2 Samuweli 24 - IBAYIBOLO 2024

Devedi akubabelenga abantu

¹ U Mwene akabakalalila nkani aba Izilayeli, umwakuti akamudeba u Devedi ukuti abatamye aba Izilayeli. U Mwene akamubuzya u Devedi akati, “Buka pakubabelenga aba Izilayeli naba luko ulwa Yuda.”

² Po u mwene akamubuzya u Yowabu na basongo aba basilikali babo bakaba nawe akati, “Buka pakasi pa inko zyosi izya Izilayeli ukwandila ko kuchisu icha Dani mupaka ku Belisheba pakubabelenga abantu babo bangabomba imbombo iya kulwa ubwite, umwakuti imanye ubwinji bwabo.”

³ Loli u Yowabu akamwamula u mwene akati, “U Mwene u Chala wako abalizye abasilikali ukuchila aka 100, sona amwitikizye u mwene wane azyennye zinizi. Nkimba choni chicho mwene wane akulonda pakubomba bunubu?”

⁴ Loli u mwene akamufyenga u Yowabu, poka na basongo aba basilikali. Po bakepapo pamaso pa mwene pakubabelenga abantu bosi babo bangabombagha imbombo iya kulwa ubwite mu Izilayeli.

⁵ Bakaloboka ulusoko ulwa Yolodani, nukuzenga ivisakasa vyabo mukaya aka Aloyeli, kuntende mwikombe. Po bakabuka ku Gadi mupaka ku Yazeli.

⁶ Bakabuka ku Giliyadi, sona na kuchigaba icha Tahitimu Hodishi, mupaka kuchisu icha Dani nukuzyungulila ku Sidoni.

⁷ Ukufuma kulakula bakabuka kwilinga ilya Tile, sona nutwaya tosi utwa ba Hivi naba Kenani. Pabumalilo bakabuka ku Belisheba mu Negebu, muchisu icha Yuda.

⁸ Bo badumusannya ichisu chosi, bakanyokela ku Yelusalemu, bo pachilapo amezi 9 na masiku 20.

⁹ U Yowabu akamupa u mwene ubwinji bosi ubwa bantu, babo bangalwa ubwite. Muchisu icha Izilayeli mukabamo abantu 800,000, sona muchisu icha Yuda mukabamo abantu 500,000.

¹⁰ Bo u Devedi amala pakubabelenga abantu, akanda pakutamiwa nkani mumoyo wache, po akati, “Nananga nkani pazizyo nabomba. Losi ulu nkukulaba we Mwene wane ukuti unhobokele imbibi yane ne mubombi wako, pachifukwa ichakuti nabomba ichintu ichabupunganu nkani.”

¹¹ Bo u Devedi alamusya pandabindabi, u Mwene akamubuzya u Gadi, yuyo akaba mulaghuzi uwa Devedi akati,

¹² “Buka umubuzye u Devedi uti, ‘U Mwene ati: Nkukupa ivintu vitatu ukuti usalepo choka ichakuti inchibombe kukwako.’ ”

¹³ Po u Gadi akabuka kwa Devedi nukumubuzya ukuti, “Nkimba ukulonda ukuti muchisu chinyu mubanje izala amaka matatu? Pamo amaka matatu aghakubachimbila abalwani binyu bo bakubachimbizya? Pamo amaka matatu agha viwaya muchisu chinyu? Po inong'ona tasi, sona umbuzye chicho ukulonda ukuti imubuzye yuyo akantuma.”

¹⁴ U Devedi akamubuzya u Gadi akati, “Awe, ane nkutamiwa nkani mumoyo wane. Zagha tuwile munyobe izya Mwene, pakuti ichisa chache chikulu nkani. Loli utakanyitikizye ikuti ingwile munyobe izya bantu.”

¹⁵ Po u Mwene akatuma ichiwaya muchisu icha Izilayeli ukwandila pandabindabi mupaka pakabalilo kako akalondelagha umwenecho, sona abantu 70,000 aba muchisu icha Dani mupaka ku Belisheba bakafwa.

¹⁶ Bo uwantumi agholosezya inyobe yache ukuti akanangannye akaya akakulu nkani aka Yelusalemu, u Mwene akaba ni chitima pachifukwa icha chiwaya chila, po akamubuzya uwantumi yuyo akabafundagha abantu akati, “Leka! Nyosya inyobe yako.” Pakabalilo kanako uwantumi uwa Mwene yula akaba pabuzilo ubwakukomelapo inyinulo ubwa Alawuna umu Yebusi.

¹⁷ Bo u Devedi amwennya uwantumi yuyo akabakoma abantu bala, akamubuzya u Mwene akati, “Nene nananga, sona nabomba imbibi. Nkimba abantu banaba babomba choni? Unfunde ane na bamunyumba yane.”

U Devedi akuzenga ichighemo

¹⁸ Pisiku lilalila u Gadi akabuka kwa Devedi nukumubuzya ukuti, “Buka pakumuzengela ichighemo u Mwene pabuzilo ubwakukomelapo inyinulo ubwa Alawuna umu Yebusi.”

¹⁹ Po u Devedi akabuka ukuyana namumo u Mwene akamubuzizya ukwendela mwa Gadi.

²⁰ Bo u Alawuna ennya, akamwennya u mwene poka na bantu bache bakwiza kukwache, po akafuma kuzi nukufughama pamaso pa mwene bo icheni chache chikotamiye pasi.

²¹ U Alawuna akalalusya akati, “Nkimba choni chicho wiza ku ne wambombo wako?” U Devedi akamwamula akati, “Niza pakughula ubuzilo ubwakukomelapo inyinulo ukuti imuzengelepo u Mwene ichighemo, umwakuti ichiwaya chicho chili pabantu bane chimale.”

²² U Alawuna akamubuzya u Devedi akati, “Leka u mwene wane asende ivintu vyosi vivyo ukulonda pakubika pakuba chakwiyipa. Senda inkambaku, ninkwi izyakukomela amapemba, sona ni koli pakuba nkwi.

²³ U mwene, u Alawuna akumupa u mwene vyosi vinivi.” U Alawuna akamubuzya sona akati, “U Mwene u Chala wako, apokele ichakwiyipa chako.”

²⁴ Loli u mwene akamwamula u Alawuna akati, “Awe, nkwiza pakulipila umutengo wache. Intagabika kwa Mwene, u Chala wane ichakwiyipa ichakocha chicho intakulipilapo indalama nayimoyimo.” Po u Devedi akabughula ubuzilo ubwakukomelapo inyinulo bula poka ni ng'ombe pamutengo uwa salabazya ama siliva 50.

²⁵ U Devedi akamuzengela u Mwene ichighemo palapala nukubika ivyakwiyipa ivyakocha, nivyakwiyipa ivyabupoka. Po u Mwene akivwa ulwiputo lulo akachiputilagha ichisu, po ichiwaya chila chikamala mu Izilayeli.