Abalongi 17 - IBAYIBOLO 2024

Ivifwani ivya Mika

¹ Kukabako umuntu yumo muchisu icha mumaghamba icha Efulayimu, yuyo akaba we Mika.

² U Mika akamubuzya unyina akati, “Pakabalilo kako umuntu yumo akakwibila isalabazya izya siliva 11,000, nukumughuna umwiba yulayula, indi nazyo. Nene nkasenda.” Unyina akamula akati, “Wee mwana wane, u Mwene akusaye!”

³ Bo amunyosezya unyina isalabazya izya siliva 11,000 zila, unyina akati, “Nkwiza pakuzipaghulila isalabazya zinizi kwa Mwene ukuti asyane ichifwani icha siliva. Pisinda pache nkwiza pakukunyosekezya isalabazya zila.”

⁴ Bo u Mika amunyosezya unyina isalabazya izya siliva zila, unyina akasendapo isalabazya 200 nukumupa umusyani, yuyo akazisyana pakuba chifwani icha siliva. Po ichifwani chila chikabikiwa munyumba iya Mika.

⁵ U Mika yunuyu akaba na kachipinda akache na kache akakwiputilamo. Akasona amenda agha efodi, nukubiza utufwani tumo utunandi, po akamwimika umwana wache yumo ukuti abanje muputi wache.

⁶ Mumasiku ghalaghala aba Izilayeli batakaba nu mwene. Po umuntu wesi akabombagha bulo vivyo vikumuhobosya.

⁷ Pakabalilo kalakala, mukaya akakulu nkani aka Betelehemu muchisu icha Yuda mukabamo umulumendo yumo uwa luko ulwa Yuda, sona akaba mu Levi.

⁸ Umulumendo yunuyu akepamo mukaya akakulu nkani aka Betelehemu kala pakulonda ubuzilo ubunji ubwakwikalamo. Bo ali pabulendo bwache akafika kunyumba iya Mika muchisu icha mumaghamba icha Efulayimu.

⁹ U Mika akamulalusya akati, “Nkimba wafuma kwiyi?” Umulumendo yula akamwamula akati, “Ane ne mu Levi wamu Betelehemu muchisu icha Yuda, nkulonda apakwikalapo.”

¹⁰ Po u Mika akamubuzya akati, “Ikalagha nane, ubanje we wakumanyisya amahala, sona nu muputi wane. Nkwiza pakukulipila isalabazya izya siliva 10 pamwaka, nukukupa amenda ni chakulya.”

¹¹ Umu Levi yula akitika, po akikalagha nawe ngati po mwana uwache nu wache.

¹² U Mika akamwimika umu Levi yula pakuba muputi wache, nukwikala nawe munyumba yache.

¹³ U Mika akati, “Losi ulu inzimenye ukuti u Mwene akwiza pakunsaya pachifukwa ichakuti umu Levi muputi wane.”