2 Samuweli 6 - IBAYIBOLO 2024

Biza ni Bokosi ilya Lufingo mu Yelusalemu

¹ U Devedi akababungannya poka sona abasilikali 30,000, babo akabasala pakasi paba Izilayeli.

² U Devedi poka na bantu bache babo bakaba nawe, bakanyamuka ku Baala mu Yuda pakulisenda Ibokosi ilya Chala, lilyo likwitiziwa ni tabwa ilya Mwene Uwamaka Ghosi, yuyo ikaye pachitengo icha bumwene pakasi pa bakelubi.

³ Bakalyefyamo Ibokosi ilya Chala lila munyumba iya Abinadabu, yiyo yikaba pighamba nukulikwezya mungolo impya. U Uza nu Ahiyo, abana aba Abinadabu bo babo bakendezyanga ingolo yila,

⁴ yiyo yikanyamula Ibokosi lila, bo u Ahiyo ali kuntazi.

⁵ U Devedi poka naba Izilayeli bosi bakasekelagha na maka ghabo ghosi pamaso pa Mwene, bo bakwimba inyimbo nukulizya ivinanda ni vivisekeseke na malongi ni ngwaya sona na mapango.

⁶ Bo bafika pabuzilo ubwakukomelapo inyinulo pa Nakoni, u Uza akagholosya inyobe yache nukulipalamasya Ibokosi ilya Lufingo ilya Chala lila, pachifukwa ichakuti inkambaku zikipunula.

⁷ Panapo na panapo u Mwene akamukalalila u Uza, pachifukwa ichakuti atakamunyila u Chala. Po akamukoma, nukufwila palapala papipi ni Bokosi ilya Lufingo ilya Chala lila.

⁸ Po u Devedi akakalala pachifukwa ichakuti u Mwene akamughogha u Uza. Ubuzilo bula bukwitiziwa ukuti Pelezi Uza mupaka nilelo bulo.

⁹ U Devedi akamunyilagha u Mwene, po akati, “Nkimba Ibokosi ilya Lufingo ilya Mwene lingiza bulibuli kukwane?”

¹⁰ U Devedi atakalondagha sona pakwiza ni Bokosi ilya Lufingo lila ilya Mwene mukaya aka Devedi mu Yelusalemu. Loli akapaghuka nukubuka nalyo kunyumba iya Obedi Edomu umu Giti.

¹¹ Ibokosi ilya Lufingo ilya Mwene likikala na bamunyumba iya Obedi Edomu umu Giti yula amezi matatu, po u Mwene akamusaya u Obedi Edomu poka na bamunyumba yache bosi.

¹² U Devedi akivwa ukuti u Mwene abasayite abamunyumba iya Obedi Edomu, sona na vyosi vivyo akaba navyo, pachifukwa icha Bokosi ilya Chala lila. Po u Devedi akabuka kunyumba iya Obedi Edomu pakulisenda Ibokosi ilya Chala lila nukwiza nalyo mukaya aka Devedi mu Yelusalemu, bo bakusekela nkani.

¹³ Bo abantu babo bakanyamulagha Ibokosi ilya Lufingo ilya Mwene lila bendapo amamita sikisi, u Devedi akabika inkambaku ni ngwata inyine ukuti vibanje vyakwiyipa.

¹⁴ U Devedi akimbagha pamaso pa Mwene na maka ghache ghosi, bo avwalite u efodi umutonte.

¹⁵ U Devedi poka naba Izilayeli bosi bakiza ni Bokosi ilya Lufingo ilya Mwene lila, bo bakukolomoka nkani nukulizya amapati.

¹⁶ Bo Ibokosi ilya Lufingo ilya Mwene likwinjila mukaya akakulu aka Devedi, u Mikali umwana umulindu uwa Sabuli akananamizya pibwindo. Bo amwennya u mwene u Devedi akunyelanyela nukwimba pamaso pa Mwene, akanda pakumusamula mumoyo wache.

¹⁷ Bakiza nalyo Ibokosi ilya Lufingo ilya Mwene lila nukulibika pabuzilo bwache muchisakasa chicho u Devedi akalizengela, po u Devedi akabika ivyakwiyipa ivyakocha ni vyakwiyipa ivyabupoka kwa Mwene.

¹⁸ Bo amala pakubika ivyakwiyipa ivyakocha ni vyakwiyipa ivyabupoka vila akabasaya abantu mwitabwa ilya Mwene Uwamaka Ghosi.

¹⁹ Po u Devedi akabagabila aba Izilayeli bosi abanavuli na bakolo ichibama, ni chipuza icha nyama inyoche, sona ni chitumbuwa ichipapate. Pabumalilo abantu bosi bakabwela.

²⁰ Bo u Devedi abwela kunyumba pakubasaya abamunyumba yache, u Mikali umwana uwa Sabuli, akafuma kuzi pakukomana nawe, po akati, “Ilelo u mwene uwa Izilayeli isamula mwene pakwivula pamaso pa bazya bache abalindu, umwakusita isoni nazimozimo ngati we chipena.”

²¹ U Devedi akamubuzya u Mikali akati, “Nkamuchindika u Mwene yuyo akansala ukumuchila ughuso, pamo umuntu yumo uwa munyumba yache, bo akunsala ukuti imbanje ne mulaghili uwa bantu bache. Nkwiza pakusekela pamaso pa Mwene.

²² Nkwiza pakwisamula nkani nemwene, sona nukwikozya isoni ukuchila panapa. Loli abazya abalindu aba bakwiza pakunchindika nkani.”

²³ Po u Mikali umwana uwa Sabuli akafwilamo bulo umusita bana nabamobamo.