2 Timoti 3 - IBAYIBOLO 2024

Nizya masiku aghabumalilo

¹ Kumbuka ukuti mumasiku aghabumalilo kukwiza pakuba utubalilo utupalapala nkani.

² Abantu bakwiza pakuba bakwiyighana bene, na baghana ndalama, na bakwitutumula, na bamituvyo, na bantuko, na basita kwivwila abapapi babo, na basita kupalizya, sona na basita ukumwiputa u Chala.

³ Bakwiza pakuba basita lughano, na basita luhobokelo, na biyebo, na bavyongo, na bakoghofya, sona na balubengo pavintu ivyiza.

⁴ Batakwiza pakuba basubiliwa, bakwiza pakuba bapopo, na bamituvyo, na bakughana ivyakwihobosya, mubuzilo ubwa kumughana u Chala,

⁵ napapo bakuboneka ngati po bakumwiputa u Chala, loli bakughakana amaka ghache. Ubaleghuke abantu banaba.

⁶ Bamo aba bantu banaba bakwinjila munyumba izya bantu nukubazimbula abakolo babo badedebaye, babo bang'wamilwe nu katundu uwa mbibi. Abakolo banaba bakuwesiwa ni vinyonywa ivyakulekanalekana,

⁷ babo bakuyezyayezya ukuti bamanyile, loli bate bakamanyilepo nalumolumo ubwanaloli.

⁸ Ngati mumo u Yanesi nu Yambule bakamusambukila u Mozesi, umwakuyana bulo, abantu banaba bakabusambukila ubwanaloli. Abantu babo inyinong'ono zyabo zibumpite, sona babo bapotwe mulwitiko.

⁹ Loli abene batakwiza pakufika pabutali, pakuti umuntu wesi akwiza pakwennya mumo bubeleye ubupunganu bwabo. Ichi cho chicho chikabombiwa bulo kwa Yanesi na kwa Yambulesi.

Ukulayizya ukwabumalilo

¹⁰ Loli wakonka ichimanyisyo chane, inkalo yane, na chicho nalondagha mubumi bwane nu lwitiko lwane nu bufisalyoyo bwane nu lughano lwane nu bujivu bwane,

¹¹ nukuvwimiwa kwane, sona na mayimba ghane. Uzimenye ukuti vyosi vivyo vikangwila mu Antiyokiya, na mu Ikoniya, sona na mu Lisitila, nkajimba nkani! Loli u Mwene akampoka muvintu vyosi vinivi.

¹² Umuntu wesi yuyo akulonda pakuba nubumi ubwakumwiputa u Chala pakumamatilana poka nu Kilisitu u Yesu, naloli akwiza pakuvwimiwa.

¹³ Loli abantu ababibi na bazimbuli bakwiza pakonjelelakonjela akuba babibi nukubazimbula abantu abanji, loli bope bakwiza pakuzimbuliwa.

¹⁴ Loli awe, endelela pakulemezya ubwanaloli bubo ukamanyisiwa, sona ubusubile nkani, pakuti ubamenye babo bakakumanyisya zinizi.

¹⁵ Uzimenye sona ukuti ukwandila ko kubwana bwako, waghamanya Amasimbo Amazelu ghagho ghangakupa amahala ukuti impokiwe ukwendela mu lwitiko mwa Kilisitu Yesu.

¹⁶ Amasimbo ghosi ghakafutiliwa nu Chala, sona miza pakumanyizizya, pakususya chicho chibibi, pakugholosya chicho chinyonganite, sona nukubamanyisya abantu ukuti babanje ni nkalo ingolosu

¹⁷ umwakuti umubombi uwa Chala abanje wakufikapo, sona wakwiyannya pakubomba imbombo zyosi inyiza izyakulekanalekana.