Abalongi 19 - IBAYIBOLO 2024

Umu Levi nu muchi wache umuzya

¹ Mumasiku ghalaghala aba Izilayeli batakaba nu mwene. Po kukabako umu Levi yumo yuyo akikalagha mutwaya nkani muchisu icha mumaghamba icha Efulayimu. Umu Levi yunuyu akamusenda umuchi umuzya uwamu Betelehemu muchisu icha Yuda.

² Loli umukolo yula akamuleka umulume nukubwela kwa wise mu Betelehemu muchisu icha Yuda. Bo amala amezi folo munyumba iya wise,

³ umulume akabuka pakumulambilizya ukuti banyokelane. Umu Levi yula akabuka nu wambombo wache poka ni mpunda zibili. Umukolo yula akamwinjizya munyumba iya wise. Po uwise akahoboka nkani, bo amwennya.

⁴ Uwisevyala akamulambilizya ukuti ikale nawe amasiku matatu kulakula. Akalya nukung'wela, nukughona kulakula.

⁵ Pisiku ilyafolo akalamusya pandabindabi nkani nukwiyanizizya ubulendo bwache. Loli uwisevyala akamubuzya umukwalima wache akati, “Ulye tasi, po ungabwela.”

⁶ Po bosi babili bala bakikala pasi, bakanda pakulya nukung'wela poka. Pisinda pache uwisevyala yula akati, “Nalamba, ughonele sona nukwilagha.”

⁷ Bo umuntu yula akunyamuka ukuti abwelaye, uwisevyala akamulambilizya ukuti aghonele sona.

⁸ Pisiku ilyafayivi akalamusya pandabindabi nkani ukuti abwelaye, loli uwisevyala yula akati, “Nalamba, ulye tasi. Ulindilile mupaka pachamabwila!” Po abantu babili bala bakalya poka ichakulya.

⁹ Po umu Levi yula nu muchi wache umuzya poka nu wambombo wache bakanyamuka ukuti babwelaye, loli uwisevyala akati, “Ennya, kwila kale. Ghonela sona nukwilagha. Ulabile pandabindabi nkani nukubwela.”

¹⁰ Loli umuntu yula atakalondagha pakughona sona kulakula, po akanyamuka nukubuka ku Yebusi (kokuti Yelusalemu), poka nu muchi wache umuzya, sona ni mpunda zyache zibili zizyo zikaba ni vyakwikalila.

¹¹ Bo bapalamila nakaya akakulu nkani aka Yebusi, kukaba ukuti ichamabwila chandako, po uwambombo yula akamubuzya u mwene wache akati, “Nkimba tutangapaghukila mukaya akakulu nkani aka ba Yebusi nukughona mulamula?”

¹² U mwene wache akamwamula akati, “Awe tutangapaghukila mukaya aka bayeni, kako abantu bache te ba Izilayeli. Zagha twendelele mupaka ku Gibeya.”

¹³ Po akamubuzya sona uwambombo wache yula akati, “Zagha tuyezye ukuti tufike mu Gibeya pamo mu Lama ukuti tughone mulamula.”

¹⁴ Bakandelela nu bulendo bwabo, sona izuba likinjilagha, bo bafika papipi nakaya akakulu nkani aka Gibeya muchisu icha Benjamini.

¹⁵ Bakapaghukila kulakula nukughona. Bakinjila mukaya akakulu nkani kala nukwikala pamunalo, loli patakabapo nayumoyumo yuyo akabasendela kunyumba yache ukuti baghone.

¹⁶ Bo bachili bali palapala pachamabwila, pakizapo umuntu yumo umughosi ukufuma kumaghunda, yuyo akikalagha mu Gibeya muchisu icha mumaghamba icha Efulayimu. (Abantu aba mulamula bakaba ba Benjamini.)

¹⁷ Bo umuntu umughosi yula atalankannya, akamwennya umwendazila yula pamunalo pala. Po umuntu umughosi yula akalalusya akati, “Nkimba ukubuka kwiyi? Nkimba wafuma kwiyi?”

¹⁸ Umwendazila yula akamula akati, “Twafuma mu Betelehemu muchisu icha Yuda, sona tukubuka mutwaya muchisu icha mumaghamba icha Efulayimu kuko nkwikala. Name mu Betelehemu muchisu icha Yuda, po losi ulu nkubuka ku Nyumba iya Mwene. Nayumoyumo yuyo abuka nane kunyumba yache.

¹⁹ Tuli ni sote, ni chakulya icha mpunda zyitu, sona tuli ni vibama nu vinyo ivyakutuyana aswe twe bambombo bako, ane nu wambombo wako umulindu, sona nu mulumendo yuyo tuli poka nawe. Aswe tutakusobelwapo ichintu nachimochimo.”

²⁰ Umuntu umughosi yula akamula akati, “Umutende ghubanje namwe. Nkwiza pakubapa vyosi vivyo mukusobelwa, loli mutaghonaye pamunalo pano.”

²¹ Po akabuka nabo kunyumba yache nukuzilyesya impunda zyache. Bo basukusula munyayo zyabo, bakalya ichakulya nukung'wela.

²² Bo bali pakwilagha ichakulya chila, abantu bamo ababibi abamwalwe aba mukaya akakulu nkani kala, bakayizyungulila inyumba yila. Bakanda pakulukoma ulwiyi nukumubuzya umuntu umughosi yula umwenecho uwa nyumba ukuti, “Mufumye kuzi umuntu yuyo izite munyumba yako ukuti tughonane nawe.”

²³ Umwenecho uwa nyumba yula akafuma kuzi nukubabuzya abantu bala ukuti, “Awe, bamanyani bane! Mutakabombe ichintu ichibibi chinichi. Umuntu yunuyu muyeni wane, po mutakamubombele ichintu ichamusamu chinichi.

²⁴ Ennya, indi nu mwana wane umulindu yuyo ataghonitepo nalumo nu mwanavuli, sona nu muchi umuzya uwa mwendazila uyu. Losi ulu nkwiza pakubafumizizya kuzi, po mungababombela chosi chicho mukulonda. Loli mutakamubombele ichintu ichamusamu umwendazila uyu.”

²⁵ Loli abantu bala batakamwivwila. Umwendazila yula akabafumizizya kuzi umuchi wache umuzya yula, po bakamulema pamaka nukumunyazya ubusiku bosi mupaka pandabindabi. Kubuche bakamulekezya ukuti abukaye.

²⁶ Kubuche, umukolo yula akabuka kunyumba kuko u mwene wache akikalagha, po akawa pasi pamulyango nukulambalala palapala mupaka pandabindabi.

²⁷ Bo umulume wache alamusya pandabindabi, nukwighula ulwiyi ukuti endelele nu bulendo bwache, akamwagha umuchi wache umuzya yula alambalaye pamulyango uwa nyumba, bo agholosezizye inyobe zyache kulwiyi.

²⁸ Akamubuzya akati, “Nyamuka tubukaye.” Loli umukolo yula atakamula. Po akamubika pampunda yache nukubwela.

²⁹ Bo afika, akinjila munyumba yache pakusenda ichipeni nukughudumulannya umuvimba uwa muchi wache umuzya yula ivigaba 12. Akabatuma abantu ni vigaba vila muchisu chosi icha Izilayeli.

³⁰ Abantu bosi babo bakazyennya zinizi bakati, “Ichintu chinichi chitabombiwepo nalumo ukwandila pakabalilo kako aba Izilayeli bakepelamo mu Ijiputi. Twinong'one akiza! Nkimba tutangivwana nukubombapo zimo?”