2 Samuweli 8 - IBAYIBOLO 2024

Ukupota ukwa Devedi kubwite

¹ Pisinda pache, u Devedi akalwa ubwite naba Filisiti nukubapota, po akakafyula akaya akakulu nkani aka Metegi Ama munyobe izya ba Filisiti.

² U Devedi akabapota sona aba Mowabu. Akabalambalika pasi mumizele nukubapima nulukusa. Po akabaghogha abantu babo bakaba mumizele mibili iyakwanda yosi nukughuleka umuzele uwabutatu ghosi. Aba Mowabu bakaba bazya aba Devedi nukwanda pakusonka umusonko kukwache.

³ U Devedi akamupota sona u Hadadezeli umwana uwa Lehobu, yuyo akaba we mwene uwamu Zoba, bo u Hadadezeli akubuka mulubazu ulwa lusoko ulwa Yufuleti pakubwikazya ubumwene bwache.

⁴ U Devedi akazilema ingolo zyache izya bwite 1,700, sona na basilikali abakwenda pasi 20,000. Akazidumula inkole izya vinama izya ifalasi zyache izya ngolo, loli akazisungako ingolo zimo 100.

⁵ Bo aba Siliya aba mu Damasika biza pakumwavwa u Hadadezeli, u mwene uwamu Zoba, u Devedi akabaghogha abasilikali 22,000.

⁶ U Devedi akazenga ubuzilo ubwa bwite muchigaba icha Siliya mu Damasika, po aba Siliya bakaba pasi pabulaghili bwache nukusonka umusonko kukwache. U Mwene akamupa u Devedi ubupoti kosi kuko akabukagha.

⁷ U Devedi akafyula ingulu izya golide izya makambala agha Hadadezeli nukwiza nazyo mu Yelusalemu.

⁸ U mwene u Devedi akafyula umukuba umwinji nkani mukaya akakulu aka Teba, naka Belotayi, tuto tukaba twaya utwa Hadadezeli.

⁹ Bo u Towu, u mwene uwamu Hamati ivwa ukuti u Devedi abapota abasilikali bosi aba mwene u Hadadezeli,

¹⁰ akamutuma umwana wache u Yolamu kwa mwene u Devedi pakumulamuka nukumulondela ivyiza pachifukwa ichakumupota u Hadadezeli, yuyo akalwanga ubwite nu Towu. U Yolamu akamupa usiliva nu golide, sona nu mukuba pakuba vyabupi.

¹¹ U Devedi akavipaghulila kwa Mwene ivintu vinivi ngati mumo akabombela nu siliva nu golide uwa inko zyosi zizyo akazipota:

¹² Aba Edomu naba Mowabu naba Amoni naba Filisiti sona naba Amaleki. Akavipaghulila sona ivintu vivyo akumufyula u mwene u Hadadezeli, umwana uwa Lehobu, uwamu Zoba.

¹³ Itabwa ilya Devedi likamanyikwa posi na posi, bo anyokako pakubapota aba Edomu 18,000 mwikombe ilya Mbeya.

¹⁴ U Devedi akazenga ubuzilo ubwa bwite muchisu chosi icha Edomu, umwakuti aba Edomu bosi bakaba pasi pabulaghili ubwa Devedi. Po u Mwene akamupa u Devedi ubupoti kosi kuko akabukagha.

Amakambala agha Devedi

¹⁵ U Devedi akalaghilagha mu Izilayeli mosi, sona akabombelagha vyosi mubwanaloli na mubugholosu pakasi pa bantu bosi.

¹⁶ U Yowabu umwana uwa Zeluya akaba we songo uwa basilikali. U Yehoshafati umwana uwa Ahiludi akaba musimbi uwa mabuku agha mbili.

¹⁷ U Zadoki umwana uwa Ahitubi nu Ahimeleki umwana uwa Abiyatala bakaba baputi, sona u Selaya akaba musimbi.

¹⁸ U Benaya umwana uwa Yehoyada akaba we songo uwa ba Keleti naba Peleti, sona abana aba Devedi bakaba baputi.