Abalongi 21 - IBAYIBOLO 2024

Abachi aba ba Benjamini

¹ Aba Izilayeli bakalapa kwa Mwene bo bali pa Mizipa bakati, “Atalipo nayumo umuntu pakasi papitu yuyo akwiza pakumwitikizya umu Benjamini pakumusenda umwana wache umulindu ukuti abanje muchi wache.”

² Po aba Izilayeli bala bakabuka ku Beteli nukwikala pasi pamaso pa Chala mupaka pachamabwila, bo bakukolomoka nukulila nkani

³ ukuti, “Wee Mwene, u Chala uwa ba Izilayeli, nkimba choni chicho chatuwila? Nkimba chifukwa choni ukuti uluko loka luzimile mu Izilayeli?”

⁴ Indabi yache, pandabindabi nkani aba Izilayeli bala bakazenga ichighemo nukubikapo ivyakwiyipa ivyakocha, sona ni vyakwiyipa ivyabupoka.

⁵ Aba Izilayeli bakalalusya bakati, “Nkimba luko loni pakasi panko izya ba Izilayeli, lulo lukanyoka ku lukomano ulwa Mwene?” Pakuti abantu bakalapa ukuti umuntu wesi yuyo anyoka kulukomano ulwa Mwene mu Mizipa, naloli aghoghiwanje.

⁶ Aba Izilayeli bakaba ni chitima nkani na bakamu babo aba Benjamini. Po bakati, “Ilelo uluko loka lwazimila mu Izilayeli.

⁷ Nkimba tungabalondela bulibuli abachi abantu babo bapona, pakuti twalapa kwa Mwene ukuti tutakwiza pakubitikizya aba Benjamini ukuti babasende abana bitu abalindu pakuba bachi babo?”

⁸ Po bakalalusya bakati, “Nkimba luko loni pakasi panko izya ba Izilayeli, lulo lukanyoka kulukomano ulwa Mwene mu Mizipa?” Bakagha ukuti abantu aba mu Yabeshi Giliyadi bakanyoka kulukomano lula.

⁹ Pakuti bo bababelenga abantu bakagha ukuti patakabapo nayumoyumo umuntu uwamu Yabeshi Giliyadi.

¹⁰ Po ichilundilo chosi icha bantu chila chikabatuma abasilikali 12,000 ku Yabeshi Giliyadi ukuti babaghoghe abantu bosi babo bakikalagha mulamula, ukonjelezyapo abakolo na bana.

¹¹ Bakanena bakati, “Izi zyo zizyo mubaghiye pakubomba, ‘Mubaghoghe abanavuli na bakolo bosi, babo baghonitepo na banavuli.’ ”

¹² Pakasi pabantu babo bakikalagha mu Yabeshi Giliyadi, bakabaghamo abalindu 400, babo bataghonitepo na banavuli. Po bakabasendela kuvisakasa mu Shilo muchisu icha Kenani.

¹³ Po ichilundilo chosi chicho chikaba palukomano lula chikabatumila amazyu aba Benjamini, babo bakaba pilyabwe ilya Limoni pakubabuzya ukuti tukulonda pakuleka ubwite.

¹⁴ Aba Benjamini bakabwelako akabalilo kanako, bakapeghiwa abakolo babo aba mu Yabeshi Giliyadi babo bakapona kubwite, loli pope bulo batakabakwana.

¹⁵ Aba Izilayeli bakabapelela ichitima aba Benjamini pachifukwa ichakuti u Mwene akabefyako abantu bamo pakasi pabaluko ulwa Izilayeli.

¹⁶ Po abasongo aba chilundilo bakati, “Nkimba tukwiza pakubaghila kwiyi abachi aba ba Benjamini babo bapona kubwite?

¹⁷ Chikulondiwa ukuti aba Benjamini, babo bapona kubwite babanje na bakupyana ichilingo umwakuti uluko ulwa ba Izilayeli lutakazimile.

¹⁸ Loli pope bulo tutangabapa abana bitu ukuti babanje bachi babo, pachifukwa ichakuti tukalapa kwa Mwene ukuti, ‘Aghuniwanje umuntu wesi yuyo akumwitikizya umu Benjamini pakumusenda umwana wache umulindu ukuti abanje muchi wache.’

¹⁹ Luliko ulusekelo ulwa mwaka nu mwaka uwa Mwene mu Shilo, kumitu ukwa Beteli, na kubufumilo bwizuba ubwa musebo waku Shekemu ukufuma ku Beteli, sona na kuntende ukwa Lebona.”

²⁰ Bakababuzya aba Benjamini bala bakati, “Buka kavwame mumaghunda agha mampesya.

²¹ Nanti abalindu aba mu Shilo bakwiza pakwimba, panapo muvundumuke mumaghunda agha mampesya ghala, sona umuntu wesi ilemele mwene umulindu pakuba muchi wache nukubuka nawe kuchisu icha Benjamini.

²² Nanti abawise pamo abayemba babo bakwilumbusya naswe, tukwiza pakubabuzya ukuti, ‘Mwee twalamba, mutwitikizye ukuti tubavwe, pachifukwa ichakuti tutakabasendela abachi pakabalilo aka bwite kala. Amwe mute ninongwa nayimoyimo, pakuti mutakabitikizya pakubasenda abana binyu abalindu ukuti babanje bachi babo.’ ”

²³ Po aba Benjamini bakabomba vivyo bakababuzya. Bo abalindu bala bali pakwimba, umuntu wesi akilemela mwene umulindu pakuba muchi wache. Bakabwela kuchisu chabo nukuzenga sona utwaya twabo utukulu nukwikala mulamula.

²⁴ Aba Izilayeli bala bakepapo pabuzilo bula nukubwela kukaya, po umuntu wesi akabwela ku luko ulwache nu lwache, sona naku bamunyumba yache.

²⁵ Mumasiku ghalaghala aba Izilayeli batakaba nu mwene. Po umuntu wesi akabombagha bulo vivyo vikumuhobosyanga.