2 Timoti 1 - IBAYIBOLO 2024

¹ Ane ne Pabuli, umutumiwa uwa Kilisitu u Yesu, ukuyana nu bwighane ubwa Chala. Nkatamiwa ukuti indumbilile nizya bumi bubo u Chala akalayizya pakubapa abantu bache pakumamatilana poka nu Kilisitu u Yesu.

² Nkumusimbila u Timoti, umwana wane umughaniwa. Ichisa nu bwiza, sona nu mutende ivyakufuma kwa Chala u Tata nu Kilisitu u Yesu u Mwene witu vibanje nawe.

Ukupalizya nu lukazyo

³ Nkumupalizya u Chala, yuyo nkumubombela nu mabyebye wane umwiza bulo ukuyana namumo abanyenya bane bakabombelagha. Nkubakumbuka amwe bwila munyiputo zyane pamusanya na pabusiku bulo.

⁴ Bo nkukumbuka amasozi ghako, nkukusamba ukuti nkwennye, umwakuti imbanje ne muhobosu nkani.

⁵ Nkukumbuka sona nizya lwitiko ulwenecho lulo uli nalo, ulwitiko lulo unyokokulu u Loyisi, sona wepe nu nyoko u Yuniki akaba nalo. Indi nu lusubilo ukuti nawe bulo uli nalo.

⁶ Pachifukwa chinichi nkukukumbusya ukuti nawe ichabupi chako chakaye, chicho u Chala akakupa, bo nabika inyobe zyane papako.

⁷ Pakuti u Muzimu yuyo u Chala akatupa, atakutupela pakuba bogha, loli weyuyo akutupa amaka nu lughano, sona nukwilema.

⁸ Po utakabanje ni soni pakumubikila ubwakaboni u Mwene witu. Sona utakabanje ni soni pachifukwa icha nene, ne indi mujele pachifukwa icha yuyo. Loli sendapo ichigaba mumayimba pachifukwa icha Mazyu Amiza, ukwendela mumaka agha Chala.

⁹ Akatupoka nukutwitizya ukuti tubanje bantu bache abazelu. Akabomba bunubu, chite chifukwa ichakuti aswe tukabomba inyiza, awe. Loli pachifukwa icha mbatiko ni chisa chache. Akatupelela ichisa ukwendela mwa Kilisitu u Yesu, bo na kabalilo katandite.

¹⁰ Loli ilelo chavumbuliwa kukwitu nukwiza ukwa Mupoki witu, u Kilisitu u Yesu. Amazizye amaka agha bufwe, sona ukwendela mu Mazyu Amiza avumbula pabuzelu ubumi bubo butangafwapo nalumolumo.

¹¹ Nkasaliwa ukuti imbanje ne mutumiwa nu mumanyisi ukuti indumbilile Amazyu Amiza ghanagha,

¹² sona cho chifukwa nkuyimba. Loli pope bulo inchili indi nu lusubilo pakuti imumenye yuyo namusubila. Intakwilamwa ukuti akwiza pakuvisungilila akiza vivyo akansungisya mupaka Pisiku ilyabumalilo.

¹³ Uchilemezyanje ichimanyisyo ichanaloli chicho ukivwa kukwane, umwakuti chibanje chifwanikizyo chicho ubaghiye pakuchikonka. Ubombaye zinizi nu lwitiko, sona nu lughano, vivyo tuli navyo pakumamatilana poka nu Kilisitu u Yesu.

¹⁴ Ukwendela mumaka agha Muzimu Umuzelu yuyo akwikala mumwitu, sungilila akiza ubwanaloli bubo busungisyiwe mumwako.

¹⁵ Uzimenye ukuti abantu bosi aba muchigaba icha Asiya, ukonjelezyapo u Figeli nu Helemogeni, bakantoloka.

¹⁶ U Mwene ayipelele ichisa inyumba iya Onesifola, pakuti kabilikabili weyuyo anyangazyanga. Atakaba ni soni napapo nkaba mujele.

¹⁷ Loli bo afika bulo mu Loma, akanda pakundondandonda mupaka akanyagha.

¹⁸ U Mwene amupelele ichisa Pisiku ilyabumalilo! Sona awe, uyimenye akiza nkani imbombo yiyo akambombela mukaya aka Efeso.