2 Samuweli 17 - IBAYIBOLO 2024

U Hushayi akumupuvya u Abisalomu

¹ U Ahitofeli akamubuzya u Abisalomu akati, “Unyitikizye ukuti insale abantu 12,000 nukubuka pabusiku pakumulondelezya u Devedi.

² Nkwiza pakulwa nawe ubwite, bo alita nukudedebala nkani. Nkwiza pakumupelela ubogha, umwakuti abantu bache bosi bakwiza pakumuchimbila. Po nkwiza pakumughogha nu mwene bulo

³ nukwiza na bantu bache bosi kukwako. Ubufwe ubwa muntu weka yuyo ukumulonda, bukwiza pakubapa umutende abantu, sona abantu bosi batakwiza pakuvulaziwa.”

⁴ Ifundo yiniyi yikaba nyiza nkani kwa Abisalomu, sona na balongozi bosi aba ba Izilayeli.

⁵ Loli u Abisalomu akati, “Umwitizye wepe u Hushayi umu Alikiti yula, ukuti twivwe zizyo akwiza pakunena.”

⁶ Bo u Hushayi iza, u Abisalomu akamubuzya akati, “U Ahitofeli ambuzya ifundo iyi. Nkimba tubombaye vivyo anena? Nanti te momumo, nkimba awe ukwinong'ona choni?”

⁷ U Hushayi akamwamula u Abisalomu akati, “Ifundo yiyo u Ahitofeli akubuzya akabalilo aka, te nyiza nkani.

⁸ Awe uzimenye akiza nkani ukuti ughuso, poka na bantu bache bo basilikali abajivu, sona bakoghofya nkani ngati we labwe, yuyo bamwibila abana bache. Ukonjelezyapo ughuso amenye nkani pakulwa ubwite, po atangaghona poka na basilikali bache ubusiku ubu.

⁹ Lumo pakabalilo aka avwamite kumpako, pamo pabuzilo bumo. Nanti weyuyo akwiza pakuba wakwanda pakulwa namwe ubwite, umuntu wesi yuyo akwivwa zinizi akwiza pakunena ukuti, ‘Abasilikali bosi aba Abisalomu baghoghiwa.’

¹⁰ Po napapo umuntu yumo angaba mujivu nkani ngati nkalamu, akwiza pakudedebala, pakuti aba Izilayeli bosi bazimenye ukuti ughuso we muntu uwamaka, sona bope abantu bache bajivu nkani.

¹¹ “Po ifundo yiyo ningakubuzya yo iyi: Aba Izilayeli bosi aba mu Dani naba mu Belisheba, babo binji nkani ngati musesenga uwa mulubazu ulwa nyanja, babungane poka kuno, sona awe ubalongolelaye pakubuka kubwite.

¹² Po tukwiza pakulwa nawe ubwite posi papo tungamwagha, sona tukwiza pakulwa ubwite ngati mumo yikuwila inganda, umwakuti nayumoyumo umuntu akwiza pakupona.

¹³ Nanti akwiza pakuchimbilila mukaya kamo akakulu nkani, po aba Izilayeli bosi bakwiza pakukawesela mwikombe ninkusa mupaka akaya kosi kamongoliwe.”

¹⁴ U Abisalomu poka naba Izilayeli bosi bakati, “Ifundo iya Hushayi umu Alikiti nyizapo ukuchila ifundo iya Ahitofeli.” Pakuti u Mwene akalondagha pakuyivulungannya ifundo inyiza iya Ahitofeli, umwakuti amuwisizye intamyo u Abisalomu.

¹⁵ U Hushayi akamubuzya umuputi u Zadoki nu muputi u Abiyatala akati, “U Ahitofeli amubuzya u Abisalomu na balongozi aba ba Izilayeli ifundo iyi, loli ane nababuzya ifundo iyinji.

¹⁶ Losi ulu tuma amazyu kwa Devedi aghakuti, ‘Mutakaghone munkolongo pabusiku, loli mwenelezye ukuti mwafumamo, lumo awe na bantu bosi babo bali poka nawe mukwiza pakughoghiwa.’ ”

¹⁷ U Yonatani nu Ahimazi bakalindililagha pambwibwi mu Eni Logeli. Uwambombo umulindu weyuyo akabukagha pakubamanyisya ivintu, po bope bakabuka pakumubuzya u mwene u Devedi, pachifukwa ichakuti batakalondagha ukuti abantu babennye bo bakwinjila mukaya akakulu nkani kala.

¹⁸ Loli umulumendo yumo akabennya nukumubuzya u Abisalomu. U Yonatani nu Ahimazi bakachimbilila kunyumba iya Bahulimu, yuyo akaba ni chiziba pakaya kache, po bosi babili bala bakavwama muchiziba chila.

¹⁹ Umuchi uwa Bahulimu akakupikila pachiziba pala ni chikupikizyo, nukutengapo amalezi, umwakuti nayumoyumo yuyo akazimanya.

²⁰ Bo abantu aba Abisalomu biza kunyumba kula nukulalusya ukuti, “Nkimba u Ahimazi nu Yonatani bali ko kwiyi?” Umukolo yula akabamula akati, “Baloboka ulusoko.” Abantu bala bakabalondelezya loli batakabagha, po bakanyokela ku Yelusalemu.

²¹ Bo abantu bala babuka, u Ahimazi nu Yonatani bakafumamo muchiziba mula, po bakabuka pakumumanyisya u mwene u Devedi. Bakamubuzya bakati, “Lubilo, nyamuka, loboka ulusoko. U Ahitofeli ababuzya abantu bache ukuti balwe nawe ubwite.”

²² U Devedi na bantu bache bosi bakanyamuka nukuloboka ulusoko uwa Yolodani. Bo kwacha, abantu bosi bakaba ukuti baloboka ulusoko ulwa Yolodani.

²³ Bo u Ahitofeli ennya ukuti abantu bakitinkana ni fundo yiyo akababuzya, akakwela impunda yache nukubwela. Akakayannya akiza bulo akaya kache nukwipinyilila. Po akafwa nukusyiliwa mwipumpa ilya wise.

²⁴ U Devedi akabuka ku Mahanayimu, wepe u Abisalomu akaloboka ulusoko ulwa Yolodani, poka naba Izilayeli bosi.

²⁵ U Abisalomu akamwimika u Amasa pakuba we songo uwa basilikali mubuzilo ubwa Yowabu. U Amasa akaba mwana uwa Yeteli umu Izilayeli yuyo akaba mulume uwa Abigelo umwana umulindu uwa Nahashi sona umuyemba uwa Zeluya unyina uwa Yowabu.

²⁶ Aba Izilayeli poka nu Abisalomu bakazenga ivisakasa vyabo mu Giliyadi.

²⁷ Bo u Devedi iza mu Mahanayimu, u Shobi umwana uwa Nahashi umu Amoni uwamu Laba nu Makili umwana uwa Amiyeli uwamu Lo Debali, sona nu Balizilayi umu Giliyadi uwamu Logelimu

²⁸ bakiza ni vyakughonela ivyinji ni mbako sona ni sonta. Bakiza sona ni ngano na mapemba nu busu ni vilombe ivyakocha na malima nu tubala

²⁹ nu buchi nu lukama ni ng'ozi sona na mafuta agha lukama ulwa ng'ombe ukuti u Devedi na bantu bache balyanje. Bakati, “Abantu bali nizala balita sona bali ni nyota munkolongo.”