2 Samuweli 19 - IBAYIBOLO 2024

¹ U Yowabu akivwa ukuti, u mwene akumulila u Abisalomu.

² Po pisiku lilalila ulusekelo ulwa bupoti ulwa basilikali lukanduka pakuba chililo, pachifukwa ichakuti abasilikali bakivwa ukuti, u mwene akumulila umwana wache.

³ Pisiku lilalila abantu bakinjila chimyemye mukaya akakulu nkani kala, ngati basilikali babo bali ni soni, pachifukwa ichakuti bachimbila kubwite.

⁴ U mwene akavwinka icheni chache nukulila nkani ukuti, “Wee, mwana wane Abisalomu! Wee, Abisalomu. Wee mwana wane!”

⁵ Po u Yowabu akinjila munyumba mumo mukaba u mwene nukuti, “Ilelo wabakozya isoni abasilikali bako bosi babo bakupoka awe na bana bako abalumendo na balindu na bachi bako sona na bachi bako abazya.

⁶ Awe ubaghanite nkani abantu babo bakukubenga sona ubabengite nkani abantu babo bakughanite. Ilelo walanjizya pabuzelu nkani ukuti utakubapasikizya abosongo aba basilikali na bantu babo. Nkwennya ukuti nanti u Abisalomu atakafwanga ngali wahoboka nkani, sona nukuti twebosi ngali tufuye.

⁷ Losi ulu nyamuka, buka pakubakazya abantu bako. Nkulapa pamaso pa Mwene ukuti nanti utakubuka, umuntu wesi akwiza pakukuchimbila ubusiku ubu. Ichi chikwiza pakuba chibibi nkani ukuchila intamyo zizyo zyakuwila ukwandila ko kubulumendo bwako.”

⁸ Po u mwene akanyamuka nukwikala pachitengo chache pamulyango uwa kaya. Bo abantu bivwa ukuti, “U mwene ikaye pamulyango,” bosi bakiza pamaso papache. Pakabalilo kalakala aba Izilayeli bakachimbilila mutwaya twabo.

U Devedi akunyokela ku Yelusalemu

⁹ Aba Izilayeli bosi bakadalinkanagha benebene bakati, “U Devedi akatupoka munyobe izya balwani bitu. U mwene weyuyo akatupoka munyobe izya ba Filisiti. Loli ilelo achimbilamo muchisu pachifukwa icha Abisalomu,

¹⁰ U Abisalomu yuyo tukamupakazya amafuta ukuti abanje we mwene witu, afuye kubwite. Po nkimba choni chicho mutakunenapo nizya kumusenda u mwene u Devedi ukuti anyokele?”

¹¹ U mwene u Devedi akamutumila u Zadoki nu Abiyatala, sona na baputi amazyu aghakuti, “Mubalalusye abalongozi abaluko ulwa Yuda ukuti, ‘Nkimba choni chicho mukuzyelazyela bulo pakumunyosezya u mwene kunyumba yache iya bumwene, bo aba Izilayeli bosi bamutumiye kale amazyu aghakuti anyokele kunyumba yache?

¹² Amwe mwe bawamwitu, abakamu abane na bane. Nkimba choni chicho amwe mubanje mwe babumalilo pakunyosya ane?’

¹³ Akamubuzya u Amasa akati, ‘Nkimba awe te we wamwitu umwenecho? U Chala anfunde nkani nanti ukwanda ilelo utakuba we songo uwa basilikali mubuzilo ubwa Yowabu.’ ”

¹⁴ Po u Devedi akabadeba abantu abinji nkani abaluko ulwa Yuda, umwakuti abantu bosi bakaba nu moyo ghoka. Bakamutumila u mwene amazyu aghakuti, “Nyokela, awe na bantu bako.”

¹⁵ Po u mwene akanyokela nukubuka mupaka ku Yolodani. Abaluko ulwa Yuda bakiza ku Giligali pakukomana nawe nukumulobosya palusoko ulwa Yolodani.

¹⁶ U Shimeyi umwana uwa Gela, umu Benjamini uwamu Bahulimu, akabuka lubilolubilo naba luko ulwa Yuda pakukomana nu mwene u Devedi.

¹⁷ U Shimeyi akaba poka naba Benjamini 1,000 poka nu Ziba uwambombo uwa Sabuli na bana bache abalumendo 15 sona na bambombo bache 20. Bakachimbilila ku Yolodani, kuko kukaba u mwene yula.

¹⁸ Po akabalobosya abamunyumba bosi abamwene nukubomba zyosi zizyo u mwene akalondagha. Bo u Shimeyi umwana uwa Gela aloboka ulusoko ulwa Yolodani, akisumba pasi pamaso pa mwene

¹⁹ nukumubuzya ukuti, “Wee mwene wane unhobokele. Utakakumbukaye imbibi yiyo ne wambombo wako nkakunangila pisiku lilyo ukepelaghamo mu Yelusalemu. Wee mwene wane utakabanje nazyo kusingo.

²⁰ Pakuti ane ne wambombo wako inzimenye ukuti nananga, loli ilelo ne muntu wakwanda uwaluko ulwa Yosefu ukwiza pakukomana nawe, mwene.”

²¹ Po u Abishayi umwana uwa Zeluya akati, “Nkimba u Shimeyi atabaghiye pakughoghiwa pachifukwa ichakumughuna umupakiwa uwa Mwene?”

²² U Devedi akamula akati, “Nkimba zikubapalamasya bulibuli amwe mwe bana aba Zeluya ukuti ilelo mubanje mwe balwani bane? Nkimba ilelo umuntu yumo abaghiye pakughoghiwa mu Izilayeli muno? Fwandi intazimenye ukuti ilelo ne mwene uwa ba Izilayeli?”

²³ U mwene akamubuzya u Shimeyi akati, “Nkulapa ukuti utakwiza pakufwa.”

²⁴ Pakabalilo kalakala u Mefibosheti umwizukulu uwa Sabuli wepe akabuka pakukomana nu mwene. U Mefibosheti atakasukusulagha munyayo zyache, pamo ukumwa indevu, pamo ukuchapa amenda ghache ukwandila pisiku lilyo u mwene akepelaghamo mukaya akakulu nkani kala mupaka papo akanyokelagha.

²⁵ Bo u Mefibosheti akufuma mu Yelusalemu pakukomana nu mwene, u mwene akamulalusya akati, “Wee Mefibosheti, choni chicho utakabuka poka nane?”

²⁶ U Mefibosheti akamula akati, “Wee mwene wane, uwambombo wane weyuyo akanzimbula. Nkamubuzya nkati, ‘Umbikile ichakwikalila pampunda yane ukuti nkwelepo nukubuka poka nu mwene wane,’ pakuti ane ne wambombo wako ne mulemazu.

²⁷ Po anjebagha ane ne mubombi wako pamaso papako awe mwene wane. Loli awe we mwene wane uli ngati wantumi uwa Chala. Po bomba bulo chosi chicho chingakuhobosya.

²⁸ U mwene wane abaghiye pakubaghogha abizukulu bosi aba tata wane, loli ukanyitikizya pakulya poka nawe pitebulo lyako. Po nkimba indi nu bulaghili boni ukuti nendelele pakukulaba we mwene wane ivintu ivyinji?”

²⁹ U mwene akamubuzya akati, “Utakanene sona ivyinji. Nkulamula ukuti awe poka nu Ziba mugabane ichuma chosi icha Sabuli.”

³⁰ U Mefibosheti akamubuzya u mwene akati, “Muleke uwamwitu uyu asende vyosi. Ane nahoboka nkani ukuti awe we mwene wane wafika pakaya akiza bulo.”

³¹ U Balizilayi umu Giliyadi wepe akiza ukufuma ku Logelimu nukuloboka ulusoko ulwa Yolodani pakumusindikila u mwene.

³² U Balizilayi akaghosipa nkani, sona akaba na maka 80. U Balizilayi akaba weyuyo akamupanga u mwene ivyakusobelwa vyache bo akwikala mu Mahanayimu, pakuti akaba mukabi nkani.

³³ U mwene akamubuzya u Balizilayi akati, “Loboka poka nane pakwikala nane mu Yelusalemu, sona nkwiza pakukusungilila akiza bulo.”

³⁴ Loli u Balizilayi akamwamula u mwene akati, “Nkimba amaka ghane ghasyala malinga, ukuti imbuke ku Yelusalemu poka nawe mwene wane?

³⁵ Ane indi na maka 80. Nkimba ningalesannya pakasi pa chintu ichiza ni chibibi? Nkimba ningivwa ukunona ukwa chakulya ni chakung'wela? Nkimba ningivwa ukwimba ukwa banavuli na bakolo? Nkimba choni chicho ane ne wambombo wako nkutamyanje awe we mwene wane?

³⁶ Ane ne wambombo wako nkwiza pakuloboka ulusoko ulwa Yolodani poka nawe nukukusindikila panandi bulo. Po nkimba choni chicho awe we mwene wane umpe umuvwalo bunubu?

³⁷ Unyitikizye ne wambombo wako ukuti inyokele, umwakuti ningafwila mukaya kane akakulu papipi ni pumpa ilya tata, sona nilya mayi wane. Loli u Kimuhamu uwambombo wako ali pano. Umwitikizye ukuti aloboke poka nawe, mwene. Po umubombele chosi chicho chingakuhobosya.”

³⁸ U mwene akamula akati, “U Kimuhamu akwiza pakuloboka poka nane, sona nkwiza pakumubombela chosi chicho chingakuhobosya. Nkwiza pakukubombela chosi chicho ukulonda ukuti nkubombele.”

³⁹ Abantu bosi bakaloboka ulusoko ulwa Yolodani, sona wepe u mwene akaloboka. U mwene akalaghana nu Balizilayi nukumusaya. Po u Balizilayi akanyokela.

⁴⁰ Bo u mwene alobokela ku Giligali, wepe u Kimuhamu akaloboka poka nawe. Abasilikali bosi abaluko ulwa Yuda, poka nu hafu uwa basilikali aba Izilayeli bakamusindikila u mwene.

⁴¹ Po aba Izilayeli bosi bakiza kwa mwene nukumulalusya ukuti, “Nkimba choni chicho abakamu bitu, abaluko ulwa Yuda bakamwiba u mwene na bamunyumba yache, poka na bantu bache nukwiza nawe kwisila ilya Yolodani?”

⁴² Abaluko ulwa Yuda bosi bakabamula aba Izilayeli bakati, “Aswe tukabomba bunubu pachifukwa ichakuti u mwene we mukamu witu umwenecho. Nkimba choni chicho mwakalala? Fwandi tukalyapo ivintu ivya mwene? Nkimba u mwene atupiyepo muvwalo ghumo?”

⁴³ Po aba Izilayeli bakabamula bakati, “Aswe tuli ni vigaba 10 mwa mwene, sona tuli ni vigaba ivikulu nkani mwa Devedi ukubachila amwe. Nkimba choni chicho mukutusamula bunubu? Nkimba aswe tutakaba bakwanda pakunena nizya kumunyosya u mwene witu?” Loli abaluko ulwa Yuda bakamula nu bukalale nkani ukubachila aba Izilayeli bala.