2 Samuweli 23 - IBAYIBOLO 2024

Amazyu aghabumalilo agha Devedi

¹ Amazyu aghabumalilo agha Devedi umwana uwa Yese, umwimba inyimbo uwa Izilayeli, umuntu yuyo u Chala Uwapamwanya Nkani, u Chala uwa Yakobo akamukwezya nukumupakazya gho agha:

² “Umuzimu uwa Mwene akanenela mumwane, amazyu ghache ghakaba mumulomo wane.

³ U Chala uwa Izilayeli akanena, Ilyalabwe ilya Izilayeli likanena nane likati, ‘Nanti umuntu akubalaghila abantu mubwanaloli nanti akubalaghila umwakumunyila u Chala,

⁴ ayanite bulo ngati kulama ukwa izuba bo likufuma, ngati kulama ukwa izuba pisiku lilyo kute amabingu. Akulama ngati lizuba bo ivula yaleka bulo pakutima, yiyo yikumezya isote pachisu ichapasi.’

⁵ “U Chala akwiza pakubasaya abaluko lwane, pachifukwa ichakuti afingana nane ulufingo ulwa bwila na bwila, ulufingo lulo lubatikiwe akiza nkani, sona lutakwanduka. Ivi vyo vivyo nkunyonywa vyosi, ukuti vikwiza pakuba bupoti bwane, sona naloliloli u Chala akwiza pakuzibomba.

⁶ Loli abantu ababibi bakwiza pakusumbiwa kuzi ngati mivwa, ghagho umuntu atangaghalema ni nyobe zyache.

⁷ Umuntu wesi yuyo akulema amivwa, akubombezya ichipeni, pamo isengo, po akughocha numoto.”

Abasilikali abajivu aba Devedi

⁸ Abasilikali abamaka aba Devedi bo aba: U Yoshebu Bashebeti umu Takemoni akaba mulongozi usongo uwa basilikali batatu, sona weyuyo akalwa ubwite na basilikali 800 nukubaghogha pakabalilo koka ni mpalala yache.

⁹ Uwabubili wache akaba we Eleyazala umwana uwa Dodayi umu Ahohi. U Eleyazala akaba weka uwa basilikali batatu abamaka nkani bala, Akaba poka nu Devedi bo bakulwa ubwite naba Filisiti, babo bakabungana pa Pasi Damimu. Po aba Izilayeli bakachimbila

¹⁰ loli u Eleyazala atakachimbila nukubaghogha aba Filisiti, mupaka inyobe yache yikalita, loli akamukakatila upanga wache. Pisiku lilalila u Mwene akamwavwa ukuti abapote aba Filisiti. Abasilikali bakanyokela kwa Eleyazala pakufyula ivya bantu babo bakaghoghiwa.

¹¹ Uyunji akaba we Shama umwana uwa Age umu Halali. Bo aba Filisiti babungana poka ku Lehi kuko kukaba umughunda uwa tubala, aba Izilayeli bakabachimbila.

¹² Loli u Shama akima pakasikasi pa mughunda. Akaghuzighilila nukubaghogha aba Filisiti, pachifukwa ichakuti u Mwene akamupa ubupoti ubukulu nkani.

¹³ Pakabalilo aka kwinula, abasilikali bamo batatu abamanyikwe pakasi pabasilikali 30, bakabuka kwa Devedi kumpako iya Adulamu, bo akabukatila aka basilikali aka ba Filisiti kazengite ivisakasa vyabo mwikombe ilya Lefayimu.

¹⁴ Pakabalilo kalakala u Devedi akaba mwilinga, bo akabukatila aka basilikali aba ba Filisiti kali mu Betelehemu.

¹⁵ U Devedi akaba ni nyota nkani, po akati, “Nalondagha nkani nanti umuntu yumo ansembelagha amizi muchiziba papipi nu mulyango uwa lupaso ulwa Betelehemu.”

¹⁶ Po abantu abamaka batatu bala bakapankula ulupaso ulwa basilikali aba ba Filisiti, nukusemba amizi papipi nu mulyango uwa lupaso ulwa Betelehemu, po bakiza nagho kwa Devedi. Loli u Devedi akakana pakung'wela. Mubuzilo bwache, akaghakupulila pamaso pa Mwene.

¹⁷ Po akati, “Wee Mwene, ane intangabomba ichintu chinichi. Nkimba ing'welaye ibanda ilya bantu babo bakabika ubumi bwabo pachulu?” Po u Devedi atakang'wela. Umu momumo abasilikali abajivu aba bakabombela.

¹⁸ U Abishayi uwamwabo uwa Yowabu, umwana uwa Zeluya akaba mulongozi uwa bantu 30. Akabaghogha abantu 300 ni mpalala yache, po akaba muntu mumanyikwe nkani ngati bantu batatu bala.

¹⁹ Akaba muntu mumanyikwe nkani pakasi pabantu 30 bala, sona akaba mulongozi wabo, loli atakaba mumanyikwe ngati bantu batatu bala.

²⁰ U Benaya umwana uwa Yehoyada uwamu Kabizele akaba musilikali umujivu nkani, yuyo akabomba imbombo inkulu nkani. Akabaghogha abasilikali abamaka babili aba Mowabu, sona akinjila muchiliba pisiku lilyo kukaba kabefu nkani nukughogha inkalamu,

²¹ Akamughogha sona umu Ijiputi yuyo akaba mukulu nkani. Napapo umu Ijiputi yula akaba ni mpalala munyobe yache, u Benaya akalwa nawe pakubombezya intughu. Akamufyula umu Ijiputi yula impalala nukumughogha ni mpalala yache yilayila.

²² Zinizi zikaba mbombo izya Benaya, umwana uwa Yehoyada. Wepe akaba muntu umumanyikwe ngati abantu batatu abamaka bala.

²³ U Benaya akaba muntu umumanyikwe nkani ukubachila abantu 30 bala, loli atakamanyikwa ngati bantu batatu bala. Po u Devedi akamubika pakuba we songo uwa basilikali uwa bavighilili bache.

²⁴ Pakasi pabantu 30 bala pakabapo sona abantu aba: U Asaheli, uwamwabo uwa Yowabu, nu Elihanani umwana uwa Dodo uwamu Betelehemu,

²⁵ nu Shama umu Halodi, sona nu Elika umu Halodi,

²⁶ nu Helezi umu Paliti nu Ila umwana uwa Ikeshi uwamu Tekowa,

²⁷ nu Abiyezeli uwamu Anatoti nu Mebunayi umu Husha,

²⁸ nu Zalimoni umu Ahohi nu Mahalayi umu Netofa,

²⁹ nu Heledi umwana uwa Baana umu Netofa nu Itayi umwana uwa Libayi uwamu Gibeya muchisu icha Benjamini,

³⁰ nu Benaya uwamu Pilatoni nu Hidayi uwa kumakombe agha mu Gashi,

³¹ nu Abi Aliboni uwamu Alabati nu Azimaveti umu Balihumu,

³² nu Eliyaba uwamu Shaliboni, abana aba Yasheni nu Yonatani

³³ umwana uwa Shama umu Halali nu Ahiyamu umwana uwa Shalali umu Halali,

³⁴ nu Elifeleti umwana uwa Ahasibayi umu Maaka nu Eliyamu umwana uwa Ahitofeli umu Giloni,

³⁵ nu Hezilo uwamu Kalimeli nu Palayi nu Alibi,

³⁶ nu Igali umwana uwa Natani uwamu Zoba, umwana uwa Hagili,

³⁷ nu Zeleki umu Amoni nu Nahalayi umu Beloti, uwakunyamula ivilwilo ivya Yowabu, umwana uwa Zeluya,

³⁸ nu Ila uwamu Itili nu Galebu uwamu Itili

³⁹ nu Uliya umu Hiti. Bosi poka bakabapo 37.