2 Timoti 2 - IBAYIBOLO 2024

Nizya musilikali umwiza uwa Kilisitu u Yesu

¹ Wee mwana wane, wimaye nkani ukwendela muchisa chicho chili mwa Kilisitu u Yesu.

² Ukanyivwa nkulumbilila ivintu vinivi pamaso pa bakaboni abinji. Polelo ubamanyisye ivintu vinivi abantu abasubiliwa, babo bope babamanyisye abantu abanji.

³ Sendapo ichigaba mumayimba pakuti we musilikali umwiza uwa Kilisitu u Yesu.

⁴ Nayumo umusilikali yuyo akubomba imbombo nukupasikizyako sona imbombo izya kukaya, pakuti akulonda pakumuhobosya usongo wache.

⁵ Umwakuyana bulo atalipo umuntu yuyo ali panyangalo iyakuchimbila akupeghiwa umuvwalo nanti atakukonka indaghilo izya nyangalo yila.

⁶ Umulimi yuyo akwiyula nkani, abanje wakwanda pakupokelapo ichigaba icha nyinulo.

⁷ Winong'one akiza na zizyo nkunena, pakuti u Mwene akwiza pakukupa akivwisizye aka vintu vyosi vinivi.

⁸ Kumbuka u Yesu Kilisitu, yuyo akazyuka kubufwe, sona akaba waluko ulwa Devedi. Pakuti ichi cho chicho Amazyu Amiza ghagho nkulumbilila ghakumanyisya.

⁹ Ichi cho chifukwa nkuyimba, sona impinyiwe ni mpingu ngati ne munanga Ndaghilo. Loli amazyu agha Chala ghatapinyiwe ni mpingu, awe.

¹⁰ Polelo nkujimba nkani muvintu vyosi pachifukwa icha bantu babo u Chala akabasala, umwakuti bope bapokiwe ukwendela mwa Kilisitu u Yesu, nukupokela ubuchindamu ubwa bwila na bwila.

¹¹ Agha gho mazyu aghanaloli, “Nanti tukafwa nawe, tukwiza pakuba sona nubumi nawe.

¹² Nanti tukwendelela pakujimba, naswe bulo tukwiza pakulaghila nawe. Nanti tukumukana, wepe bulo akwiza pakutukana.

¹³ Nanti aswe tute twe basubiliwa, umwene akwendelela pakuba musubiliwa, pakuti atangikana mwene.”

Umubombi uwakwitikiziwa nu Chala

¹⁴ Ubakumbusyanje abantu zinizi, sona ubasokaye nkani pamaso pa Chala ukuti batakadalinkanaye pachifukwa icha mazyu. Pakuti ichi chitakubavwa abantu napo panandi, loli chikubanangannya bulo abantu babo bakuchiteghelezya.

¹⁵ Uyezye nkani pakuba wakwitikiziwa pamaso pa Chala, ngati we mubombi yuyo ate ni soni pambombo yache, sona yuyo akumanyisya akiza amazyu aghanaloli agha Chala.

¹⁶ Loli ughaleghuke amazyu aghamwalwe ghagho ghatakumuchindika u Chala, pakuti abantu babo bakubomba bunubu bakwiza pakwendelela pakuba kubutali nu Chala.

¹⁷ Ivimanyisyo vyabo ivi vikunyeka ngati cho chilonda icha nkonko. Mubantu banaba muli u Himenaya nu Fileta,

¹⁸ babo bakasobela nukuleka ubwanaloli. Abene bavulungannyanga ulwitiko ulwa bantu bamo pakunena ukuti ukuzyuka ukwa bantu abafwe kwabombiwa kale.

¹⁹ Loli pope bulo ulwalo ulukafu, lulo u Chala azenga lutanganeng'ena napo panandi, sona papo pasimbiwe amazyu agha, “U Mwene abamenye abantu babo bache,” sona, “Umuntu wesi yuyo akwitika nu mulomo wache ukuti wa Mwene, apindukaye nukuzileka imbibi zyache.”

²⁰ Munyumba inkulu nkani muli ivibombelo ivyakupiyila ivyakulekanalekana: Vimo vya golide nu siliva; ivinji vya makwi, ni tope; vimo vyakubombezya mumasikumumasiku, ivinji vyakubombezya isiku ni siku.

²¹ Nanti umuntu iswefya mwene ivintu vivyo nanena, akwiza pakuba chibombelo chicho chipaghuliwe, sona nukuba chambombo kumwenecho uwa nyumba, yuyo iyanizye pakuchibombezya imbombo yosi inyiza.

²² Leghukako kuvinyonywa ivya chilumendo, sona ubukonkaye ubugholosu nu lwitiko nu lughano nu mutende, poka na bantu babo bakumuchindika u Mwene nu moyo umuzelu.

²³ Ughaleghuke amadali aghamwalwe na ghabupunganu, pakuti uzimenye ukuti ivintu vinivi, ubumalilo bwache vyongo.

²⁴ Umubombi uwa Mwene, atakabanje wavyongo, awe. Loli abanje mololo nu muntu wesi. Abanje mumanyisi umwiza, sona nu mufisalyoyo.

²⁵ Abanje mololo, bo akubamanyisya abantu babo bakumususya nu lusubilo ulwakuti u Chala akwiza pakubapa ulusako ulwakupinduka nukuzileka imbibi zyabo nukubumanya ubwanaloli.

²⁶ Po amahala ghabo ghakwiza pakunyokelamo nukupona ichipingo icha Satana, yuyo abalemite nukubapela ukuti babombaye ubwighane bwache.