2 Samuweli 2 - IBAYIBOLO 2024

U Devedi aba we mwene mu Yuda

¹ Bo pachilapo akabalilo, u Devedi akamubuzikizya u Mwene akati, “Nkimba ningabuka pakwikala mukaya akakulu nkani kamo aka mu Yuda?” U Mwene akamubuzya akati, “Bukagha.” Po u Devedi akamulalusya u Mwene akati, “Imbuke kwiyi?” U Mwene akamwamula akati, “Bukagha ku Hebuloni.”

² Po u Devedi akabuka kulakula poka na bachi bache babili u Ahinowamu uwamu Yezileli nu Abigelo umukolo umufwilwe uwa Nabali uwamu Kalimeli.

³ U Devedi akabasenda sona abantu bache babo akaba nabo, umuntu wesi na bamunyumba yache, nukwikala mukaya akakulu nkani aka Hebuloni na mutwaya twache.

⁴ Abantu aba mu Yuda bakiza ku Hebuloni, po kulakula bakamupakazya amafuta u Devedi ukuti abanje we mwene wabo. Bo u Devedi ivwa ukuti abantu aba mu Yabeshi Giliyadi bakamusyila u Sabuli,

⁵ akabatumila intumi pakubabuzya ukuti, “U Mwene abasaye, pachifukwa ichakuti mukiyipa kwa mwene winyu u Sabuli pakumusyila.

⁶ U Mwene abanje nu lughano namwe, sona abanje musubiliwa kukwinyu pachifukwa icha bwiza bubo mwabomba.

⁷ Polelo mujimbe umoyo, banga na maka, pakuti u mwene winyu u Sabuli afuye, sona abantu aba uluko ulwa Yuda bampakazya amafuta ukuti imbanje ne mwene wabo.”

U Ishibosheti aba we mwene mu Izilayeli

⁸ Pakabalilo kalakala, u Abinala umwana uwa Neli, usongo uwa basilikali aba Sabuli akamusenda u Ishibosheti umwana uwa Sabuli nukubuka nawe ku Mahanayimu.

⁹ Akamwimika pakuba we mwene uwa chisu icha Giliyadi nicha Ashuli nicha Yezileli nicha Efulayimu nicha Benjamini sona ni chisu chosi icha Izilayeli.

¹⁰ U Ishibosheti akaba na maka 40 bo anda pakulaghila muchisu icha Izilayeli sona akalaghila amaka mabili. Loli abaluko ulwa Yuda bakaba kulubazu ulwa Devedi.

¹¹ U Devedi akaba we mwene uwa luko ulwa Yuda mu Hebuloni amaka seveni na mezi sikisi.

¹² U Abinala umwana uwa Neli, poka na bantu aba Ishibosheti umwana uwa Sabuli, bakepamo mu Mahanayimu nukubuka ku Gibeyoni.

¹³ U Yowabu umwana uwa Zeluya, poka na bantu aba Devedi bakabuka pakukomana nabo pachiziba icha Gibeyoni. Akabukatila koka kakikala pasi kulubazu loka ulwa chiziba chila, sona akanji kakikala pasi kulubazu ulunji.

¹⁴ Po u Abinala akamubuzya u Yowabu akati, “Abalumendo binyu bamo bize pakulwana na balumendo bitu pamaso papitu.” U Yowabu akitika akati, “Chiza bulo, bize pakulwa.”

¹⁵ Abalumendo bala bakiza, po bakababelenga. Aba Benjamini babo bakaba balumendo aba Ishibosheti bakabapo 12, sona abalumendo aba Devedi bope bakabapo 12.

¹⁶ Umuntu wesi akalema umutu uwa mulwani wache nukumulasa mulubazu nupanga, po abalumendo bosi 24 bala bakafwila poka. Ichi cho chifukwa ubuzilo bula bakabwita ukuti Helikati Hazulimu, sona buli mu Gibeyoni.

¹⁷ Pisiku lilalila ubwite bukaba bwakoghofya nkani, umwakuti abantu aba Devedi bakamupota u Abinala poka naba Izilayeli.

¹⁸ Abana batatu aba Zeluya babo bakaba kulakula bakaba Yowabu nu Abishayi, sona nu Asaheli. U Asaheli akaba walubilo nkani ngati mbabala.

¹⁹ Akamuchimbizya u Abinala, sona akagholoka bulo bo akumuchimbizya.

²⁰ U Abinala akaghalabuka nukulalusya ukuti, “Fwandi we Asaheli?” U Asaheli akamwamula akati, “Nene.”

²¹ Po u Abinala akamubuzya akati, “Paghukila kundilo pamo kumongo. Umuleme weka uwa basilikali nukumufyula ivilwilo vyache.” Loli u Asaheli atakaleka pakumuchimbizya u Abinala.

²² U Abinala akamusoka sona u Asaheli akati, “Leka pakunchimbizya. Ntakulonda pakukughogha. Nkimba tukwiza pakwenannya bulibuli nu wamwinyu u Yowabu?”

²³ Loli u Asaheli atakaleka pakumuchimbizya, po u Abinala akamulasa u Asaheli palwanda ni mpalala mupaka yikafumizannya kunyuma. U Asaheli akawa pasi nukufwila palapala. Umuntu wesi yuyo akiza papo u Asaheli akawila akima palapala.

²⁴ Loli u Yowabu nu Abishayi bakamuchimbizya u Abinala, sona bo izuba likwinjila, bakafika kwighamba ilya Ama, kubufumilo bwizuba ubwa Giya, kumusebo uwa kunkolongo iya Gibeyoni.

²⁵ Aba Benjamini bakabungana poka pakuba akabukatila koka pakumwavwa u Abinala, po bakimilila pamwanya pighamba.

²⁶ U Abinala akamwitizya u Yowabu akati, “Nkimba twendelelaye pakulwa bwila na bwila? Fwandi utakuzyaghannya ukuti ubumalilo bwache bukwiza pakuba bwakubaba? Nkimba ukwiza pakubakanizya liyi abantu bako ukuti baleke pakutuchimbizya?”

²⁷ U Yowabu akamula akati, “Naloli nkulapa pamaso pa Chala ukuti nanti utakanenapo, abantu bane ngali bakendelela pakukuchimbizya mupaka pandabindabi.”

²⁸ Po u Yowabu akalizya ipati, sona abantu bosi bakaleka pakubachimbizya aba Izilayeli, pamo ukulwa nabo ubwite.

²⁹ U Abinala na bantu bache bakenda busiku bosi nukudumusannya mwikombe ilya Alaba. Bakaloboka ulusoko ulwa Yolodani nukudumusannya mu Bitiloni, po bakafika mu Mahanayimu.

³⁰ U Yowabu akanyokako pakumuchimbizya u Abinala. Po akababungannya poka abantu bache bosi nukwagha ukuti abantu 19 aba Devedi, poka nu Asaheli batakabapo.

³¹ Loli abantu aba Devedi bakabaghogha aba Benjamini 360, babo bakaba poka nu Abinala.

³² Bakaghusenda umuvimba uwa Asaheli nukughusyila mwipumpa ilya wise mu Betelehemu. Po u Yowabu poka na bantu bache bakenda busiku bosi nukufika mu Hebuloni kubuche.