Abalongi 12 - IBAYIBOLO 2024

Nizya Yefuta naba Efulayimu

¹ Aba Efulayimu bakababungannya poka abasilikali babo, nukulobokela ku Zafoni, po bakamulalusya u Yefuta bakati, “Nkimba choni chicho ukabuka pakulwa ubwite naba Amoni ukusita ukutwitizya ukuti tubuke poka nawe? Aswe tukwiza pakuyocha inyumba yako bo awe uli mukasi.”

² U Yefuta akabamula akati, “Ane poka na bantu bane tukadalinkana nkani naba Amoni. Napapo ane nkabitizya, amwe mutakampoka munyobe zyabo.

³ Bo nennya ukuti mutanganyavwa, ane nkabika ubumi bwane pachulu nukuloboka pakulwa ubwite naba Amoni, po u Mwene akababika munyobe zyane. Nkimba choni chicho ilelo mwiza pakulwa ubwite nane?”

⁴ U Yefuta akababungannya poka abantu bosi aba mu Giliyadi nukulwa ubwite naba Efulayimu. Aba Giliyadi bakabapota aba Efulayimu, pachifukwa ichakuti aba Efulayimu bakati, “Amwe mwe ba Giliyadi mwe bachimbila ubwite mu Efulayimu, na mu Manase.”

⁵ Po aba Giliyadi bakabafyula aba Efulayimu amaloboko agha lusoko ulwa Yolodani aghakulobokela ku Efulayimu, sona akabalilo kosi nanti umu Efulayimu wesi uwakuchimbila akulaba ukuti, “Munyitikizye ukuti indoboke,” aba Giliyadi bakamulalusyanga ukuti, “Nkimba we mu Efulayimu?” Nanti amula ukuti, “Awe,”

⁶ bakamubuzya bakati nena ukuti, “Shiboleti.” Loli nanti umuntu yula anena ati, “Siboleti,” pachifukwa ichakuti akapotwa pakutambula akiza, bakamulema nukumughogha piloboko ilya lusoko ulwa Yolodani. Pakabalilo kalakala aba Efulayimu 42,000 bakaghoghiwa.

⁷ U Yefuta akaba mulongi uwa ba Izilayeli amaka sikisi. Po u Yefuta umu Giliyadi akafwa nukusyiliwa mukaya kache akakulu nkani aka Giliyadi.

Nizya Ibizani nu Eloni, sona nu Abidoni

⁸ Bo u Yefuta afwa, u Ibizani waku Betelehemu akaba mulongi uwa ba Izilayeli.

⁹ U Ibizani akaba na bana abalumendo 30, na abana abalindu 30. Abana bache abalindu bala, bakasendwa ku banavuli abaluko ulunji. Abana bache abalumendo akabasendela abakolo 30 abaluko ulunji pakuba bachi babo. U Ibizani akaba mulongi uwa ba Izilayeli amaka 7.

¹⁰ Po u Ibizani akafwa nukusyiliwa mukaya akakulu nkani aka Betelehemu.

¹¹ Bo u Ibizani afwa, u Eloni uwa luko ulwa Zebuloni akaba mulongi uwa ba Izilayeli amaka 10.

¹² Po u Eloni akafwa nukusyiliwa mu Ayaloni muchisu icha Zebuloni.

¹³ Bo Eloni afwa, u Abidoni umwana uwa Hileli wamu Pilatoni akaba mulongi uwa ba Izilayeli.

¹⁴ U Abidoni akaba na bana abalumendo 40, na bizukulu 30, babo bakakwela pampunda inyanavuli 70. U Abidoni akaba mulongi uwa ba Izilayeli amaka 8.

¹⁵ Po u Abidoni umwana uwa Hileli akafwa nukusyiliwa mu Pilatoni mu Efulayimu, muchisu icha mumaghamba icha ba Amaleki.