2 Samuweli 7 - IBAYIBOLO 2024

U Chala akumulayizya u Devedi

¹ Bo u mwene u Devedi ikalana munyumba yache iya bumwene, u Mwene akamuzighilila kubalwani bache bosi babo bakamuzyungulila.

² Po akamubuzya umulaghuzi u Natani akati, “Ane nkwikala munyumba iya bumwene, yiyo yizengiwe na makwi agha mwale, loli Ibokosi ilya Lufingo ilya Chala lili muchisakasa.”

³ U Natani akamwamula akati, “Bomba bulo zyosi zizyo ukwinong'ona, pakuti u Mwene ali nawe.”

⁴ Ubusiku bulabula u Mwene akamubuzya u Natani akati,

⁵ “Buka umubuzye umubombi wane u Devedi, uti: U Mwene akuti, ‘Fwandi ukwinong'ona ukuti awe ukwiza pakunzengela inyumba iyakuti nikalayemo?

⁶ Ukwandila pisiku lilyo nkabefezya aba Izilayeli mu Ijiputi mupaka nilelo bulo, ane intikayepo nalumo munyumba. Pakuti ane nendanendagha bulo, bo nkwikala muchisakasa.

⁷ Kosi kuko nabukagha poka naba Izilayeli, nkimba nkabalalusyapo abalongozi babo nkabapa imbombo iya kubadima abantu bane aba Izilayeli ukuti, “Nkimba choni chicho mutanzengeye inyumba iya makwi agha mwale?” ’

⁸ “Losi ulu umubuzye umubombi wane u Devedi uti, ‘U Mwene Uwamaka Ghosi akuti: Nkakwefyako kuludimo kuko ukadimagha ing'ozi ukuti ubanje we mulaghili uwa bantu bane aba Izilayeli.

⁹ Ane nabanga nawe kosi kuko wabukagha, sona nabachimbizya abalwani bako pamaso papako. Losi ulu nkwiza pakulipela itabwa lyako pakuba likulu nkani ngati amatabwa agha bantu abamanyikwe aba muchisu ichapasi.

¹⁰ Nkwiza pakubapa ubuzilo abantu bane aba Izilayeli, sona nkwiza pakubikazya, umwakuti babanje nakaya akabo na kabo, nukubazighilila kubalwani babo. Abantu ababibi batakwiza pakubayivya sona, ngati mumo bakabombelagha pakwanda pala,

¹¹ pakabalilo kako nkabimikila abalongi abantu bane aba Izilayeli. Nkwiza pakukuzighilila kubalwani bako bosi. U Mwene akukubuzya ukuti, akwiza pakukuzengela inyumba.

¹² Nanti amasiku ghako ghamala, sona nanti wabakonka abanyenya bako kwipumpa, nkwiza pakumupela weka uwa baluko lwako pakuba wampyana wako, yuyo akwiza pakuba mwana uwako nu wako, po nkwiza pakubwikazya ubumwene bwache.

¹³ Umwana yunuyu akwiza pakunzengela inyumba, sona nkwiza pakubwikazya ubumwene bwache bwila na bwila.

¹⁴ Nkwiza pakuba ne wise, po umwene akwiza pakuba mwana wane. Nanti akunanga, nkwiza pakumufunda ni ndisa ngati mumo uwise akumufundila umwana wache.

¹⁵ Loli nkwiza pakumughana nu lughano ulwakufikapo, te ngati mumo nkabombela nu Sabuli, yuyo nkamukana pamaso papako.

¹⁶ Inyumba yako nu bumwene bwako vikwiza pakubangako bwila na bwila pamaso papane. Ubumwene bwako bukwiza pakwikalana bwila na bwila.’ ”

¹⁷ U Natani akamubuzya u Devedi amazyu ghosi ghagho u Chala akamuvumbulila.

Ulwiputo ulwa Devedi ulwa kumupalizya u Chala

¹⁸ U mwene u Devedi akinjila muchisakasa nukwikala pamaso pa Mwene, po akiputa akati, “Wee Mwene Uwamaka Ghosi, nkimba ane ne wenu, sona abamunyumba yane bo bawenu, ukuti unfisye mupaka po indi pano ilelo?

¹⁹ Wee Mwene Uwamaka Ghosi, zinizi zitakakwana pamaso papako, loli ukanenela zila nizya muntazi izya bamunyumba yane, ne mubombi wako. Wee Mwene Uwamaka Ghosi, nkimba umu momumo ukubombela nu muntu?

²⁰ “Wee Mwene Uwamaka Ghosi, nkimba u Devedi anganena sona ichoni? Pakuti awe umenye ane ne mubombi wako.

²¹ Awe ukazibomba zinizi pachifukwa icha mazyu ghako nu bwighane bwako, sona wabomba ivintu ivikulu vyosi vinivi ukuti umanyisye ane ne mubombi wako.

²² “Wee Mwene Uwamaka Ghosi, we mukulu nkani. Ukuyana namumo twivwila na makutu ghitu, atalipo nayumoyumo yuyo ayanite nawe, sona atalipo u Chala uyunji, loli awe we mwene mpela.

²³ Nkimba bo bawenu babo bayanite na bantu bako aba Izilayeli, uluko loka muchisu ichapasi, lulo u Chala akabuka pakwitabulila mwene, nukuti itabwa lyache limanyikwanje pakubomba iviswigho ivikulu ni vyakoghofya. Ukazichimbizya inko izinji, poka na bachala babo pamaso pabantu bako, babo ukabatabula mu Ijiputi?

²⁴ Wabikazya abantu bako aba Izilayeli pakuba bako na bako bwila na bwila, po awe we Mwene waba we Chala wabo.

²⁵ “Wee Mwene u Chala, losi ulu sunga ilayizyo lyako ilya bwila na bwila, lilyo ukandayizya ne mubombi wako na bamunyumba yane. Bomba vivyo ukalayizya,

²⁶ umwakuti itabwa lyako libanje likulu bwila na bwila. Abantu bakwiza pakunenagha ukuti, ‘U Mwene Uwamaka Ghosi u Chala uwa Izilayeli!’ Po abamunyumba yane ne mubombi wako u Devedi bakwiza pakwikalana pamaso papako.

²⁷ “Wee Mwene Uwamaka Ghosi, u Chala uwa ba Izilayeli, wanvumbulila zinizi ane ne mubombi wako. Ukanena ukati, ‘Nkwiza pakukuzengela inyumba.’ Po ane ne mubombi wako niputa bunubu nu bujivu.

²⁸ Wee Mwene Uwamaka Ghosi, awe we Chala! Amazyu ghako masubiliwa, sona wandayizya ivintu ivyiza vinivi ane ne mubombi wako.

²⁹ Po ilelo nkukulaba ukuti uyisaye inyumba yane ne mubombi wako, ukuti yibanje nsayiwa pamaso papako bwila na bwila. Pakuti wewe Mwene Uwamaka Ghosi wanena, po ukwiza pakuyisaya inyumba yane ne mubombi wako bwila na bwila.”