Abalongi 20 - IBAYIBOLO 2024

Aba Izilayeli bakulwa ubwite naba Benjamini

¹ Aba Izilayeli bosi aba mu Dani mupaka ku Belisheba, sona naba mu Giliyadi bakabungana poka pamaso pa Mwene mu Mizipa.

² Abalongozi aba inko zyosi izya ba Izilayeli bakiza kulukomano ulwa bantu aba Chala, sona pakabapo abasilikali abakwenda pasi 400,000, babo bakaba na bapanga.

³ Aba Benjamini bakivwa ukuti aba Izilayeli bakabuka ku Mizipa. Po bakalalusya bakati, “Tubuzye, nkimba ububibi bunubu bukabombiwa bulibuli?”

⁴ Umu Levi yuyo umuchi wache umuzya akaghoghiwa akamula akati, “Ane poka nu muchi wane umuzya tukafika mukaya akakulu nkani aka Gibeya muchisu icha Benjamini ukuti tughone kulakula.

⁵ Pabusiku abantu aba mu Gibeya bakansambukila nukuyizyungulila inyumba mumo nkabamo ukuti bangoghe. Bakamulema pamaka umuchi wane umuzya, po akafwa.

⁶ Nkaghusenda umuvimba wache nukughudumulannya muvigabamuvigaba. Po nkazitumila inko zyosi izya ba Izilayeli, pachifukwa ichakuti abantu banaba bakabomba ichintu ichamwiko, sona ni chamusamu mu Izilayeli.

⁷ Losi ulu, mwebosi mwe ba Izilayeli, nkimba mwabatika pakubomba ichoni?”

⁸ Abantu bosi bakimilila poka nukuti, “Atalipo nayumoyumo umuntu pakasi papitu uwakunyokela ku chisakasa chache pamo uwakubwela kunyumba.

⁹ Loli izi zyo zizyo tukwiza pakubabombela abantu aba mu Gibeya: Tukwiza ukubuka pakulwa nabo ubwite, bo twabomba amayele.

¹⁰ Tukwiza pakubasenda abantu 10 pabantu 100 ukufuma mu inko zyosi izya Izilayeli, na bantu 100 pabantu 1,000, sona na bantu 1,000 pabantu 10,000 ukuti babanyamulile ivyakulya abasilikali. Po bo abasilikali bafika mukaya akakulu nkani aka Gibeya mu Benjamini, bakwiza pakubafunda abantu aba mulamula, pakubatanizya pachintu ichamusamu chicho bakachibomba mu Izilayeli.”

¹¹ Aba Izilayeli bosi bakabungana poka nukuvwana ukuti balwe ubwite nakaya akakulu nkani kala.

¹² Inko izya ba Izilayeli zikatuma intumi muchisu chosi icha Benjamini pakulalusya ukuti, “Nkimba bubibi boni bunubu bubo bwabombiwa pakasi papinyu?

¹³ Losi ulu mubabike munyobe zyitu abantu ababibi nkani aba mu Gibeya, umwakuti tungabagha nukwefya ububibi muchisu icha Izilayeli.” Loli aba Benjamini batakabateghelezya aba Izilayeli abamwabo.

¹⁴ Po aba Benjamini bosi bakepamo mutwaya twabo utukulu nukubungana poka mu Gibeya pakulwa ubwite naba Izilayeli.

¹⁵ Pisiku lilalila aba Benjamini bakababungannya poka abasilikali 26,000, aba mutwaya twabo utukulu, babo bakaba na abapanga, pakonjelezya pabasilikali 700 aba mu Gibeya.

¹⁶ Pakasi pabasilikali banaba pakabapo abantu 700 abakubombezya inyobe iyamongo, babo batakubwindapo nanti bakulisumba ibwe pakubombezya ifyata, napapo kanandi nkani ngati lusisi.

¹⁷ Aba Izilayeli bosi poka, ukusita ukubabelengako aba Benjamini bakabapo 400,000, sona bosi banaba bakamanya nkani pakulwa ubwite.

Aba Izilayeli bakulwa ubwite naba Benjamini

¹⁸ Aba Izilayeli bakabuka mupaka ku Beteli pakumubuzikizya u Chala. Bakati, “Nkimba bo bawenu pakasi papitu babo babanje bakwanda pakulwa ubwite naba Benjamini?” U Mwene akamula akati, “Abaluko ulwa Yuda bo babo babanje bakwanda.”

¹⁹ Aba Izilayeli bakalabila pandabindabi nkani nukuzenga ivisakasa vyabo umwakwenannya nakaya akakulu nkani aka Gibeya.

²⁰ Aba Izilayeli bala bakabuka pakulwa ubwite naba Benjamini, nukwikala mubuzilo bwabo ubwa bwite umwakwenannya nakaya akakulu nkani aka Gibeya.

²¹ Aba Benjamini bope bakepamo mu Gibeya pakulwa ubwite, po bakabaghogha aba Izilayeli 22,000 pisiku lilalila.

²² Loli aba Izilayeli bala bakakazannya nkani, nukubabika sona abasilikali babo mubuzilo bwabo ubwa bwite ubwakwanda bula.

²³ Aba Izilayeli bakabuka pakumulilila u Mwene mupaka pachamabwila nukumubuzikizya ukuti, “Nkimba tubukaye sona pakulwa ubwite na bakamu bitu aba Benjamini?” U Mwene akabamula akati, “Bukagha.”

²⁴ Po aba Izilayeli bakabuka pakulwa ubwite naba Benjamini pisiku ilyabubili.

²⁵ Loli bo aba Benjamini bepamo sona mukaya kabo pakulwa ubwite naba Izilayeli, pope bulo bakabaghogha sona aba Izilayeli 18,000, babo bakaba na bapanga.

²⁶ Aba Izilayeli bosi bakabuka ku Beteli, sona bakikala pasi palapala pakumulilila u Mwene. Pisiku lilalila bakatuzya pakulya mupaka pachamabwila nukubika ivyakwiyipa ivyakocha ni vyakwiyipa ivyabupoka kwa Mwene.

²⁷ Po aba Izilayeli bakamubuzikizya u Mwene. Mumasiku ghalaghala Ibokosi ilya Lufingo ilya Chala likaba ku Beteli kulakula,

²⁸ sona u Finehasi umwana uwa Eleyazala, u mwana uwa Aloni akaba weyuyo akenelezyanga. Bakalalusya bakati, “Nkimba tubukaye sona pakulwa ubwite na bakamu bitu aba Benjamini, pamo awe?” U Mwene akamula akati, “Bukagha, pakuti indabi nkwiza pakubabika munyobe zyinyu.”

²⁹ Po aba Izilayeli bala bakavwamilila umwakukazyungulila akaya akakulu nkani aka Gibeya kala.

³⁰ Bakabuka pakulwa ubwite naba Benjamini pisiku ilyabutatu, nukwikala mubuzilo bwabo ubwa bwite umwakwenannya nakaya aka Gibeya, ngati mumo bakabombela pakwanda pala.

³¹ Aba Benjamini bakepamo mukaya kabo pakulwa nabo ubwite, sona bakabuka pabutalipo nkani nakaya kabo kala. Ngati mumo bakabombelagha amasiku ghosi, bakabavulazya nkani aba Izilayeli pisiku lilalila, umwakuti abantu 30 bakafwila mumaghunda na mumusebo waku Beteli naku Gibeya.

³² Bo aba Benjamini bakuti, “Twabapota ngati mumo tukabapotela pakwanda.” Loli aba Izilayeli bakatinji, “Zagha tuchimbilile ku misebo pabutalipo nakaya kabo akakulu nkani aka.”

³³ Aba Izilayeli bosi bakavundumuka mubuzilo bwabo ubwa bwite, nukuvwamilila ku Baala Tamala. Aba Izilayeli babo bakavwamililagha, bakavundumuka mubuzilo bwabo kubwinjilo bwizuba ubwa Gibeya.

³⁴ Po abasilikali 10,000 abamaka nkani babo bakasaliwa pakasi paba Izilayeli bakalwa ubwite nakaya aka Gibeya kuntazi. Ubwite bukaba bwakoghofya nkani umwakuti aba Benjamini batakazyaghannya ukuti ukunanganika ukukulu nkani kukizagha papabo.

³⁵ U Mwene akabapota aba Benjamini pamaso paba Izilayeli. Pisiku lilalila aba Izilayeli bakabaghogha aba Benjamini 25,100, babo bakaba na bapanga.

³⁶ Aba Benjamini bakazyaghannya ukuti bapotwa. Aba Izilayeli bakabachimbila aba Benjamini pakwanda pala, pachifukwa ichakuti bakabasubila abantu babo bakavwamililagha papipi nakaya aka Gibeya.

³⁷ Abantu babo bakavwamililagha bakavundumuka mubuzilo bwabo nukwinjila mu Gibeya, bakasata nkani nukubaghogha abantu bosi mukaya akakulu nkani kalakala.

³⁸ Aba Izilayeli bakabapa abantu babo bakavwamililagha ichimanyilo ichakuti nanti balyennya ilyosi likusuka nkani mukaya kala,

³⁹ po aba Izilayeli banyokele pakulwa ubwite. Pakabalilo kalakala aba Benjamini bakabavulazya nkani aba Izilayeli pipipipi abantu 30, po aba Benjamini bakati, “Twabapota ngati mumo tukabapotela pakwanda pala.”

⁴⁰ Loli bo ilyosi lyanda pakusuka mukaya akakulu nkani kala, aba Benjamini bakaghalabuka nukwennya ilyosi likusuka mukaya kosi kala.

⁴¹ Aba Izilayeli bakabaghalabukila aba Benjamini bala, po aba Benjamini bakanyila nkani pachifukwa ichakuti bakazyaghannya ukuti ukunanganika ukukulu nkani kukizagha papabo.

⁴² Po aba Benjamini bakachimbilila munkolongo, loli batakapona kubwite bulabula. Aba Izilayeli babo bakafumagha mukaya kala, bakabaghoghela palapala.

⁴³ Aba Izilayeli bakabazyungulila aba Benjamini bala nukubachimbizya, po bakabaghogha mupaka kubufumilo bwizuba ubwa Gibeya.

⁴⁴ Aba Benjamini 18,000, babo bakaba bajivu nkani bakaghoghiwa.

⁴⁵ Bo aba Benjamini bala bakuchimbilila munkolongo kwilyalabwe ilya Limoni, aba Izilayeli bakabaghogha abantu 5,000 mumisebo. Aba Izilayeli bakendelela pakubachimbizya aba Benjamini bala mupaka ku Gidomu nukubaghogha abantu abanji 2,000.

⁴⁶ Pisiku lilalila aba Benjamini 25,000 abajivu nkani, babo bakaba na bapanga bakaghoghiwa.

⁴⁷ Loli abantu 600 bakachimbilila munkolongo kwilyalabwe ilya Limoni, nukwikala kulakula amezi folo.

⁴⁸ Aba Izilayeli bakanyokela pakulwa ubwite naba Benjamini babo bakasyalako nukubaghogha abantu bosi mukaya kala, ukonjelezyapo ivitekwa, poka ni vintu vyosi bakavyagha mulamula. Bakatocha utwaya tosi utukulu, tuto tukaba muchisu chilachila.