Abalongi 1 - IBAYIBOLO 2024

Abaluko ulwa Yuda, naba Simiyoni bakumulema u Adonibezeki

¹ Bo u Yoshwa afwa aba Izilayeli bakamulalusya u Mwene bakati, “Nkimba luko loni lulo lukwiza pakuba lwakwanda pakulwa ubwite naba Kenani?”

² U Mwene akamula akati, “Abaluko ulwa Yuda bo babo babanje bakwanda. Ane nachibika ichisu chinichi munyobe zyabo.”

³ Po abaluko ulwa Yuda bakanena naba Simiyoni abakamu babo bakati, “Twende tubukaye kuchisu chicho twapeghiwa nu Mwene ukuti twebosi poka tulwe ubwite naba Kenani. Pisinda pache naswe bulo tukwiza pakubuka namwe kuchisu chicho mupeghiwe.” Po aba Simiyoni bakalongozannya nabo.

⁴ Abaluko ulwa Yuda bala bakabuka pakulwa ubwite, po u Mwene akababika aba Kenani naba Pelezi munyobe zyabo nukubapota abantu 10,000 mu Bezeki.

⁵ Kulakula bakamwagha u mwene u Adonibezeki nukulwa nawe ubwite, nukubapota aba Kenani, sona naba Pelezi.

⁶ U Adonibezeki akachimbila, loli bakamuchimbizya nukumulema, po bakamudumula abachisumwe aba munyobe naba munyayo.

⁷ Po u Adonibezeki akati, “Abamwene 70 babo bakadumuliwa abachisumwe aba munyobe naba munyayo bulo bakasebagha utubululusya pasi pitebulo lyane. Ilelo u Chala antanizya pa zizyo nkababombela abantu balabala.” Bakamusenda nukubuka nawe ku Yelusalemu, po akafwila kulakula.

Abaluko ulwa Yuda bakukapota akaya akakulu nkani aka Yelusalemu naka Hebuloni

⁸ Abaluko ulwa Yuda bakalwa ubwite nakaya akakulu nkani aka Yelusalemu nukukafyula. Bakabaghogha abantu bosi mulamula nukukocha.

⁹ Pisinda pache bakabuka pakulwa naba Kenani, babo bakikalagha muchisu icha mumaghamba, naba mu Negebu, sona naba muchisu icha muntende.

¹⁰ Bakalwa sona ubwite naba Kenani babo bakikalagha mu Hebuloni, akaya kako kale kakitiziwanga ukuti Kiliyati Aliba. Kulakula akamupota u Sheshayi nu Ahimani, sona nu Talimayi.

U Otiniyeli akukapota akaya akakulu nkani aka Debili

¹¹ Abaluko ulwa Yuda bakabuka pakulwa ubwite nakaya aka Debili, kako kale kakitiziwanga ukuti Kiliyati Sefele.

¹² U Kalebu akati, “Umuntu yuyo angalwa ubwite nukukafyula akaya aka Kiliyati Sefele nkwiza pakumupa umwana wane umulindu u Akisa ukuti abanje muchi wache.”

¹³ U Otiniyeli umwana uwa Kenazi, yuyo akaba muzuna uwa Kalebu akakapota akaya kala. Po u Kalebu akamupa umwana wache umulindu u Akisa ukuti abanje muchi wache.

¹⁴ Pisiku limo bo u Akisa afika bulo, u Otiniyeli akamufyenga umuchi ukuti amulabe uwise umughunda. Bo u Akisa ika pampunda yache, u Kalebu akamulalusya akati, “Nkimba ukulonda ichoni?”

¹⁵ U Akisa akamwamula uwise akati, “Nalamba, natinji umpeko ichabupi, pachifukwa ichakuti umpiye ichisu ichumizu mu Negebu, po umpeko sona ni mbwibwi izya mizi.” Po Kalebu akamupako imbwibwi izya mizi. Akamupa imbwibwi izya kumitu nizya kuntende.

Ukupota ukwa ba Yuda, naba Benjamini

¹⁶ Abaluko ulwa Keni, yuyo akaba we wisevyala uwa Mozesi, bakabuka kukaya akakulu nkani aka mabale, poka na baluko ulwa Yuda nukwikala pakasi pabantu babo bakikalagha munkolongo iya Yuda muchisu icha Negebu papipi ni chisu icha Aladi.

¹⁷ Po abaluko ulwa Yuda bakalongozannya naba Simiyoni pakulwa ubwite naba Kenani mukaya aka Zefati, nukukanangannya nkani akaya kala. Polelo akaya kala kakitiziwanga ukuti Holima.

¹⁸ Abaluko ulwa Yuda bakakafyula sona akaya akakulu nkani aka Gaza naka Ashikeloni, sona naka Ekiloni poka nutwaya tosi utupalamani.

¹⁹ U Mwene akabavwa abaluko ulwa Yuda, umwakuti bakachifyula ichisu chosi icha mumaghamba, loli bakapotwa pakubachimbizyamo abantu babo bakikalagha mwikombe, pachifukwa ichakuti bakaba ni ngolo izya chela.

²⁰ Akaya akakulu nkani aka Hebuloni bakamupa u Kalebu, ukuyana namumo u Mozesi akalayizizya. U Kalebu yula akazichimbizya inko zitatu izya ba Anaki.

²¹ Loli aba Benjamini bakapotwa pakubachimbizya aba Yebusi, babo bakikalagha mukaya akakulu nkani aka Yelusalemu. Aba Yebusi bachili bakwikala mulamula poka naba Benjamini.

²² Abaluko ulwa Yosefu bakalwa ubwite nakaya akakulu nkani aka Beteli, po u Mwene akabavwa.

²³ Bo babatuma abatendezi pakutendela akaya akakulu nkani aka Beteli, kako kale kakitiziwanga ukuti Luzi,

²⁴ bakamwennya umuntu yumo akwepamo mukaya akakulu nkani kala, po bakamubuzya bakati, “Tulanjizyeko izila iyakwinjilila mukaya akakulu nkani kanaka, aswe tukwiza pakukupelela ichisa.”

²⁵ Akabalanjizya izila iyakwinjilila mukaya akakulu nkani kala, po bakabaghogha abantu bosi mulamula, loli bakamuleka mumi umuntu yula poka na bamunyumba yache yosi.

²⁶ Po umuntu yula akabuka pakwikala muchisu icha ba Hiti, kuko akazengako akaya akakulu nkani, nukukita ukuti Luzi, lilyo lyo litabwa lyache mupaka nilelo bulo.

Abantu babo aba Izilayeli batakabachimbizya

²⁷ Loli aba Manase batakabachimbizya abantu aba mu Beti Shani pamo aba mu Tanaki pamo aba mu Doli pamo aba mu Ibuleyamu pamo aba mu Megido poka nutwaya utupalamani, po aba Kenani bakendelela pakwikala mulamula.

²⁸ Bo aba Izilayeli baba na maka nkani ukubachila aba Kenani, bakababombezya aba Kenani imbombo iya buzya, loli pope bulo batakabachimbizyamo bosi.

²⁹ Aba Efulayimu batakabachimbizyamo aba Kenani, babo bakikalagha mu Gezeli. Loli aba Kenani bakendelela pakwikala mulamula pakasi papabo.

³⁰ Aba Zebuloni batakabachimbizyamo aba Kenani babo bakikalagha mu Kitiloni, naba mu Nahalali. Aba Kenani bakendelela pakwikala pakasi papabo, loli bakababombezya imbombo iya buzya.

³¹ Bope aba Asheli batakabachimbizyamo abantu babo bakikalagha mu Ako naba mu Sidoni naba mu Ahilabi naba mu Akizibu naba mu Helibali naba mu Afeki sona naba mu Lehobu.

³² Ichi cho chifukwa aba Asheli bakikala pakasi paba Kenani, pakuti aba Kenani batakabachimbizyamo.

³³ Aba Nafutali batakabachimbizyamo abantu babo bakikalagha mu Beti Shemeshi, sona naba mu Beti Anati. Loli aba Nafutali bakikala pakasi paba Kenani, umwakuti abantu babo bakikalagha mu Beti Shemeshi na mu Beti Anati bakababombezya imbombo iya buzya.

³⁴ Aba Amoli batakabachimbizyamo aba Dani muchisu icha mumaghamba, sona batakabitikizya ukuti bike pakwikala mwikombe.

³⁵ Aba Amoli bakendelela pakwikala pighamba ilya Helesi, nilya Ayaloni, sona nilya Shalibimu. Loli bo abaluko ulwa Yosefu baba na maka nkani bope bakababombezya aba Amoli imbombo iya buzya.

³⁶ Impaka iya ba Amoli yikandila kwighamba ilya Akilabimu mupaka nukufika mukaya aka Sela nukupululila.