2 Samuweli 20 - IBAYIBOLO 2024

U Sheba akumusambukila u Devedi

¹ Pakabalilo kalakala kukabako umuntu yumo uwa mwalwemwalwe yuyo akaba we Sheba umwana uwa Bikili, umu Benjamini. U Sheba akalizya ipati nukukolomoka ukuti, “Aswe tute ni chigaba nachimochimo mwa Devedi, sona tute ni mpyana mu mwana uwa Yese. Mwee ba Izilayeli umuntu wesi abwelaye ku chisakasa chache.”

² Po aba Izilayeli bosi bakamutoloka u Devedi nukumukonka u Sheba umwana u Bikili. Loli abaluko ulwa Yuda bakaba kulubazu ulwa mwene wabo, ukwandila ku Yolodani mupaka ku Yelusalemu.

³ Bo u Devedi afika kunyumba yache mu Yelusalemu, akabasenda abachi bache abazya 10, babo akabaleka ukuti basungililaye akaya kache. Akabighalila munyumba nukubabika abalindilili. Akabapa ivyakulya, loli u Devedi atakaghona nabo. Akabighalila mupaka pisiku lilyo bakafwila, sona bakaba ngati po bakolo abafwilwe.

⁴ U mwene akamubuzya u Amasa akati, “Unyitizizye uluko losi ulwa Yuda ukuti lwize kuno mumasiku matatu, sona nawe wize ubepo.”

⁵ U Amasa akabuka pakulwitizya uluko ulwa Yuda, loli akakaba nukuchila amasiku ghagho u mwene akamupimila.

⁶ U Devedi akamubuzya u Abishayi akati, “U Sheba umwana uwa Bikili akwiza pakututamya nkani ukumuchila u Abisalomu. Senda abasilikali bane nukumukonka u Sheba, lumo angatwagha utwaya utukulu nkani utwa malinga nukuvwamamo.”

⁷ Po u Abishayi na basilikali aba Yowabu, poka naba Keleti na Peleti, sona na basilikali bosi abajivu bakafumamo mu Yelusalemu pakumulondelezya u Sheba umwana uwa Bikili.

⁸ Bo bali pilyalabwe ikulu nkani mu Gibeyoni, Amasa akiza pakukomana nabo. U Yowabu akavwala ilaya ilya bwite, sona akapinyilila ulamba mumusana wache yuyo akaba ni nyambi. Bo akwenda upanga yula akawa pasi.

⁹ U Yowabu akamulamuka u Amasa akati, “Wee wamwitu, mwaghona?” Po u Yowabu akazilema indevu izya Amasa ni nyobe yache indilo ukuti amufyofyonte.

¹⁰ U Amasa atakamwennya upanga yuyo akaba munyobe iya Yowabu, po u Yowabu akamulasa mulwanda nupanga yula koka bulo, sona amala ghakafumila kuzi nukufwa palapala. U Yowabu poka nu wamwabo u Abishayi bakamulondelezya u Sheba umwana uwa Bikili.

¹¹ Umusilikali yumo uwa Yowabu akimilila papipi nu muvimba uwa Amasa, po akati, “Umuntu wesi yuyo amughanite u Yowabu, sona wesi yuyo ali kulubazu ulwa Devedi, amukonke u Yowabu.”

¹² Pakabalilo kalakala u Amasa akalambalala mwibanda lyache, sona umuntu wesi yuyo akiza palapala, bo amwennya, akimagha. Bo u Yowabu azyaghannya ukuti abantu bakwima palapala, akawefyamo umuvimba ghula mumusebo, po akaghubika mwisote, nukughuvwinka nu mwenda.

¹³ Bo bawefyamo umuvimba ghula mumusebo, abantu bosi bakamukonka Yowabu pakumulondelezya u Sheba umwana uwa Bikili.

¹⁴ U Sheba akadumusannya munko zyosi izya Izilayeli nukufika mu Abeli Beti Maaka, kuko aba Beeli bosi bakabungana poka nukumukonka.

¹⁵ Abasilikali bosi babo bakaba poka nu Yowabu bakamuzyungulila u Sheba yuyo akaba mu Abeli Beti Maaka. Bakalima isabi iya bwite umwakuzyungulila akaya kala mupaka mumwanya. Bo bakumongolannya ulubumba,

¹⁶ umuntu yumo uwamahala yuyo akaba mukaya kala akanda pakukolomoka akati, “Ivwa kuno, ivwa kuno! Mumubuzye u Yowabu ize kuno kuti inene nawe.”

¹⁷ U Yowabu akabuka kuko kukaba umukolo yula, po umukolo yula akamulalusya u Yowabu akati, “Nkimba we Yowabu?” U Yowabu akamwamula akati, “Eee nene.” Po umukolo yula akamubuzya akati, “Nalamba, unteghelezye.” U Yowabu akamwamula akati, “Nkwivwa.”

¹⁸ Umukolo yula akati, “Kale abantu bakatinji, ‘Bukagha ku Abeli pakubuzikizya,’ po zikamala bulabula.

¹⁹ Aswe tukulonda umutende, sona twe bantu abasubiliwa muchisu icha Izilayeli. Awe ukuyezya pakukanangannya akaya akakulu nkani aka, kako we nyina mu Izilayeli. Nkimba choni chicho ukulonda pakuchizimizya ichilingo icha Mwene?”

²⁰ U Yowabu akamula akati, “Awe, intakulonda pakukanangannya akaya aka.

²¹ Ifundo te yakuti nkulonda pakukanangannya, awe. Loli umuntu yumo u Sheba umwana uwa Bikili, uwa muchisu icha mumaghamba icha Efulayimu, amusambukiye u mwene u Devedi. Mumubike umuntu yunuyu munyobe zyitu, po tukwiza pakukaleka akaya kinyu.” Umukolo yula akamubuzya u Yowabu akati, “Tukwiza pakubasumbila umutu wache palubumba.”

²² Pakubombezya amahala ghache, umukolo yula akabuka ku bantu bosi pakubabuzya zinizi. Po bakamudumula umutu u Sheba umwana uwa Bikili nukumusumbila u Yowabu. U Yowabu akalizya ipati, po abantu bosi bakafumamo mukaya kala, sona umuntu wesi akabwela kunyumba yache. U Yowabu akanyokela kwa mwene mu Yelusalemu.

²³ U Yowabu akaba we songo uwa basilikali bosi aba Izilayeli. U Benaya umwana uwa Yehoyada akaba we songo uwa ba Keleti naba Peleti.

²⁴ U Adonilamu akaba we kapitawa uwa bazya, sona u Yehoshafati umwana uwa Ahiludi akaba musimbi uwa mabuku agha mbili.

²⁵ U Sheva akaba musimbi, sona u Zadoki nu Abiyatala bakaba baputi.

²⁶ U Ila umu Yayili akaba muputi uwa Devedi.