Abalongi 14 - IBAYIBOLO 2024

U Samusoni nu mulindu wamu Timuna

¹ Isiku limo u Samusoni akabuka ku Timuna, po kulakula akamwagha umulindu yumo umu Filisiti.

² Bo abwelako akamubuzya uwise nu nyina akati, “Namwennya umulindu yumo umu Filisiti mu Timuna, buka unsendele ukuti abanje muchi wane.”

³ Loli uwise nu nyina bakamwamula bakati, “Nkimba atalipo nayumo umulindu pakasi pa bakamu bako, pamo pakasi pabantu bitu yuyo angaba muchi wako? Nkimba choni chicho ukulonda pakubuka kuba Filisiti babo batasilimuliwe pakumusenda umulindu ukuti abanje muchi wako?” Loli u Samusoni akamwamula uwise akati, “Buka unsendele umulindu yulayula, pakuti weyuyo namughana.”

⁴ Abapapi bache batakamanyagha ukuti akaba we Mwene yuyo akamulongozya u Samusoni pakubomba bunubu, pakuti u Mwene akalondagha akabalilo akiza nkani akakuti alwile naba Filisiti. Pakuti pakabalilo kalakala aba Filisiti bakabalaghilagha aba Izilayeli.

⁵ Po u Samusoni akabuka ku Timuna poka nu wise nu nyina. Bo bakudumusannya mumaghunda agha mampesya ku Timuna kulakula, umwakuchenusya bulo u Samusoni akivwa umwana uwa nkalamu akumubulumila.

⁶ Umuzimu uwa Mwene ghukamwikila u Samusoni nukumupa amaka umwakuti akayizepulannya inkalamu yila pabili ni nyobe zyache ukuyana bulo namumo angamuzepulila u mwana uwa mbuzi. Loli atakamubuzyapo uwise pamo unyina zinizi.

⁷ U Samusoni akabuka pakumusipa umulindu yula, po akamughana nkani.

⁸ Bo pachilapo akabalilo, u Samusoni akanyokela pakumusenda umulindu yula, po akapaghuka pakuyennya inkalamu infwe yila. Mu nkalamu mula akazyaghamo izuchi nu buchi bumo.

⁹ Akaswaghila ubuchi bula munyobe zyache nukulya bo akwenda. Bo afika ku bapapi bache akabapako ubuchi bumo, po bope bakalya. Loli atakababuzya ukuti aswagha ubuchi bula mu nkalamu imfwe.

¹⁰ Uwise akabuka poka nu mwana wache pakumwennya umukolo yula. Kulakula u Samusoni akaba nu lusekelo ukuyana ni nyiho izya sendwa.

¹¹ Bo aba Filisiti bamwennya bakamusendela abalumendo 30 ukuti bikalaye nawe.

¹² U Samusoni akababuzya akati, “Leka imbilikile ichili. Nanti mungambuzya iching'anamulo chache mumasiku seveni agha lusekelo ulu, nkwiza pakubapa amenda 30 amatonte, na menda 30 aghanji.

¹³ Nanti mutakumbuzya iching'anamulo chache kokuti amwe mukwiza pakumpa amenda 30 amatonte, na menda 30 aghanji.” Po bakamubuzya bakati, “Twilikile twivwe.”

¹⁴ Po akababuzya akati, “Mu chintu chicho chikulya ivyamwabo mukafuma ichakulya. Mu chintu chicho chamaka mukafuma ichinonu.” Loli batakamwamula pa masiku matatu.

¹⁵ Pisiku ilyafolo bakamubuzya umuchi uwa Samusoni bakati, “Mudebe umulume wako ukuti atulingannye iching'anamulo icha chili, nanti utakutubuzya tukwiza pakukocha awe poka na bamunyumba iya ghuso. Nkimba ukatwitizya kuno ukuti utupele pakuba twe bapina?”

¹⁶ Po umuchi uwa Samusoni akanda pakumulila umulume nukuti, “Wee mulume wane, fwandi umbengite? Awe utanganite napo panandi. Wabilikiye abantu bane ichili, loli utambuzizye iching'anamulo chache.” U Samusoni akamula akati, “Ntamubuzizyepo utata pamo umayi wane. Po nkimba choni chicho nkulingannye iching'anamulo chache?”

¹⁷ Umukolo yula akamulililagha bulo u Samusoni amasiku seveni agha lusekelo. Pabumalilo, pisiku ilyaseveni akamulingannya iching'anamulo icha chili chila, pachifukwa ichakuti akamuzumagha nkani nizya chili chilachila.

¹⁸ Pisiku ilyaseveni, bo ni zuba litinjiye, abantu aba mukaya akakulu kala bakamubuzya u Samusoni bakati, “Nkimba chintu choni chicho chinonite ukubuchila ubuchi? Nkimba chintu choni chicho chamaka ukuyichila inkalamu?” Po u Samusoni akababuzya akati, “Nanti mutakalimilagha impampali yane, ngali mutakambuzya iching'anamulo icha chili chane.”

¹⁹ Po Umuzimu uwa Mwene ghukamwikila u Samusoni nukumupa amaka, umwakuti akabuka ku Ashikeloni nukubaghogha abanavuli 30, sona akabafyula ivintu vyabo nukusenda amenda ghabo nukubapa abantu babo bakamubuzya iching'anamulo icha chili chila. U Samusoni akabwela, bo akalaye nkani.

²⁰ Pakabalilo kanako umuchi uwa Samusoni akapeghiwa kwa sindizi wache yula.