Abalongi 2 - IBAYIBOLO 2024

Uwantumi uwa Mwene pa Bokimu

¹ Uwantumi uwa Mwene akafuma ku Giligali nukubuka ku Bokimu pakubabuzya aba Izilayeli ukuti, “Ane ne nkabefyamo mu Ijiputi nukubinjizya muchisu chicho nkabalayizya abanyenya binyu. Nkanena sona nkati, ‘Ntakwiza pakulunangannya nalumo ulufingo lulo nkafingana namwe.

² Po namwe bulo mutakafinganaye nalumo ulufingo na bantu aba muchisu chinichi. Loli mumongolannye ivighemo vyabo vyosi.’ Pope bulo amwe mutakanyivwila, awe. Nkimba choni chicho mwabomba bunubu?

³ Polelo nkubabuzya ukuti ntakwiza pakubachimbizyamo abenekaya, bo amwe mukwinjilamo. Loli abene bakwiza pakubatamya nkani, sona abachala babo bakwiza pakuba vyo vipingo kukwinyu.”

⁴ Bo uwantumi uwa Mwene ababuzya zinizi aba Izilayeli bosi, abantu bakanda pakulila nkani.

⁵ Po ubuzilo bula bakabwita ukuti Bokimu. Palapala bakabika ivyakwiyipa kwa Mwene.

Ubufwe ubwa Yoshwa

⁶ Bo u Yoshwa ababwezya abantu, aba Izilayeli bakabuka pakuchifyula ichisu, sona umuntu wesi akabuka ku mpyana yache.

⁷ Abantu bala bakamubombelagha u Mwene pakabalilo kosi aka bumi ubwa Yoshwa, sona na pakabalilo aka balongozi babo bakabapo bo u Yoshwa afwa. Abalongozi banaba bakavyennya ivintu vyosi ivikulu nkani vivyo u Mwene akababombela aba Izilayeli.

⁸ U Yoshwa umwana uwa Nuni umubombi uwa Mwene akafwa bo ali na maka 110.

⁹ Po bakamusyila muchisu chicho akapokela pakuba mpyana yache mu Timunati Helesi, chicho chikaba chisu icha mumaghamba icha Efulayimu kumitu kwighamba ilya Gashi.

¹⁰ Bo inkulilo yosi yilayila yafwa, inkulilo iyinji yikizapo, yiyo yitakamumanya u Mwene pamo ukuzimanya imbombo zizyo akababombela aba Izilayeli.

¹¹ Po aba Izilayeli bakamunangila nkani u Mwene nukumwiputa u Baala.

¹² Bakamukana u Mwene, u Chala uwa banyenya babo, yuyo akabefyamo mu Ijiputi. Bakabiputa nukubachindika abachala abanji aba bantu babo bakabazyungulila. Bakamukalalizya nkani u Mwene

¹³ pachifukwa ichakuti bakamukana u Mwene nukwanda pakumubombela u Baala nu Ashitoleti.

¹⁴ Po u Mwene akabakalalila aba Izilayeli nukubabika munyobe izya mavyondongo, ghagho ghakafyula ivintu vyabo. Akababika munyobe izya balwani bosi babo bakabazyungulila, umwakuti batakipoka bene.

¹⁵ Akabalilo kosi nanti aba Izilayeli bakubuka pakulwa ubwite, u Mwene akalwanagha nabo, ukuyana namumo akalapila. Aba Izilayeli bala bakaba muntamyo inkulu nkani.

¹⁶ Po u Mwene akabimika abalongozi, babo bakabapoka munyobe izya mavyondongo ghala.

¹⁷ Loli pope bulo batakabateghelezya abalongozi bala, umwakuti bakabiputa nukubachindika abachala abanji. Bakapulumpa izila yiyo abanyenya babo bakendamo, babo bakaghakonkagha amalamulo agha Mwene.

¹⁸ Akabalilo kosi nanti u Mwene akubimikila umulongozi, u Mwene akaba nawe nukubapoka munyobe izya balwani babo, bo umulongozi yula mumi. U Mwene akaba nabo ni chililizi, bo bakukoloma pachifukwa icha bantu babo bakabavwimagha nukubayivya.

¹⁹ Loli nanti umulongozi yula afwa, abantu bala bakanda pakubomba sona ivintu ivibibi ukubachila abanyenya babo, pakubiputa nukubachindika abachala abanji. Bakakana pakuzileka imbibi zyabo, po bakendelela pakuba na moyo amakafu.

²⁰ Polelo u Mwene akabakalalila nkani aba Izilayeli nukuti, “Pachifukwa ichakuti abantu banaba balunangannya ulufingo lwane, lulo nkafinga na banyenya babo, sona nukuti batakanteghelezya,

²¹ ane ntakwiza pakuzichimbizyamo nalumo inko zizyo u Yoshwa akazileka pakabalilo kako akafwilagha.

²² Nkwiza pakuzibombezya inko zinizi pakubayela aba Izilayeli ukuti nennye nanti bakuzikonka izila izya Mwene ukuyana namumo abanyenya babo bakabombelagha.”

²³ Po u Mwene atakazichimbizyamo inko zila muchisu chilachila, sona atakazichimbizyamo bulo lubilolubilo pakuzibika munyobe izya Yoshwa.