2 Samuweli 22 - IBAYIBOLO 2024

Ulwimbo ulwa bupoti ulwa Devedi

¹ U Devedi akamwimbila u Mwene ulwimbo pisiku lilyo u Mwene akamupoka munyobe izya Sabuli, sona na munyobe izya balwani bache ulwakuti,

² “U Mwene we lyalabwe lyane, we lilinga lyane, sona we mupoki wane.

³ U Chala wane we lyalabwe lyane, yuyo nkuponelamo. U Mwene we ngulu yane, ni mpembe yane, iya bupoki bwane. U Mwene we lilinga lyane, mumo nkuponelamo, sona we mupoki wane, yuyo akumpoka munyobe izya bantu ababibi.

⁴ Nkumwitizya u Mwene, yuyo abaghiye pakupaliwa, sona akumpoka munyobe izya balwani bane.

⁵ “Amayigha agha bufwe ghakanzyungulila, sona isoko izyakwizula zikanyibizya.

⁶ Inkusa izya muchisu icha bafwe zikannyembetelela, sona ivipingo ivya bufwe vikandema.

⁷ Bo indi muntamyo, nkamwitizya u Mwene. Nkamwitizya u Chala wane. Bo ali munyumba yache, akivwa izyu lyane, sona ukulila kwane kukafika mumakutu ghache.

⁸ “Ichisu ichapasi chikatetemagha nukukayingana, ulwalo ulwa kumwanya lukayingana, lukayingana pachifukwa ichakuti akakalala.

⁹ Ilyosi likasuka mumpuno zyache. Umoto uwakulungulizya ghukaka mumulomo wache, sona amazimwa ghakaka mumulomo wache.

¹⁰ Akazepula kumwanya nukwika pasi, sona amabingu amafitu ghakaba kusi kunyayo zyache.

¹¹ Akakwela pa bakelubi nukubuluka, sona akachimbila nkani pavipapande ivya mpepo.

¹² Akivwinka mwene ichisi, sona amabingu amafitu agha vula ghakamuzyungulila.

¹³ Pachifukwa icha kulama kuko kukaba pamaso papache, umoto uwamazimwa ghukakagha.

¹⁴ U Mwene akajilimisya kumwanya, sona izyu ilya Uwakumwanya Nkani likivwika.

¹⁵ Akatusumba utulasilo twache, nukubanyampannya abalwani bache, sona utumesya tukabachimbizya.

¹⁶ Amakombe agha nyanja ghakaba pabuzelu. Ulwalo ulwa chisu ichapasi lukabonekela pabuzelu. Bo u Mwene akubachemela abalwani bache, sona bo akulufutila nu muyi uwa mumpuno zyache.

¹⁷ “Akagholosezya inyobe yache pachisu ichapasi nukundema, akanzubula mumizi amibizu.

¹⁸ Akampoka munyobe izya balwani bane abamaka, abalwani bane babo bakaba na maka nkani ukunchila.

¹⁹ Abalwani bane bala bakalwanga nane ubwite bo indi muntamyo inkulu nkani. Loli u Mwene akanvighilila.

²⁰ Akanyefya mubupalapala, akampoka pachifukwa ichakuti akahoboka nane.

²¹ “U Mwene akampa umuvwalo ukuyana ni mbombo zyane ingolosu. Akansaya ukuyana ni nkalo yane inyiza.

²² Pakuti nazikonkagha indaghilo izya Mwene, sona ntabombitepo nayimo imbibi nukumukana u Chala wane.

²³ Ane nazikonka indaghilo zyache zyosi, sona ntavisulitepo ivimanyisyo vyache.

²⁴ Ane inte ninongwa nayimoyimo pamaso papache, sona nkazileghuka imbibi.

²⁵ U Mwene ampa umuvwalo ukuyana nu bugholosu bwane. Akampa umuvwalo pachifukwa ichakuti ntenakalema nakamokamo pamaso papache.

²⁶ “Ku bantu abasubiliwa, ukubanga we musubiliwa. Ku bantu abasita nongwa, utakubanga nichilema nachimochimo.

²⁷ Ku bantu abazelu, ukubanga we muzelu, loli ku bantu abanyonganu, ukubanga we muchevu nkani.

²⁸ Awe ukubapoka abantu abakwiyisya, loli abantu abakwikwezya, ukubisya.

²⁹ Wee Mwene, awe we nyale yane. U Mwene akuchipela ichisi, chicho chili mumwane pakuba lukozyo.

³⁰ Nu bwavwilizi bwako, ningakapota akabukatila aka basilikali. Nu bwavwilizi ubwa Chala wane, ninganyela ulupaso.

³¹ “Izila izya Chala witu zyakufikapo, sona amazyu agha Mwene, ghanaloli. We ngulu iya bosi babo bakuchimbilila kukwache.

³² Pakuti ataliko u Chala uyunji, loli u Mwene weka mpela. Litalipo ilyalabwe ilyakuvwamamo, loli u Chala weka mpela.

³³ Pakuti we Chala yuyo akumpa amaka, sona weyuyo akwefya ivizinka muzila yane.

³⁴ Inyayo zyane akuzipela pakuba ngati zya mbabala, sona akunsunga akiza bo indi mumaghamba.

³⁵ Akuzimanyisya inyobe zyane pakulwa ubwite, umwakuti ningabombezya ubwele ubwa mukuba.

³⁶ Awe ukunzighilila ni ngulu yako iya bupoti, sona ukunkwezya nu bwavwilizi bwako.

³⁷ Ukuzikuzya izila zyane, umwakuti inyayo zyane zitakutyelemuke.

³⁸ “Nkabachimbizya abalwani bane nukubasya, sona intakanyokela mupaka nkabazimizya.

³⁹ Nkabavulazya nkani po batakanyamuka sona, nkabakanyilila ni nyayo zyane.

⁴⁰ Awe ukumpa amaka aghakulwila ubwite, sona ukabapela abalwani bane ukuti banfughamililaye.

⁴¹ Awe ukabapela abalwani bane ukuti banchimbile, sona nkabanangannya bosi babo bakambenga.

⁴² Bakalilagha ukuti abavwe, loli patakabapo nayumoyumo umuntu uwakubapoka. Bakalilagha kwa Mwene, loli atakabamula.

⁴³ Nkabasya ngati lufumbi lulo lukupupuziwa ni mpepo, sona nkabakanyankila ngati matope agha mumusebo.

⁴⁴ “Wampoka munyobe izya bantu bane, babo bakansambukila, sona wansungilila ukuti imbanje ne mutu uwa inko. Abantu babo ntakabamanya, ilelo bali pasi pabulaghili bwane.

⁴⁵ Abayeni bakiza kukwane pakunfughamilila, sona bo bivwa amazyu ghane, bakanyivwila.

⁴⁶ Abantu bosi bakaba nubogha, sona bakafuma mumalinga ghabo, bo bakutetema.

⁴⁷ “U Mwene mumi. Lipaliwanje Ilyalabwe lyane. Achindikiwanje u Chala, Ilyalabwe, sona nu Mupoki wane.

⁴⁸ U Chala weyuyo akuntanizizya, sona akuzibika inko kusi kunyayo zyane,

⁴⁹ nukumpoka munyobe izya balwani bane. Ukankwezya pamwanya pa balwani bane, ukampoka munyobe izya bantu babo bakansambukila.

⁵⁰ Wee Mwene, Po nkwiza pakukupala, pakasi pa inko zyosi. Nkwiza pakwimba inyimbo izyakulichindika itabwa lyako.

⁵¹ Akumwavwanga u mwene wache ukuti apotaye, akumupelelagha ichisa umupakiwa wache, u Devedi poka na baluko lwache bwila na bwila.”