2 Samuweli 16 - IBAYIBOLO 2024

Nizya Devedi nu Ziba

¹ Bo u Devedi adumusannya panandi pamwanya pighamba, akakomana nu Ziba, uwambombo uwa Mefibosheti. U Ziba akaba ni mpunda zimo zizyo zikaba ni chakwikalilapo, sona zikanyamula ivibama 200, ni vibama ivya mampesya amumizu 100, ni vitumbuwa ivya makuyu 100, sona ni nyambi inyizule nu vinyo.

² U mwene akamulalusya u Ziba akati, “Nkimba choni chicho wiza ni vintu vinivi?” U Ziba akamwamula akati, “Impunda zinizi zyakuti abamunyumba yako bakwelayepo, nukulya ivibama ni vikomwa vinivi, sona nukuti uvinyo uyu abasangalusyanje abantu babo balita nu bulendo munkolongo.”

³ U mwene akamulalusya akati, “Nkimba umwizukulu uwa mwene wako ali ko kwiyi?” U Ziba akamwamula akati, “Asyalikila mu Yelusalemu, pakuti akunena akuti, ‘Ilelo aba Izilayeli bakwiza pakunyosezya ubumwene ubwa ghusokulu.’ ”

⁴ Po u mwene akamubuzya u Ziba akati, “Ivintu vyosi vivyo vikaba vya Mefibosheti, losi ulu vyaba vyako.” U Ziba akati, “Wee mwene, ane ne wambombo wako. Po nkukulaba ukuti akabalilo kosi umpelelaye ichisa.”

U Shimeyi akumughuna u Devedi

⁵ Bo u mwene u Devedi akupalamila papipi nakaya akakulu aka Bahulimu, umuntu yumo uwa munyumba iya Sabuli akafika. Umuntu yunuyu akaba we Shimeyi, umwana uwa Gela, po akamughuna u Devedi bo akufuma kuzi.

⁶ U Shimeyi akamusumba na mabwe u Devedi poka na makambala ghache, napapo abasilikali bosi bakaba ukuti bamuzyunguliye u mwene yula.

⁷ Bo akumughuna, u Shimeyi akati, “Epapo pano, we mughoghi, wee muntu wamwalwemwalwe.

⁸ U Mwene akukutanizya pachifukwa ichakuti ukabaghogha abamunyumba iya Sabuli, nukumufyula ubumwene bwache. U Mwene abubika ubumwene munyobe izya mwana wako u Abisalomu. Bunubu bo bumalilo bwako pachifukwa ichakuti we mughoghi.”

⁹ Po u Abishayi umwana uwa Zeluya akamulalusya u mwene akati, “Nkimba choni chicho ukuyitikizya imbwa infwe ukuti yikughune. Unyitikizye ukuti imudumule umutu?”

¹⁰ Loli u mwene akamwamula u Abishayi nu wamwabo u Yowabu akati, “Vinivi vitakubapalamasya. Nanti akunguna kokuti u Mwene weyuyo amutumite ukuti, ‘Mughune u Devedi,’ sona yuyo ali na maka aghakumulalusya ukuti, ‘Nkimba choni chicho wabomba bunubu?’ ”

¹¹ Po u Devedi akamubuzya u Abishayi poka na makambala ghache ghosi akati, “Nanti umwana wane nu wane akulonda pakungogha. Po umu Benjamini uyu angaleka bulibuli pakunguna? Muleke bulo, angune pakuti we Mwene yuyo amubuzya ukuti abombe bunubu.

¹² Lumo u Mwene akwiza pakwennya intamyo zyane nukunyosezya ivintu ivyiza pachifukwa icha kunguna kunuku ilelo.”

¹³ Po u Devedi na bantu bache bakendagha mumusebo bo u Shimeyi akwenda mulubazu mwighamba, bo akumughuna. Akamusumba na mabwe nukumukupulila ulufumbi.

¹⁴ U mwene poka na bantu babo bakaba nawe, bakafika ku Yolodani bo balitite nkani. Kulakula akikala pasi nukutuzya.

U Abisalomu injila mu Yelusalemu

¹⁵ Pakabalilo kalakala u Abisalomu naba Izilayeli bosi bakiza ku Yelusalemu, po u Ahitofeli akaba poka nawe.

¹⁶ U Hushayi umu Alikiti, umumanyani uwa Devedi akabuka kwa Abisalomu nukumubuzya ukuti, “Wee mwene, nkukulondela ubumi ubutali! Nkukulondela ubumi ubutali!”

¹⁷ U Abisalomu akamulalusya u Hushayi akati, “Nkimba umu momumo umughaniye umumanyani wako? Choni chicho utakabuka poka nu mumanyani wako?”

¹⁸ U Hushayi akamubuzya u Abisalomu akati, “Awe, ane nkwiza pakuba kulubazu ulwa muntu yuyo asaliwe nu Mwene, na bantu aba, sona naba Izilayeli bosi.

¹⁹ Ukonjelezyapo, nkimba wewenu sona yuyo imbaghiye pakumubombela? Nkimba intabaghiye pakukubombela awe we mwana wache? Nkwiza pakukubombela ngati mumo nkamubombela ughuso.”

²⁰ U Abisalomu akamubuzya u Ahitofeli akati, “Tumanyisyeko amahala, nkimba tubombe choni?”

²¹ U Ahitofeli akamula akati, “Buka ughone na bachi abazya aba ghuso, babo bakabaleka ukuti basungilile inyumba iya mwene. Po aba Izilayeli bosi bakwiza pakwivwa ukuti ughuso atakuhoboka navyo, sona abantu bako bosi bakwiza pakujimba umoyo.”

²² Po bakamuzengela ichisakasa u Abisalomu pachisonje icha nyumba, sona u Abisalomu akaghona na bachi abazya abawise pamaso paba Izilayeli bosi.

²³ Mumasiku ghalaghala amahala ghagho akamupa u Ahitofeli ghakaba ngati po mazyu aghakufuma kwa Chala. Po u Devedi nu Abisalomu akaghachindika nkani amahala ghosi agha Ahitofeli.