Abalongi 18 - IBAYIBOLO 2024

Nizya Mika naba Dani

¹ Mumasiku ghalaghala aba Izilayeli batakaba nu mwene nayumoyumo, sona aba Dani bakalondagha apakwikalapo, pachifukwa ichakuti bakaba bachili batinjiye muchisu chicho bakapokela pakasi panko izya ba Izilayeli pakuba mpyana yabo.

² Po aba Dani bala bakabatuma abantu fayivi abajivu aba mu Zola, naba mu Eshitawoli pakuchitendela ichisu. Abantu banaba bakimilila inko zyabo, po bakababuzya bakati, “Bukagha muchitendele ichisu.” Abantu bala bakabuka muchisu icha mumaghamba icha Efulayimu, bakafika kunyumba iya Mika nukwikala mulamula.

³ Bo bali munyumba iya Mika mulamula bakakamanya akanenele aka mulumendo umu Levi yula. Po bakamulalusya bakati, “Nkimba ukiza nu wenu kuno? Ukulonda choni? Nkimba ukubomba mbombo yoni?”

⁴ Akababuzya ivintu vivyo u Mika akamubombela akati, “U Mika ansimba imbombo, sona ne muputi wache.”

⁵ Abantu bala bakamubuzya bakati, “Wee, twalamba utulalusikizyeko kwa Chala nanti tukwiza pakuba nu bulendo ubwiza.”

⁶ Umuputi yula akabamula akati, “Mwende akiza, U Mwene abalongolele pabulendo bwinyu.”

⁷ Abantu fayivi bala bakabuka nukufika mu Layishi. Kulakula bakennya ukuti abantu bakikalagha umwakufwasa ngati bo ba Sidoni, sona na basita kupasya. Abantu bala bakaba bakabi nkani pachifukwa ichakuti ichisu chabo chitakasobelwapo ichintu nachimochimo. Bakikalagha kubutali nkani naba Sidoni, sona batakendelanagha ninko izinji.

⁸ Bo banyokela ku Zola naku Eshitawoli, abakamu babo bakabalalusya bakati, “Nkimba mungatupangila choni?”

⁹ Bakamula bakati, “Twende pakulwa nabo ubwite. Ichisu chabo chamuvundo nkani. Nkimba mutangabombapo zimo? Mutakazyelaye pakubukako nukuchifyula ichisu chilachila.

¹⁰ Bo mwafika muchisu chila, mukwiza pakubagha abantu abasita kupasya. Ichisu chabo chikulu nkani, sona chitakusobelwa ichintu nachimochimo, chicho u Chala achibika munyobe zyinyu.”

¹¹ Po abantu 600 abaluko ulwa Dani aba mu Zola naba mu Eshitawoli bakabuka pakulwa ubwite.

¹² Bakazenga ivisakasa vyabo mu Kiliyati Yeyalimu muchisu icha Yuda. Ichi cho chifukwa mupaka nilelo bulo ubuzilo bulabula bukwitiziwanga ukuti Mahane Dani.

¹³ Po bakabuka muchisu icha mumaghamba icha Efulayimu nukufika kunyumba iya Mika.

¹⁴ Abantu fayivi babo bakatendelagha ichisu icha Layishi, bakabalalusya abakamu babo bakati, “Nkimba muzimenye ukuti inyumba yoka pa nyumba izi muli u efodi, na bachala abanji, sona ni chifwani icha siliva? Nkimba tubombepo choni?”

¹⁵ Po abantu bala bakapaghukila kunyumba iya Mika, kuko umulumendo umu Levi yula akikalagha nukumulamuka.

¹⁶ Pakabalilo kalakala aba Dani 600, babo bakiyannya pakulwa ubwite, bakimilila pamulyango uwa lupaso.

¹⁷ Abatendezi fayivi bala bakinjila munyumba nukusenda ichifwani ichakubiza nu efodi na bachala abanji, sona ni chifwani icha siliva, bo umuputi poka na bantu 600, babo bakaba ni vilwilo ivya bwite bimiliye pamulyango uwa lupaso.

¹⁸ Bo abantu bala binjila munyumba iya Mika pakusenda ichifwani ichakubiza nu efodi na bachala abanji sona ni chifwani icha siliva, umuputi yula akabalalusya akati, “Nkimba mukubomba choni?”

¹⁹ Po bakamwamula bakati, “Banga myee! Sona umulomo, tukonke ukuti ubanje we tata witu, sona nu muputi witu. Nkimba chitangaba chizapo ukuti ubanje we muputi uwa luko ulwa Izilayeli, nukuchila ukuti ubanje we muputi uwa muntu uwa nyumba yoka?”

²⁰ Ichi chikamuhobosya umuputi yula, po akasenda u efodi na bachala abanji ni chifwani ichakubiza nukubuka poka na bantu bala.

²¹ Bakanyamuka nukubuka, bakabalongolezya abana babo, ni vitekwa poka nu katundu wabo.

²² Bo abantu bala bafika pabutalipo ukwepapo panyumba iya Mika, u Mika akabitizya abapalamani bache ukuti babachimbizye aba Dani bala, po bakabagha.

²³ Bo bakukolomoka pakubimika, aba Dani bakaghalabuka nukulalusya ukuti, “Nkimba choni chatamya ukuti ubabungannye poka abantu bako pakulwa ubwite?”

²⁴ U Mika akabamula akati, “Mwanyibila abachala bane, babo nkipangila nemwene, poka nu muputi wane nukubuka. Nkimba nasyalapo ni choni? Po mukundalusya bulibuli ukuti, ‘Nkimba choni chatamya?’ ”

²⁵ Aba Dani bala bakamula bakati, “Utakadalinkanaye naswe, lumo abantu abakali bangakukoma, po awe poka na bamunyumba yako mungafwa”

²⁶ Aba Dani bakendelela nu bulendo bwabo. Bo u Mika azyaghannya ukuti abantu bala bakaba bamaka nkani ukumuchila, akaghalabuka nukubwela.

²⁷ Po bakasenda ivintu vivyo u Mika akipangila mwene, poka nu muputi wache yula, nukubuka ku Layishi, kako kakaba kaya akakulu aka bantu abamutende, sona na basita kupasya. Bakabaghogha abantu bosi sona nukocha akaya kala.

²⁸ Patakabapo nayumoyumo umuntu uwakubapoka, pachifukwa ichakuti bakikalagha pabutali nkani naba Sidoni, sona batakendelanagha ninko izinji. Akaya aka Layishi kakaba mwikombe papipi nakaya akakulu aka Beti Lehobu, po aba Dani bakakazenga sona akaya akakulu nkani kala nukwikala mulamula.

²⁹ Akaya akakulu nkani kala bakakita itabwa ilya Dani, itabwa ilya munyenya wabo u Dani umwana umulumendo uwa Yakobo. Loli akaya akakulu nkani kala pakwanda bakatinji Layishi.

³⁰ Aba Dani bakiyimikila bene ichifwani ichakubiza nukwanda pakuchichindika. Po Yonatani, umwana uwa Gelishomu umwizukulu uwa Mozesi, poka na bana bache bakaba baputi abaluko ulwa Dani mupaka papo bakabukila kuchisu icha buzya.

³¹ Po bakachiputagha ichifwani chicho u Mika akachibiza, pakabalilo kosi kako Ichisakasa icha Chala chikaba mu Shilo.