2 Samuweli 9 - IBAYIBOLO 2024

U Devedi nu Mefibosheti

¹ U Devedi akalalusya akati, “Nkimba atasyalako yumo uwa munyumba iya Sabuli uwakuti ningamupelela ichisa pachifukwa icha Yonatani?”

² Pakabalilo kalakala pakabapo uwambombo uwa munyumba iya Sabuli yuyo akaba we Ziba. Bakamwitizya ukuti ize pamaso pa Devedi, po u mwene akamulalusya u Ziba akati, “Nkimba we Ziba?” U Ziba akamwamula akati, “Nene, ne wambombo wako.”

³ U mwene akamulalusya akati, “Nkimba atasyalako yumo uwa munyumba iya Sabuli, uwakuti ningamupelela ichisa icha Chala?” U Ziba akamwamula akati, “Asyalako weka umwana uwa Yonatani. Loli alemaye inyayo zyache zyosi zibili.”

⁴ U mwene akalalusya akati, “Nkimba ali ko kwiyi?” U Ziba akamula akati, “Ali kunyumba iya Makili, umwana uwa Amiyeli mu Lo Debali.”

⁵ Po u mwene u Devedi akatuma umuntu ku Lo Debali pakumusenda munyumba iya Makili, umwana uwa Amiyeli.

⁶ Bo u Mefibosheti umwana uwa Yonatani, umwizukulu uwa Sabuli iza pamaso pa Devedi, akafughama pasi. U Devedi akati, “Nkimba we Mefibosheti?” U Mefibosheti akamula akati, “Nene, ne wambombo wako.”

⁷ U Devedi akamubuzya akati, “Utakanyilaye. Nkulonda pakukupelela ichisa pachifukwa icha ghuso u Yonatani. Nkwiza pakukunyosezya ichisu chosi chicho chikaba cha ghusokulu u Sabuli, sona ukwiza pakulya poka nane akabalilo kosi.”

⁸ U Mefibosheti akafughama nukuti, “Nkimba ne wenu, ukuti umpelele ichisa ne mbwa infwe?”

⁹ U mwene akamwitizya u Ziba, yuyo akaba wambombo uwa Sabuli nukumubuzya ukuti, “Namupa umwizukulu uwa mwene wako vyosi vivyo vikaba vya Sabuli na bamunyumba yache.

¹⁰ Awe poka na bana bako, sona na bambombo bako mulimaye ichisu chilachila nukwiza ni nyinulo, umwakuti umwizukulu uwa mwene wako abanje ni vyakulya. U Mefibosheti umwizukulu uwa mwene wako akwiza pakulya poka nane akabalilo kosi.” Pakabalilo kalakala u Ziba akaba na bana 15 na bambombo 20.

¹¹ Po u Ziba akamubuzya u mwene akati, “Ane ne wambombo wako nkwiza pakubomba vivyo awe we mwene wane wandamula.” Po u Mefibosheti akalyanga poka nu Devedi ngati weka uwa bana abamwene.

¹² U Mefibosheti akaba nu mwana umulumendo yuyo akaba we Mika, sona abamunyumba bosi iya Ziba bakaba bambombo aba Mefibosheti.

¹³ U Mefibosheti akikala mu Yelusalemu, pachifukwa ichakuti akabalilo kosi akalyanga poka nu mwene, sona akalemala inyayo zyache zyosi zibili.