya u Mwene u Chala wabo pakumubombela u Baala nu Ashela.

⁸ U Mwene akabakalalila nkani aba Izilayeli, umwakuti akababika munyobe izya mwene u Kushani Lishatayimu uwa muchisu icha Mesopotamiya, po akabalaghila aba Izilayeli amaka eyiti.

⁹ Loli bo bamulilila u Mwene, po u Mwene yula akabatumila umuntu uwakuti abapoke. Umuntu yunuyu akaba we Otiniyeli, umwana uwa Kenazi, umuzuna uwa Kalebu, yuyo akabapoka.

¹⁰ Umuzimu uwa Mwene ghukamwikila u Otiniyeli, umwakuti akaba mulongi uwa ba Izilayeli. U Otiniyeli yula akabuka pakulwa ubwite, po u Mwene akamupota nukumubika u mwene wamu Mesopotamiya munyobe zyache.

¹¹ Po mukaba umutende muchisu chilachila amaka 40. Pisinda pache u Otiniyeli, umwana uwa Kenazi akafwa.

Nizya Ehudi

¹² Aba Izilayeli bakabomba sona ivintu ivibibi vivyo vitakamuhobosya u Mwene. Po u Mwene akamupela u Egiloni, u mwene uwamu Mowabu pakuba na maka nkani ukubachila aba Izilayeli.

¹³ U Egiloni akababungannya aba Amoni, poka naba Amaleki nukubapota aba Izilayeli, sona bakafyula akaya akakulu nkani aka mabale.

¹⁴ Aba Izilayeli bala bakaba pasi pabulaghili ubwa Egiloni u mwene uwa Mowabu amaka 18.

¹⁵ Loli aba Izilayeli bakamulilila u Mwene, po akabatumila umuntu uwakuti abapoke. Umuntu yunuyu akaba we Ehudi, uwa nyobe iya mongo, umwana uwa Gela, yuyo akaba waluko ulwa Benjamini. Aba Izilayeli bakamutuma u Ehudi pakumupa u mwene u Egiloni ivyabupi.

¹⁶ U Ehudi akasyana upanga yuyo akwete kosi na kosi, ubutali bwache akaba amasentimita 50, po akamupinyilila mumusana kuntapatapa iya ndilo mukasi mumenda ghache.

¹⁷ U Ehudi akamupa ivyabupi u Egiloni u mwene uwamu Mowabu, yuyo akaba muntu umwine nkani.

¹⁸ Bo u Ehudi amupa ivyabupi vila, akababwezya abantu babo bakanyamula umusonko bala.

¹⁹ Loli umwenecho akanyokela pabuzilo ubwa mabwe aghakubiza papipi nu Giligali nukumubuzya ukuti, “Wee mwene, indi na mazyu nawe aghakubusyefu.” U mwene yula akabalamula ababombi bache akati, “Epapo tasi!” Po ababombi bache bosi bakepapo.

²⁰ Po u Ehudi akapalamila kwa mwene yula, bo ikaye mwene bulo muchipinda ichapamwanya ichikatazu akiza nkani nukumubuzya ukuti, “Wee mwene, indi na mazyu nawe aghakufuma kwa Chala.” Bo u mwene yula akunyamuka pachitengo chache,

²¹ u Ehudi akawesa upanga wache ni nyobe yache iyamongo, yuyo akamupinyilila pa ntapatapa iya kundilo nukumulasa nawe palwanda lwache.

²² Upanga yula akinjila wesi mukasi poka ni chilemelo bulo, umwakuti upanga yula akaba mafuta ghene. U Ehudi akamuleka bulo upanga yula mulamula.

²³ U Ehudi akepamo muchipinda mula, akighalila imilyango iya chipinda icha pamwanya,

²⁴ nukubuka. Po abambombo bache bakiza nukwagha ukuti imilyango iya chipinda icha pamwanya yighaliliwe. Bakinong'onagha ukuti, “Lumo u mwene ali pakwiyavwa mwene.”

²⁵ Bakalindilila akabalilo akatali, loli bo bazyaghannya ukuti atakwighulako kumulyango, bakasenda inyighulilo nukwighulako nukumwagha u mwene ali lambalala afuye.

²⁶ U Ehudi akachimbila bo bachili bakulindilila ukuti u mwene ighule imilyango. Akadumusannya pabuzilo ubwa mabwe aghakubiza nukuchimbilila ku Seyili.

²⁷ Bo afika muchisu icha mumaghamba icha Efulayimu, akalizya ipati, ukubitizya aba Izilayeli pakulwa ubwite. Po akabalongolela pakwika pighamba.

²⁸ U Ehudi akabalamula aba Izilayeli bala akati, “Munkonke pakuti u Mwene ababika abalwani binyu aba Mowabu munyobe zyinyu.” Po bakamukonka u Ehudi nukufyula amaloboko agha lusoko ulwa Yolodani, sona batakamwitikizyapo nayumoyumo umuntu ukuti aloboke.

²⁹ Pisiku lilalila bakabaghogha abasilikali abamaka nkani aba ba Mowabu pipipipi 10,000 sona atakaponapo nayumoyumo umuntu.

³⁰ Po aba Izilayeli bakabapota aba Mowabu, umwakuti muchisu chila mukabamo umutende amaka 80.

Nizya Shamugali

³¹ Bo u Ehudi afwa, u Shamugali umwana uwa Anati akapyana pabumwene, yuyo akabaghogha aba Filisiti 600 ni ndisa iyakusyempela ing'ombe. Po wepe akabapoka aba Izilayeli.