2 Samuweli 4 - IBAYIBOLO 2024

Ukughoghiwa ukwa Ishibosheti

¹ Bo u Ishibosheti umwana uwa Sabuli, ivwa ukuti u Abinala afuye mu Hebuloni, amaka ghakamuwila, sona aba Izilayeli bosi bakaba nubogha.

² U Ishibosheti akaba na basongo aba basilikali babili. Weka akaba we Baana, uyunji akaba we Lekabu, babo bakaba bana aba Limoni umu Beloti uwaluko ulwa Benjamini. Beloti cho chigaba icha chisu icha Benjamini,

³ pachifukwa ichakuti aba Beloti bakachimbilila ku Gitayimu, sona bachili bakwikala kulakula mupaka nilelo bulo.

⁴ U Yonatani umwana uwa Sabuli akaba nu mwana yuyo inyayo zyache zyosi zibili zikaba ndemazu. Umwana yunuyu akaba we Mefibosheti, sona akaba na maka fayivi bo u Sabuli nu Yonatani baghoghiwa mu Yezileli. Umuntu yuyo akamulelagha akamunyamula nukuchimbila, loli bo ali palubilo lula, umwana yula akawa pasi nukulemala.

⁵ U Lekabu nu Baana, abana aba Limoni umu Beloti bakabuka kunyumba iya Ishibosheti. Po bakafika kulakula pamusanya, bo u Ishibosheti ali pakutuzya.

⁶ Bakinjila muchipinda icha mukasi ngati po bakulonda pakusenda ingano yimo. Bakamulasa u Ishibosheti palwanda. Po u Lekabu nu wamwabo u Baana bakatoloka.

⁷ Bakinjila munyumba mula bo aghonite pachitala muchipinda chache. Bakamulasa nukumughogha, sona bakamudumula umutu wache. Bakaghusenda nukwenda busiku bosi na mumusebo uwaku Alaba.

⁸ Bakiza nu mutu uwa Ishibosheti kwa Devedi mu Hebuloni nukumubuzya ukuti, “Twiza nu mutu uwa Ishibosheti, umwana uwa Sabuli, umulwani wako yuyo akalondagha pakukughogha. Ilelo u Mwene amutanizya u Sabuli, poka na baluko lwache.”

⁹ U Devedi akamwamula u Lekabu nu wamwabo u Baana, abana aba Limoni umu Beloti akati, “Nkulapa pamaso pa Mwene yuyo akampoka muntamyo,

¹⁰ bo umuntu yuyo ambuzya ukuti, ‘U Sabuli afuye,’ nukwinong'ona ukuti iza ni pangwi ilyiza, nkamulema umuntu yulayula nukumughogha mu Zikilagi. Ghunughu ghukaba muvwalo wache pachifukwa icha zizyo akambombela.

¹¹ Buli nanti abantu ababibi babo bamughoghite umuntu umusita nongwa, bo aghonite pachitala munyumba yache? Nkimba ntangabatanizya pachifukwa icha bufwe ubwa muntu yulayula nukubazimizya pachisu ichapasi?”

¹² U Devedi akabalamula abantu bache, po bakabaghogha abantu balabala. Bakabadumula inyobe ni nyayo zyabo nukuyipayika imivimba yabo papipi ni chiziba mu Hebuloni. Loli bakaghusenda umutu uwa Ishibosheti nukughusyila mwipumpa ilya Abinala mu Hebuloni.