2 Samuweli 21 - IBAYIBOLO 2024

Ukughoghiwa ukwa bizukulu aba Sabuli

¹ Pakabalilo aka mwene u Devedi, kukabako izala amaka matutu. U Devedi akamubuzikizya u Mwene. Po u Mwene akamubuzya akati, “U Sabuli na bamunyumba yache bali ninongwa iyakughogha, pakuti akabaghogha aba Gibeyoni.”

² U mwene akabitizya aba Gibeyoni bosi. Pakabalilo kalakala aba Gibeyoni batakaba chigaba chimo icha inko izya ba Izilayeli, loli bakaba bantu abakupona abaluko ulwa ba Amoli. Aba Izilayeli bakalapa ukuti batakwiza pakubaghogha. Loli u Sabuli atakalondagha pakubazimizya pachifukwa icha lweke lwache paba Izilayeli naba Yuda.

³ U Devedi akabalalusya aba Gibeyoni akati, “Nkimba imbabombele choni? Nkimba ningabika chakupepesezya choni, umwakuti mubasaye abantu aba Mwene?”

⁴ Aba Gibeyoni bakamwamula bakati, “Inongwa yiyo yili pakasi papitu na bamunyumba iya Sabuli, te yakuti ulipile usiliva pamo ugolide, sona tutakulonda ukutanizya pakumughogha umuntu yumo mu Izilayeli, awe.” Po u Devedi akabalalusya akati, “Nkimba mukulonda imbabombele choni?”

⁵ Aba Gibeyoni bala bakamwamula u mwene bakati, “U Sabuli akalondagha pakutughogha, sona akabatika pakutuzimizya twebosi muchisu chosi icha Izilayeli.

⁶ Po utupe abantu seveni abaluko lwache ukuti tubaghoghele pamaso pa Mwene mu Gibeya, kako kaya akakulu nkani aka Sabuli, yuyo u Mwene akamusala.” Po u mwene akamula akati, “Chiza bulo, nkwiza pakubabika munyobe zyinyu.”

⁷ Loli u mwene akamupelela ichisa u Mefibosheti umwana uwa Yonatani, umwizukulu uwa Sabuli, pachifukwa ichakuti u Devedi nu Yonatani umwana uwa Sabuli bakalapa pamaso pa Mwene.

⁸ Loli u mwene akamusenda u Alimoni nu Mefibosheti, abana abalumendo aba Lizipa, umwana uwa Ayiya, babo akapapa nu Sabuli, poka na bana abalumendo fayivi aba Melabi umwana umulindu uwa Sabuli, babo akabapapa nu Adiliyeli, umwana uwa Balizilayi umu Mehola.

⁹ Akababika munyobe izya ba Gibeyoni, babo bakabaghoghela pighamba pamaso pa Mwene. Po abana bosi Seveni bakafwa pakabalilo koka. Bakaghoghiwa mumasiku aghakwanda agha nyinulo, bo akabalilo akakwinulila amapemba kakwanda bulo.

¹⁰ U Lizipa umwana umulindu uwa Ayiya akasenda isaka nukutenga pilyalabwe lila, papo pakaba imivimba yila, nukwikala palapala bo akabalilo akakwinulila kanda mupaka pakabalilo kako ivula yikandagha pakutima. Pamusanya akavichimbizya iviyuni pa mivimba yila, sona pabusiku akavizighililagha ivinyamana ivya muzi.

¹¹ Bo u Devedi ivwa zizyo u Ayiya umwana uwa Lizipa, yuyo akaba muchi umuzya uwa Sabuli akabombagha,

¹² akabuka pakughasenda amafupa agha Sabuli, nagha Yonatani ku bantu aba Yabeshi Giliyadi. Bakaghasenda kubusyefu ukufuma pamunalo mu Beti Shani, kuko aba Filisiti bakaghapayika pikwi, bo bamughogha u Sabuli mu Gilibowa.

¹³ U Devedi akiza nagho amafupa agha Sabuli, nagha Yonatani, sona nukughabungannya poka amafupa agha bantu seveni babo bakapayikiwa.

¹⁴ Bakaghasyila amafupa agha Sabuli nagha Yonatani mwipumpa ilya wise uwa Sabuli u Kishi mu Zela muchisu icha Benjamini, sona bakabomba zyosi zizyo u mwene akalamula. Pisinda pache u Chala akivwa ulwiputo ulwa chisu chila.

Ubwite naba Filisiti

¹⁵ Pakabalilo kamo kukabako ubwite pakasi paba Filisiti naba Izilayeli. U Devedi, poka na bantu bache bakabuka pakulwa ubwite naba Filisiti, po akalita nkani.

¹⁶ Po u Ishibi Benobi, yumo uwaluko ulwa Lafa, yuyo impalala yache iya mukuba yikang'wama amakilogalamu matatu, sona akaba nupanga umupya kunyobe yache, akinong'ona nizya kumughogha u Devedi.

¹⁷ Loli u Abishayi umwana uwa Zeluya akamupoka u Devedi, akalwa ubwite nu mu Filisiti nukumughogha. Po abantu aba Devedi bakalapa kwa Devedi bakati, “Utakwiza pakubuka sona naswe kubwite, lumo inyale iya Izilayeli yingazima.”

¹⁸ Bo pachilapo akabalilo, kukabako ubwite naba Filisiti mu Gobi. Pakabalilo kalakala u Sibekayi uwamu Husha akamughogha u Safi uwaluko ulwa Lafa.

¹⁹ Kukabako sona ubwite naba Filisiti mu Gobi, po u Elihanani umwana uwa Yale Olegimu uwamu Betelehemu akamughogha u Goliyati umu Giti, yuyo ichilemelo icha impalala yache yikaba ni chikwi ngati chakulukila amenda.

²⁰ Kukabako sona ubwite mu Gati. Kulakula kukabako umuntu yumo umutali nkani, yuyo akaba nu tufingwi sikisi kunyobe zyosi zibili nu tusalala sikisi kunyayo zyosi zibili, po tosi poka tukaba 24. Umuntu yunuyu akaba waluko ulwa Lafa.

²¹ Bo abasamula aba Izilayeli, u Yonatani umwana uwa Shimeya, uwamwabo uwa Devedi akamughogha.

²² Banaba folo bakaba baluko ulwa Lafa, babo bakikala mu Gati, po u Devedi poka na basilikali bache bakabaghogha abantu bosi banaba.