2 Samuweli 5 - IBAYIBOLO 2024

U Devedi aba we mwene mu Izilayeli

¹ Pisinda pache inko zyosi izya Izilayeli zikiza kwa Devedi mu Hebuloni nukumubuzya ukuti, “Awe, naswe twe banamuntu.

² Kale bo u Sabuli we mwene witu, awe ukabalongolela aba Izilayeli kubwite, sona u Mwene akakubuzya akati, ‘Ukwiza pakuba we mulaghili uwa bantu bane aba Izilayeli, sona ukwiza pakuba we mwene wabo.’ ”

³ Bo abalongozi bosi aba Izilayeli biza kwa mwene u Devedi mu Hebuloni, akafingana nabo ulufingo. Po bakamupakazya amafuta pakuba we mwene uwa ba Izilayeli.

⁴ U Devedi akaba na maka 30, bo bakumwimika pakuba we mwene, sona akalaghila amaka 40.

⁵ U Devedi akalaghila mu Yuda amaka seveni na mezi sikisi, bo ali mu Hebuloni, sona akalaghila mu Izilayeli, na mu Yuda amaka 33, bo ali mu Yelusalemu.

⁶ Umwene u Devedi poka na bantu bache bakabuka pakulwa ubwite naba Yebusi mu Yelusalemu. Aba Yebusi bala bakamubuzya u Devedi bakati, “Utakwiza pakwinjila nalumo muno. Abantu abafwamaso na balemazu bo babo bakwiza pakukupota.” Bakinong'onagha ukuti, “U Devedi atanginjilamo muno.”

⁷ Loli u Devedi akalifyula ilinga ilya Ziyoni, akaya akakulu nkani aka Devedi.

⁸ Pisiku lilalila u Devedi akababuzya abantu bache akati, “Umuntu wesi yuyo akulonda pakulwa naba Yebusi endelaye kuzila iya kumizi pakubaghogha abafwamaso na balemazu, babo balwani aba Devedi.” Ichi cho chifukwa pali amazyu aghakuti, “Abafwamaso na balemazu batanginjila mu Nyumba iya Mwene.”

⁹ Po u Devedi akafyula ilinga lila, akikala mulamula nukulyita ukuti, “Akaya akakulu nkani aka Devedi.” Po akalizengela ilinga lila akaya akakulu nkani ukwandila kuko kale kukaba ikombe, kubufumilo bwizuba mupaka mukasi.

¹⁰ Po u Devedi akabanga na maka nkani, pachifukwa ichakuti u Mwene u Chala Uwamaka Ghosi akaba nawe.

¹¹ U mwene u Hilamu uwamu Tile akamutumila intumi u Devedi, poka na makwi agha mwale, na bapalamatabwa, sona na bazengi abanyumba pakubombezya amabwe pakumuzengela inyumba iya bumwene u Devedi.

¹² Po u Devedi akazimanya ukuti u Mwene weyuyo akamwimika pakuba we mwene uwa Izilayeli, sona nukuti akabupela ubumwene bwache pakuba bwamaka pachifukwa icha bantu bache aba Izilayeli.

¹³ Bo u Devedi epamo mu Hebuloni ukubuka ku Yelusalemu akasenda abachi abanji na bachi abazya abanji, sona akapapa abana abinji abalumendo na balindu.

¹⁴ Abana bache babo bakapapiliwa mu Yelusalemu bo aba: U Shamuwa nu Shobabu nu Natani nu Solomoni

¹⁵ nu Ibihali nu Elishuwa nu Nefegi nu Yafiya

¹⁶ nu Elishama nu Eliyada sona nu Elifeleti.

U Devedi akubapota aba Filisiti

¹⁷ Bo aba Filisiti bivwa ukuti bamupakazya amafuta u Devedi pakuba we mwene uwa ba Izilayeli, po bosi bakabuka pakumulondelezya. Loli bo u Devedi ivwa zinizi, akabuka kwilinga.

¹⁸ Aba Filisiti bala bakiza nukusata mwikombe ilya Lefayimu.

¹⁹ Po u Devedi akamubuzikizya u Mwene akati, “Nkimba imbukaye pakulwa ubwite naba Filisiti? Nkimba ukwiza pakubabika munyobe zyane?” U Mwene akamwamula akati, “Bukagha, naloli nkwiza pakubabika aba Filisiti munyobe zyako.”

²⁰ U Devedi akabuka ku Baala Pelazimu, kulakula akabapota aba Filisiti. Po akati, “U Mwene abanangannya abalwani bane ngati mumo amizi aghakwizula ghakunanganizizya.” Po ubuzilo bula bakabwita ukuti Baala Pelazimu.

²¹ Aba Filisiti bakavileka ivifwani vyabo kulakula, po u Devedi na bantu bache bakavisenda nukubwela navyo.

²² Pope bulo aba Filisiti bakiza sona nukusata mwikombe ilya Lefayimu.

²³ Po u Devedi akamubuzikizya u Mwene, po akamwamula akati, “Utakalwanje nabo ubwite umwakwenannya nabo, loli ulwe nabo ukufumila kwisinda, kupipi na makwi agha balisamu.

²⁴ Nanti wivwa bulo ichongo mumakwi agha balisamu, bukagha lubilolubilo, kokuti u Mwene alongoleye kuntazi kukwinyu pakulwa ubwite na basilikali aba ba Filisiti.”

²⁵ Po u Devedi akabomba vivyo u Mwene akamulamula, po akabaghogha aba Filisiti bala ukwandila ku Geba mupaka ku Gezeli.