2 Yohani 1 - IBAYIBOLO 2024

¹ Ane ne songo uwa chipanga. Nkumusimbila umukolo yuyo asaliwe nu Chala, sona na bana bache babo imbaghanite nkani. Po inte nene nemwene ne imbaghanite, loli bope na bantu bosi babo babumenye ubwanaloli.

² Tubaghanite pachifukwa icha bwanaloli bubo buli mumwitu, sona bubo bukwiza pakubamo bwila na bwila.

³ Ichisa nu mutende ivyakufuma kwa Tata u Chala poka nu Yesu Kilisitu Umwana wache vibanje naswe mubwanaloli na mulughano.

Nizya bwanaloli nu lughano

⁴ Nkahoboka nkani bo nagha ukuti abana bako bamo bakukonka ubwanaloli ukuyana namumo u Tata akatulamulila.

⁵ Polelo nkukulaba awe we mukolo umuchindikiwa ukuti, “Tughananaye.” Pakunena bunubu kute kokuti tukukusimbila ilamulo ilipya, awe, loli ilamulo lilalila lilyo twikala nalyo ukwandila ko kubwandilo.

⁶ Ulughano lulo nkulunena lwakuti tubaghiye twikalaye umwakukonka amalamulo agha Chala. Ilamulo lilyo nkubasimbila ukuyana namumo mwebosi mwivwiliye ukwandila ko kubwandilo lyakuti mubaghiye mwebosi mwikalaye mulughano.

⁷ Abazimbuli abinji babo batakwitika ukuti u Yesu Kilisitu akiza mu mubili uwa buntu, bendabenda muchisu chosi ichapasi. Abantu banaba bazimbuli, sona balwani aba Kilisitu.

⁸ Muchebaye ukuti mutakataghe chicho mwabombela imbombo, loli enelezya ukuti mwapokela umuvwalo umwizule.

⁹ Umuntu wesi yuyo ate ni chimanyisyo icha Kilisitu, loli akonjelezyapo bulo ivyache, umuntu yunuyu ate nu Chala. Loli umuntu wesi yuyo ali ni chimanyisyo chinichi, ali nu Tata, sona nu Mwana bulo.

¹⁰ Polelo umuntu wesi yuyo akwiza kukwinyu loli atakwiza ni chimanyisyo chinichi mutakamwinjizyanje munyumba zyinyu, sona kope nukumulamuka mutakamulamukaye.

¹¹ Pakuti umuntu wesi yuyo akumupokela akiza, akusendapo ichigaba mumbombo zyache imbibi.

Amazyu aghabumalilo

¹² Indi nazyo inyinji izyakuti imbabuzye amwe, loli intakulonda ukuti imbasimbile mwakalata uyu. Nkusubila ukuti imbendele nukunena namwe pamaso na pamaso, umwakuti ubuhobosu bwitu bubanje bwakufikapo.

¹³ Abana aba muyemba wako umusaliwa bakubalamuka.