Abalongi 10 - IBAYIBOLO 2024

Nizya Tola

¹ Bo u Abimeleki afwa, pakizapo u Tola umwana uwa Puwa umwizukulu uwa Dodo, weyuyo akakonkapo pakubapoka aba Izilayeli. U Tola akaba waluko ulwa Isakala, loli akikalagha mu Shamili muchisu icha mumaghamba icha Efulayimu.

² U Tola akaba mulongi uwa ba Izilayeli amaka 23, po akafwa nukusyiliwa mu Shamili.

Nizya Yayili

³ Bo u Tola afwa, pakizapo u Yayili umu Giliyadi, yuyo akaba mulongi uwa ba Izilayeli amaka 22.

⁴ U Yayili akaba na bana abalumendo 30, babo bakakwela pampunda inyanavuli 30. Abana bache banaba bakaba nutwaya utukulu nkani 30 mu Giliyadi, tuto mupaka nilelo bulo tukwitiziwa ukuti Havoti Yayili.

⁵ Bo u Yayili afwa, akasyiliwa mu Kamoni.

Nizya Yefuta

⁶ Aba Izilayeli bakamunangila sona u Mwene, pakamuchindika u Baala nu Ashitoleti na bachala aba ba Siliya na bachala aba ba Sidoni na bachala aba ba Mowabu na bachala aba ba Amoni sona na bachala aba ba Filisiti. Aba Izilayeli bakamukana u Mwene nukuleka pakumubombela.

⁷ Po u Mwene akabakalalila nkani nukubabika munyobe izya ba Filisiti, sona nizya ba Amoni.

⁸ Umwaka ghulaghula aba Filisiti bala bakabapota aba Izilayeli, babo bakikalagha kwisila ilya lusoko ulwa Yolodani mu Giliyadi muchisu icha ba Amoli, po bakabayivya amaka 18.

⁹ Aba Amoni bope bakaloboka ulusoko ulwa Yolodani pakulwa ubwite na baluko ulwa Yuda nulwa Benjamini, sona na bamunyumba iya Efulayimu, umwakuti aba Izilayeli bakaba muntamyo inkulu nkani.

¹⁰ Po aba Izilayeli bakamulilila u Mwene bakati, “Twakunangila, pachifukwa ichakuti twakukana awe we Chala witu nukumubombela u Baala.”

¹¹ U Mwene akabamula akati, “Nkimba intakabapoka munyobe izya ba Ijiputi nizya ba Amoli nizya ba Amoni sona nizya ba Filisiti?

¹² Nizya ba Sidoni nizya ba Amaleki sona nizya ba Mawoni pakabalilo kako mukandilila ukuti imbavwe, bo bakubayivya nkani, nkimba intakabapoka munyobe zyabo?

¹³ Loli pope bulo amwe mukandeka nukubabombela abachala abanji, po ntakwiza pakubapoka sona.

¹⁴ Bukagha, mubalilile abachala babo mwabasala. Baleke babapoke muntamyo zyinyu.”

¹⁵ Loli aba Izilayeli bakamwamula u Mwene bakati, “Twananga. Bomba bulo chosi chicho ukwinong'ona ukuti chiza, loli twalamba ukuti utupoke umusanya ughu.”

¹⁶ Po bakabefya abachala abayeni bala pakasi papabo nukumubombela u Mwene. U Mwene akaba ni chitima naba Izilayeli pachifukwa icha mayimba ghabo.

¹⁷ Aba Amoni bakabungana poka pakulwa ubwite, po bakazenga ivisakasa vyabo mu Giliyadi. Aba Izilayeli bope bakabungana poka nukuzenga ivisakasa vyabo mu Mizipa.

¹⁸ Abalongozi aba Giliyadi bakanenezannya bakati, “Umuntu wesi yuyo akwiza pakuba wakwanda pakulwa ubwite naba Amoni akwiza pakuba mulaghili uwa bantu bosi babo bakwikala mu Giliyadi.”