Abalongi 15 - IBAYIBOLO 2024

¹ Pisinda pache pakabalilo akakwinulila ingano, u Samusoni akasenda umwana uwa mbuzi nukubuka pakumwendela umuchi wache. Akamubuzya uwisevyala akati, “Nkulonda pakwangala nu muchi wane muchipinda chache.” Loli uwisevyala yula akamukanila.

² Uwise uwa mulindu akamula akati, “Nkinong'onagha ukuti naloli utakamughana umwana wane, po nkayipa isindizi yako. Nkimba umuzuna wache atakuboneka mwizapo ukumuchila umukulu wache yula? Ungamusenda umuzuna wache yula ukuti abanje muchi wako mubuzilo bwache?”

³ U Samusoni akati, “Akabalilo aka intangaba ninongwa nanti nkubabombela aba Filisiti ichintu ichibibi.”

⁴ Po akabuka nukubalema abakabila 300 nukubapinyizannya imisinda babilibabili, po akapinyilila ichikoka ku misinda yabo.

⁵ Po akakozya ivikoka vila numoto nukubasatulila abakabila bala mumaghunda agha ngano agha ba Filisiti, ghagho ghakaba papipi ukuti binule. U Samusoni akavyochannya ivibunga ivya ngano, ni ngano yiyo bakaba bachili pakwinula, na maghunda agha mampesya, poka na maghunda agha misyunguti.

⁶ Aba Filisiti bakanda pakubuzikizya ukuti, “Nkimba wewenu abomba bunubu?” Bakabuziwa ukuti, “We Samusoni umukwalima uwa umu Timuna, pachifukwa ichakuti umuchi wache akapeghiwa kwa sindizi yache.” Po aba Filisiti bakiza nukumocha umukolo yula poka na bamunyumba iya wise.

⁷ U Samusoni akababuzya akati, “Pakuti mwabomba bunubu, nkulapa ukuti ntakwiza pakubaleka nalumolumo mupaka imbatanizye.”

⁸ Akalwa nabo nkani ubwite nukubaghogha abantu abinji. Po akinjila mumpako iya mu Etamu nukwikala mulamula.

U Samusoni akubapota aba Filisiti

⁹ Pisinda pache aba Filisiti bakazenga ivisakasa vyabo muchisu icha Yuda, nukulwa ubwite nakaya akakulu aka Lehi.

¹⁰ Abantu aba mu Yuda bakalalusya bakati, “Nkimba choni chicho mwiza pakulwa naswe ubwite?” Abantu bala bakamula bakati, “Twiza pakumupinya u Samusoni, umwakuti tubombe nawe ukuyana na zizyo akatubombela.”

¹¹ Po abantu 3,000 aba mu Yuda bakabuka kumpako iya mu Etamu nukumulalusya u Samusoni ukuti, “Nkimba utakuzyaghannya ukuti aba Filisiti bo babo bakutulaghila? Nkimba choni chicho watubombela bunubu?” U Samusoni akamula akati, “Ane nababombela ukuyana na zizyo bakambombela.”

¹² Abantu bala bakamubuzya bakati, “Twiza pakukupinya ukuti tukubike munyobe izya ba Filisiti.” U Samusoni akabamula akati, “Lapa ukuti amwe mutakwiza pakungogha.”

¹³ Abantu bala bakamula bakati, “Twitika. Aswe tukwiza pakukupinya bulo nukukubika munyobe zyabo, sona tutakwiza pakukughogha.” Po bakamupinya ninkusa zizyo bakakasa bulo nukumwefyamo mumpako mula.

¹⁴ Bo afika papipi nu Lehi, aba Filisiti bakiza kukwache, bo bakukolomoka. Umuzimu uwa Mwene ghukamwikila u Samusoni nukumupa amaka. Po inkusa zizyo bakamupinya nazyo zikawa munyobe zyache ngati po zilunguliye numoto.

¹⁵ U Samusoni akayagha injegho iya mpunda, yiyo yikaba ukuti yafwa bulo, akayiseba nukubaghoghela abantu 1,000.

¹⁶ Po u Samusoni akimba ulwimbo ulwakuti, “Ni njegho iya mpunda, nkabaghogha abantu 1,000. Ni njegho iya mpunda, nkavighogha ivibunga ni vibunga ivya bantu.”

¹⁷ Pisinda pache akayisumba injegho yila, po ubuzilo bula bakabwita ukuti Lamati Lehi.

¹⁸ Pakabalilo kalakala u Samusoni akaba ni nyota nkani, po akamulilila u Mwene akati, “Wamupa umubombi wako ubupoti ubukulu nkani. Po nkimba losi ulu imfwe ni nyota nukuwila munyobe izya bantu babo batasilimuliwe?”

¹⁹ Po u Chala akighula ichiliba mu Lehi, amizi ghakafuma pachiliba chila. Bo u Samusoni ang'wela amizi ghala, akaba sona na maka. Po ubuzilo bula bakabwita ukuti Eni Hakole, sona buliko mu Lehi mupaka nilelo bulo.

²⁰ U Samusoni akaba mulongi uwa ba Izilayeli amaka 20, bo aba Filisiti bakulaghila ichisu chila.