Abalongi 13 - IBAYIBOLO 2024

Ukupapiwa ukwa Samusoni

¹ Aba Izilayeli bakamunangila sona u Mwene, po u Mwene akababika munyobe izya ba Filisiti amaka 40.

² Kukabako umuntu yumo ku Zola uwa luko ulwa Dani, yuyo akaba we Manowa. Umuchi akaba mughumba.

³ Uwantumi uwa Mwene akamwizila umukolo yula nukumubuzya ukuti, “Wee mukolo, awe we mughumba, loli ukwiza pakumela ulwanda nukupapa umwana umulumendo.

⁴ Po uchebaye nkani! Utakang'welaye uvinyo pamo ichakung'wela chicho ungakolwa nacho. Utakalyanje ivyakulya ivyamwiko,

⁵ pachifukwa ichakuti ukwiza pakumela ulwanda nukupapa umwana umulumendo. Bo umwana uyu apapiwa, mutakamumwanje isisi zyache, pachifukwa ichakuti umulumendo uyu akwiza pakuba mu Nazili, umupaghuliwa kwa Chala ukwandila pakabalilo kako akapapiliwa. Po akwiza pakwanda imbombo iya kubapoka aba Izilayeli munyobe izya ba Filisiti.”

⁶ Umukolo yula akamupangila umulume vyosi akati, “Umubombi uwa Chala akanyizila, sona icheni chache chikoghofyanga nkani ngati cheni icha wantumi uwa Chala. Ane intakamulalusya kuko afuma, sona wepe atakitambula mwene.

⁷ Loli akambuzya akati, ‘Ukwiza pakumela ulwanda nukupapa umwana umulumendo. Po uchebaye nkani! Utakang'welaye uvinyo pamo ichakung'wela chicho ungakolwa nacho. Utakalyanje ivyakulya ivyamwiko, pachifukwa ichakuti umulumendo uyu akwiza pakuba mu Nazili, umupaghuliwa kwa Chala ukwandila pakabalilo kako akapapiliwa mupaka pisiku ilya kufwa kwache.’ ”

⁸ Po u Manowa akiputa kwa Mwene akati, “Wee Mwene, nkukulaba ukuti umutume sona umuntu uwa Chala, yuyo wamutumite ukuti atumanyisye namumo tungamusungilila umulumendo uyu, bo apapiwa.”

⁹ U Chala akamwamula u Manowa ulwiputo lwache, po uwantumi uwa Chala akamwizila sona umukolo yula, bo ikaye pasi mumughunda. Loli umulume u Manowa atakaba poka nawe.

¹⁰ Umukolo yula akachimbila pakumubuzya umulume ukuti, “Umuntu yuyo akanyizila isiku lila, anyizila sona!”

¹¹ U Manowa akanyamuka nukumukonka umuchi. Bo afika pabuzilo papo pakaba umuntu yula akamulalusya akati, “Nkimba wewe ukanenagha nu muchi wane?” Umuntu yula akamula akati, “Nene.”

¹² Po u Manowa akamulalusya akati, “Nanti amazyu ghako ghakwanilisiwa, nkimba tukwiza pakumulela bulibuli umulumendo uyu, sona akwiza pakubombagha mbombo yoni?”

¹³ Uwantumi uwa Mwene yula akamula akati, “Umuchi wako abombaye bulo zyosi zizyo namubuzya.

¹⁴ Atakalyanje chimo icha mampesya, pamo ukung'wela uvinyo, pamo ichakung'wela chicho angakolwa nacho, pamo ukulya ivyakulya ivyamwiko. Umuchi wako abombaye bulo zyosi zizyo namulamula.”

¹⁵ U Manowa akamubuzya uwantumi uwa Mwene yula akati, “Wee twalamba, ikala tasi tukughoghele umwana uwa mbuzi.”

¹⁶ Uwantumi uwa Mwene yula akamula akati, “Napapo wandaba ukuti nikale tasi, ntakwiza pakulya ichakulya chinyu. Loli nanti mukulonda pakuyannya ichakwiyipa ichakocha, mumuyanizizye u Mwene.” (Pakuti u Manowa atakazyaghannya ukuti akaba wantumi uwa Mwene.)

¹⁷ Po u Manowa akamulalusya uwantumi yula akati, “Nkimba itabwa lyako wewenu, umwakuti tungakuchindika nanti amazyu ghako ghakwanilisiwa?”

¹⁸ Uwantumi yula akamula akati, “Nkimba choni chicho ukundalusya itabwa lyane? Itabwa lyane utangalyivwisya.”

¹⁹ Po u Manowa akasenda umwana uwa mbuzi ni chakwiyipa icha busu nukuvibika pilyalabwe ukuti chibanje chakwiyipa kwa Mwene, yuyo akabomba iviswigho, bo u Manowa nu muchi wache bakwennya na maso ghabo.

²⁰ Bo indimi izya moto zikukwela kumwanya pachighemo pala, uwantumi uwa Mwene akakwela kumwanya mu ndimi izya moto zila. Bo u Manowa nu muchi bennya zinizi bakakupama pasi.

²¹ Uwantumi uwa Mwene yula atakamubonekela sona u Manowa nu muchi wache. Po u Manowa akazyaghannya ukuti akaba wantumi uwa Mwene.

²² U Manowa akamubuzya umuchi akati, “Naloli tukwiza pakufwa, pachifukwa ichakuti twamwennya u Chala.”

²³ Loli umuchi akamwamula akati, “Nanti u Mwene akalondagha pakutughogha, ngali atakapokela ichakwiyipa chitu ichakocha nicha busu ichi, pamo ukutulanjizya nukutubuzya ivintu vyosi vinivi.”

²⁴ Umukolo yula akapapa umwana umulumendo nukumwita ukuti we Samusoni. Umulumendo yula akakula, po u Mwene akamusaya.

²⁵ Umuzimu uwa Mwene akanda pakumupa amaka, bo ali mu Mahane Dani, akaya akakulu kako kakaba pakasi pa kaya aka Zola naka Eshitawoli.