2 Samuweli 18 - IBAYIBOLO 2024

Ubufwe ubwa Abisalomu

¹ U Devedi akababungannya poka abantu bache nukubagaba mutubukatila utwa bantu 1,000, nutwa bantu 100, po akababika abasongo aba basilikali mutubukatila tulatula.

² U Devedi akabatuma abasilikali babo bakaba mutubukatila tutatu, u Yowabu akaba we songo uwa kabukatila koka, u Abishayi umwana uwa Zeluya umuzuna uwa Yowabu, akaba we songo uwa kabukatila akabubili, sona u Itayi umu Giti akaba we songo uwa kabukatila akabutatu. U mwene akababuzya abasilikali bala akati, “Nane nkwiza pakubuka poka namwe.”

³ Loli abantu bala bakati, “Utakabukaye poka naswe. Nanti tukwiza pakuchimbila, abalwani bitu batakwiza pakupasya. Napapo abasilikali bamo pakasi papitu bangafwa, batakwiza pakupasya. Loli awe ubachilite abasilikali bitu 10,000. Chingaba chizapo ukuti usyalikile mukaya akakulu nkani aka nukututumila bulo ubwavwilizi.”

⁴ U mwene akamula akati, “Nkwiza pakubomba chosi chicho chingabahobosya.” Po u mwene akimilila papipi nu mulyango uwa kaya kala, bo abantu bosi bakubuka mutubukatila utwa bantu 100, sona nutwa bantu 1,000.

⁵ U mwene akamulamula u Yowabu nu Abishayi, sona nu Itayi akati, “Mumupelele ichisa umulumendo u Abisalomu pachifukwa icha nene.” Po abasilikali bosi bakamwivwa u mwene, bo akubalamula abasongo aba basilikali bala nizya Abisalomu.

⁶ Abasilikali bala bakabuka pakulwa ubwite naba Izilayeli mumusitu uwa Efulayimu.

⁷ Abantu aba Devedi bakabapota abasilikali aba ba Izilayeli, sona pisiku lilalila abantu 20,000 bakaghoghiwa.

⁸ Ubwite bukasata muchisu chosi chila, sona ivinyamana ivyakoghofya ivya mumusitu vikabaghogha abantu abinji nkani ukubachila babo bakaghoghiwa kubwite.

⁹ Umwakuchenusya bulo u Abisalomu akakomana na bantu aba Devedi. U Abisalomu yula akakwela pampunda yache, sona bo impunda yache yikudumusannya muntende mwikwi ilya mupandapanda, umutu wache ghukalemiwa mutusamba utwa mwikwi. Po akalelembagha palapala, bo impunda yache yikubuka.

¹⁰ Bo umuntu yumo ennya zinizi, akamubuzya u Yowabu akati, “Namwennya u Abisalomu akulelemba mwikwi ilya mupandapanda.”

¹¹ U Yowabu akamwamula umuntu yula akati, “Ichoni? Nanti ukamwennya, nkimba choni chicho utakamughoghelagha palapala? Po ngali nkupiye isalabazya izya siliva 10 nu lamba.”

¹² Loli umuntu yula akamula akati, “Pope nanti nkapokelagha isalabazya izya siliva 1,000, ngali intakamughogha umwana uwa mwene. Nkamwivwa u mwene akukulamula awe nu Abishayi, poka nu Itayi ukuti, Mumuzighililaye umulumendo u Abisalomu pachifukwa icha nene.”

¹³ “Nanti nkaghasulagha amazyu agha mwene pakumughogha umwana wache, pope bulo ngali azimanya, pakuti nachimochimo chicho chifisiwe pamaso pa mwene, sona awe ngali ukimilila ku butali nane.”

¹⁴ U Yowabu akati, “Ukunkabizya.” Po akasenda impalala zitatu munyobe yache, nukumulasa u Abisalomu pachifuba, bo atafuye, sona bo akulelemba mwikwi ilya mupandapanda lila.

¹⁵ Abantu 10 babo bakanyamulagha ivilwilo ivya Yowabu bakamwavwanila u Abisalomu nukumulasa mupaka bakamughogha.

¹⁶ U Yowabu akalizya ipati, po abasilikali bakanyokako pakubachimbizya aba Izilayeli bala.

¹⁷ Abasilikali bala bakasenda umuvimba uwa Abisalomu nukughusumbila muchiliba ichitali nkani mumusitu mula, sona bakalundikapo ichibunga icha mabwe. Pakabalilo kalakala aba Izilayeli bosi bakachimbilila mutwaya twabo.

¹⁸ Bo u Abisalomu achili mumi, akizengela mwene impanda mwikombe ilya mwene pakuba chikumbusyo chache, pakuti akati, “Ane inte nu mwana umulumendo ukuti abanje wampyana yane.” Po akayita impanda yila itabwa lyache, sona yikwitiziwanga ukuti Ichikumbusyo icha Abisalomu mupaka nilelo bulo.

U Devedi akumulila u Abisalomu

¹⁹ U Ahimazi umwana uwa Zadoki akati, “Leka inchimbile pakumupangila u mwene ukuti u Mwene amupoka munyobe izya balwani bache.”

²⁰ U Yowabu akamubuzya akati, “Utangabuka pakumupangila zinizi umusanya ughu, loli isiku ilinji. Utakachibombaye umusanya ughu, pachifukwa ichakuti umwana uwa mwene afuye.”

²¹ Po Yowabu akamubuzya umu Etiyopiya akati, “Bukagha pakumupangila u mwene zizyo wazyennya.” Umu Etiyopiya yula akafughama pamaso pa Yowabu nukwanda pakuchimbila.

²² U Ahimazi umwana uwa Zadoki akamubuzya sona u Yowabu akati, “Napapo vingatamya, nalamba unyitikizye ukuti nane bulo inchimbile pakumupangila u mwene poka nu mu Etiyopiya yula.” Loli u Yowabu akamula akati, “Wee mwana wane, nkimba choni chicho ukulonda pakubuka, bo uzimenye ukuti utakwiza pakupokelapo umuvwalo naghumoghumo?”

²³ Umu Etiyopiya yula akati, “Napapo vingatamya, nkulonda imbuke.” Po u Yowabu akamubuzya akati, “Bukagha!” U Ahimazi akanda pakuchimbila nukudumusannya mumusebo uwa mwikombe nukumuchila umu Etiyopiya yula.

²⁴ Bo u Devedi ikaye pakasi pamulyango uwa mukasi nuwa kuzi, umulindilili akakwela palubumba nukwimilila pachisonje icha mulyango uwa kaya kala. Bo atalankannya, akamwennya umuntu ali pakuchimbila.

²⁵ Umulindilili yula akamwitizya u mwene nukumubuzya. Po u mwene akati, “Nanti ali mwene bulo, kokuti akwiza ni pangwi ilyiza.” Po umuntu yula akapalamilagha.

²⁶ Po umulindilili yula akamwennya sona umuntu uyunji ali pakuchimbila. Akakolomoka nukumubuzya umuntu yuyo akalindililagha pamulyango ukuti, “Ennya, umuntu uyunji ali pakuchimbila sona ali mwene.” U mwene akati, “Wepe akwiza ni pangwi ilyiza.”

²⁷ Umulindilili yula akati, “Umuntu uwakwanda akuchimbila ngati we Ahimazi umwana uwa Zadoki.” U mwene akati, “U Ahimazi we muntu umwiza, kokuti akwiza ni pangwi ilyiza.”

²⁸ Po u Ahimazi akakolomoka nukumubuzya u mwene ukuti, “Kwiza bulo!” Akafughama pamaso pa mwene, bo icheni chache chikotamiye pasi nukuti, “U Mwene u Chala wako apaliwanje, yuyo ababika munyobe zyako abantu babo bakakusambukila awe we mwene wane.”

²⁹ U mwene akalalusya akati, “Nkimba umulumendo u Abisalomu yula mwiza bulo?” U Ahimazi akamula akati, “Bo u Yowabu akuntuma ne wambombo wako, nkivwa ichongo ichikulu nkani, loli nane bulo ntakamanya ukuti kwawachi.”

³⁰ U mwene akati, “Lindilila tasi.” Po u Ahimazi akatantama nukulindilila palubazu.

³¹ Umu Etiyopiya wepe akafika nukumubuzya u mwene ukuti, “Wee mwene wane, indi ni pangwi ilyiza. Ilelo u Mwene akupoka munyobe izya bantu babo bakakusambukila.”

³² U mwene akamulalusya umu Etiyopiya yula akati, “Nkimba umulumendo u Abisalomu mwiza bulo?” Umu Etiyopiya yula akamula akati, “Abalwani bako we mwene wane, sona na bantu bosi babo bakusambukiye babanje ngati mulumendo yunuyu.”

³³ Po icheni icha mwene chikasulumannya nkani, umwakuti akabuka muchipinda icha pamwanya icha pamulyango nukulila. Bo akubuka akati, “Wee mwana wane, Abisalomu! Wee Abisalomu! Wee mwana wane. Chame chiza ngali nafwanga nene mubuzilo bwako, wee Abisalomu, mwana wane, wee mwana wane!”