Abalongi 11 - IBAYIBOLO 2024

¹ U Yefuta umu Giliyadi akaba musilikali umujimvu nkani. Uwise akaba we Giliyadi, unyina akaba we malaya.

² Umuchi uwa Giliyadi akamupapila abana abalumendo, bo abana bala bakula bakamuchimbizyapo u Yefuta pakaya pala nukumubuzya ukuti, “Awe utakwiza pakupyana ichilingo icha tata witu, pachifukwa ichakuti awe ufumite mwa mayi uyunji.”

³ Po Yefuta akabachimbila abawamwabo nukusamila muchisu icha Tobu. Kulakula akabadeba abantu bamo abamwalwe ukuti bamukonke.

⁴ Bo pachilapo akabalilo, aba Amoni bakabuka pakulwa ubwite naba Izilayeli.

⁵ Po abasongo aba mu Giliyadi bakabuka ku Tobu pakumusenda u Yefuta.

⁶ Abasongo bala bakamubuzya u Yefuta bakati, “Zagha ubanje we songo uwa basilikali bitu, umwakuti tulwe ubwite naba Amoni.”

⁷ Loli u Yefuta akabamula akati, “Amwe mukambenga nkani umwakuti mukanchimbizyamo munyumba iya tata wane. Po nkimba choni chicho mukwiza sona kukwane bo muli muntamyo?”

⁸ Po abasongo bala bakamwamula u Yefuta bakati, “Ichi cho chifukwa twiza sona kukwako ukuti ubanje we songo uwa basilikali bitu, umwakuti tulwe ubwite naba Amoni, sona ukwiza pakuba we mulongozi uwa bantu bosi aba mu Giliyadi.”

⁹ U Yefuta akabamula akati, “Nanti mukunsendela sona kunyumba pakulwa ubwite naba Amoni, po buli nanti u Mwene ababika munyobe zyane, nkimba naloli nkwiza pakuba ne mulongozi winyu?”

¹⁰ Abasongo bala bakamwamula bakati, “U Mwene we kaboni witu, sona tukwiza pakubomba vivyo wanena.”

¹¹ Po u Yefuta akabuka na basongo aba mu Giliyadi bala, nukwimikiwa pakuba we mulongozi wabo, sona nu songo uwa basilikali babo. U Yefuta akapyanizya sona amazyu ghache pamaso pa Mwene bo ali mu Mizipa.

¹² Pisinda pache u Yefuta akatuma intumi kwa mwene uwa ba Amoni pakumulalusya ukuti, “Nkimba tukunangiye ichoni ukuti ulwe ubwite ni chisu chitu?”

¹³ U mwene uwa ba Amoni akazyamula intumi zila akati, “Bo aba Izilayeli bakwepamo mu Ijiputi bakanfyula ichisu chane ukwandila ku Alinoni mupaka ku Yaboki, sona nukufika kulusoko ulwa Yolodani. Ilelo munyosezye mumutende.”

¹⁴ U Yefuta akazituma sona intumi zila kwa mwene uwa ba Amoni

¹⁵ nukuti, “U Yefuta ati: Aba Izilayeli batakachifyulapo nachimo ichisu icha ba Mowabu pamo nicha ba Amoni.

¹⁶ Loli bo aba Izilayeli bakwepamo mu Ijiputi, baka dumusannya munkolongo mupaka kunyanja Inchesamu nukufika mu Kadeshi.

¹⁷ Po Aba Izilayeli bakatuma intumi kwa mwene wamu Edomu pakumulaba ukuti, ‘Utwitikizye ukuti tudumusannyemo muchisu chako.’ Loli u mwene wamu Edomu akakana. Bakamulaba sona u mwene wamu Mowabu, wepe akakana. Po aba Izilayeli bakikala mu Kadeshi.

¹⁸ “Po bakenda ubulendo bwabo pakudumusannya munkolongo nukuchizyungulila ichisu icha Edomu ni icha Mowabu, mupaka bakafika kubufumilo ubwa lusoko ulwa Alinoni nukuzenga ivisakasa vyabo kulakula. Loli batakalobokela mu Mowabu pachifukwa ichakuti ulusoko ulwa Alinoni yikaba yo mpaka.

¹⁹ Pisinda pache aba Izilayeli bakatuma intumi kwa Sihoni u mwene uwa ba Amoli yuyo akalaghilagha mu Heshiboni pakumulaba ukuti, ‘Utwitikizye ukuti tudumusannyemo muchisu chako, bo tukubuka kuchisu chitu.’

²⁰ Loli u Sihoni atakabitikizya aba Izilayeli ukuti badumusannyemo muchisu chache. Po akababungannya poka abasilikali bache mu Yahazi, nukulwa ubwite naba Izilayeli.

²¹ “Loli u Mwene u Chala uwa ba Izilayeli akamubika u Sihoni, poka na bantu bache bosi munyobe izya ba Izilayeli nukubapota. Po aba Izilayeli bakachifyula ichisu chosi icha ba Amoli, babo bakikalagha muchisu chilachila,

²² ukwandila ko kulusoko ulwa Alinoni mupaka kulusoko ulwa Yaboki, sona nukwandila munkolongo mupaka kulusoko ulwa Yolodani.

²³ “Pakuti u Mwene u Chala uwa ba Izilayeli abachimbizya aba Amoli pamaso pabantu bache aba Izilayeli, nkimba awe uli nu bulaghili boni abwakuchifyulila ichisu chinichi?

²⁴ Nkimba mutangasenda ivintu vivyo uchala winyu u Kemoshi abapiye? Umwakuyana bulo, aswe tukwiza pakusenda ivintu vyosi vivyo u Mwene u Chala witu atupiye.

²⁵ Nkimba mukwinong'ona ukuti mwe bizapo ukumuchila u Balaki, umwana uwa Zipola, u mwene uwa ba Mowabu? Nkimba u Balaki akadalinkanapo naba Izilayeli, pamo ukulwa nabo ubwite?

²⁶ Aba Izilayeli bakikalagha mu Heshiboni na mu Aloweli na mutwaya utupalamani sona na mutwaya tosi utukulu tuto tuli mulubazu lwalusoko ulwa Alinoni amaka 300. Nkimba choni chicho mutakabufyula ubuzilo bula pakabalilo kalakala?

²⁷ Ane intabanangiyepo nalumolumo, loli amwe mukunangila pakulwa nane ubwite. U Mwene yuyo we Mulongi ilelo alongaye inongwa yiniyi pakasi paba Izilayeli naba Amoni.”

²⁸ Loli u mwene uwaku Amoni akaghasula amazyu ghagho u Yefuta akamutumila.

²⁹ Po Umuzimu uwa Mwene ghukamwikila u Yefuta, umwakuti akaloboka ichisu icha Giliyadi ni icha Manase nukudumusannya mu Mizipa mu Giliyadi. Po akabuka pakulwa ubwite naba Amoni.

³⁰ U Yefuta akalapa kwa Mwene akati, “Nanti wababika aba Amoni munyobe zyane,

³¹ umuntu wesi yuyo akufumila pamulyango uwa nyumba yane pakukomana nane, bo nabwelako pakubapota aba Amoni, nkwiza pakumubika ukuti chibanje chakwiyipa ichakocha kwa Mwene.”

³² U Yefuta akabuka pakulwa ubwite naba Amoni, po u Mwene akababika aba Amoni munyobe zyache.

³³ U Yefuta akatunangannya utwaya utukulu 20 ukwandila ku Aloweli mupaka ku Miniti, sona mupaka ku Abeli Kelamimu. Po umu momumo aba Izilayeli bakabapotela aba Amoni.

Nizya mwana umulindu uwa Yefuta

³⁴ Bo u Yefuta akubwela ku Mizipa, akamwennya umwana wache umulindu akwiza pakukomana nawe, bo ali pakulizya ichisekeseke nukwimba. Akaba mwana wache mwene na mwene.

³⁵ Bo u Yefuta amwennya umwana wache yula, akazepula amenda ghache nukulila ukuti, “Wee mwana wane! Wamvulazya umoyo, sona wanyizila nintamyo, pachifukwa ichakuti ichilapo chicho nkalapa kwa Mwene intangachandula.”

³⁶ Umwana yula akamula akati, “Wee tata, awe ukalapa kwa Mwene, po bombagha bulo zizyo ukulapa, pakuti ilelo u Mwene abatanizya abalwani bako aba Amoni.”

³⁷ Loli umulindu yula akati, “Unyitikizye ukuti imbombe tasi ichintu choka. Undeke amezi mabili, ukuti nendendeke mumaghamba umwakuti indile poka na bamanyani bane, pachifukwa ichakuti ntakwiza pakusendwapo nalumo nukufwa umusita bana.”

³⁸ Uwise akamubuzya akati, “Bukagha.” Po akamwitikizya ukuti abuke amezi mabili. Umulindu yula poka na bamanyani bache bakakwela mumaghamba nukwanda pakulila, pachifukwa ichakuti atakwiza pakuba na bana.

³⁹ Bo ghachilapo amezi mabili, umulindu yula akanyokela kwa wise, po uwise akabomba nawe vivyo akalapa kwa Mwene, umulindu yula atakasendwapo nalumolumo. Po ichi chikanduka pakuba lwiho pakasi paba Izilayeli

⁴⁰ ulwakuti abana abalindu aba ba Izilayeli bakabukagha pakumulila umwana uwa Yefuta umu Giliyadi amasiku folo umwaka nu mwaka.